ಹಾಲ್ ಟಿಕೆಟ್ ತಪ್ಪು ಮುದ್ರಣ: ಯಾದಗಿರಿಯಲ್ಲಿ ವಿದ್ಯಾರ್ಥಿಗಳಿಗೆ ಸಂಕಷ್ಟ
ಯಾದಗಿರಿ: ರಾಜ್ಯಾದ್ಯಂತ ಎಸ್ಎಸ್ಎಲ್ಸಿ ಪರೀಕ್ಷೆಗಳು ಆರಂಭವಾದ ಮೊದಲ ದಿನವೇ ಯಾದಗಿರಿ ಜಿಲ್ಲೆಯಲ್ಲಿ ಪರೀಕ್ಷಾ ಕೇಂದ್ರದ ವಿಳಾಸದ ಗೊಂದಲದಿಂದ ವಿದ್ಯಾರ್ಥಿಗಳು ಮತ್ತು ಪೋಷಕರು ಸಂಕಷ್ಟಕ್ಕೆ ಸಿಲುಕಿದ ಘಟನೆ ನಡೆದಿದೆ.
ಯಾದಗಿರಿಯ ಲುಂಬಿನಿ ಗಾರ್ಡನ್ ಸಮೀಪದಲ್ಲಿರುವ ಸಬಾ ಹೈಸ್ಕೂಲ್ ಪರೀಕ್ಷಾ ಕೇಂದ್ರವಾಗಿದ್ದರೂ, ಹಾಲ್ ಟಿಕೆಟ್ನಲ್ಲಿ ಗಂಜ್ ರಸ್ತೆಯ ವಿಳಾಸವನ್ನು ತಪ್ಪಾಗಿ ಮುದ್ರಿಸಲಾಗಿದೆ. ಇದರಿಂದ ಪರೀಕ್ಷಾ ಕೇಂದ್ರವನ್ನು ಹುಡುಕಲು ವಿದ್ಯಾರ್ಥಿಗಳು ಹಾಗೂ ಪೋಷಕರು ಅಲೆದಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.
ಎಡವಟ್ಟು ಹೇಗೆ ನಡೆದಿದೆ? : ಸಬಾ ಹೈಸ್ಕೂಲ್ ಹಲವು ವರ್ಷಗಳ ಹಿಂದೆ ಲುಂಬಿನಿ ಗಾರ್ಡನ್ ಹತ್ತಿರ ಸ್ಥಳಾಂತರಗೊಂಡಿದ್ದರೂ, ಶಿಕ್ಷಣ ಇಲಾಖೆ ಹಳೆಯ ವಿಳಾಸವನ್ನೇ ಹಾಲ್ ಟಿಕೆಟ್ನಲ್ಲಿ ಮುಂದುವರೆಸಿರುವುದು ಗೊಂದಲಕ್ಕೆ ಕಾರಣವಾಗಿದೆ. ಪರೀಕ್ಷೆಗೆ ತೆರಳಿದ ಅನೇಕ ವಿದ್ಯಾರ್ಥಿಗಳು ಮೊದಲು ಗಂಜ್ ರಸ್ತೆಯ ಹಳೆಯ ವಿಳಾಸಕ್ಕೆ ಹೋಗಿ, ನಂತರ ನಿಜವಾದ ಕೇಂದ್ರವನ್ನು ಹುಡುಕಲು ಸಮಯ ಕಳೆದುಕೊಂಡಿದ್ದಾರೆ.
ವಿದ್ಯಾರ್ಥಿಗಳ ಸಂಕಷ್ಟ: ಈ ಗೊಂದಲದಿಂದ ಕೆಲವರು ಆತಂಕದಿಂದ ಒತ್ತಡಕ್ಕೆ ಒಳಗಾದರು, ಪೋಷಕರು ಮಕ್ಕಳೊಂದಿಗೆ ರಸ್ತೆಗಳಲ್ಲಿ ಅಲೆದಾಡಬೇಕಾಯಿತು. ಪರೀಕ್ಷೆಯಂತಹ ಮಹತ್ವದ ಸಂದರ್ಭದಲ್ಲಿ ಈ ರೀತಿಯ ಎಡವಟ್ಟು ವಿದ್ಯಾರ್ಥಿಗಳ ಮೇಲೆ ಮಾನಸಿಕ ಒತ್ತಡ ತಂದಿದೆ ಎಂದು ಪೋಷಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಪೋಷಕರ ಆಕ್ರೋಶ: “ಶಿಕ್ಷಣ ಇಲಾಖೆಯ ನಿರ್ಲಕ್ಷ್ಯದಿಂದ ಮಕ್ಕಳ ಭವಿಷ್ಯ ಹಾಳಾಗುವ ಸ್ಥಿತಿ ಬಂದಿದೆ” ಎಂದು ಪೋಷಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇಂತಹ ಮೂಲಭೂತ ಮಾಹಿತಿಯಲ್ಲೇ ತಪ್ಪು ಸಂಭವಿಸಿರುವುದಕ್ಕೆ ಸಾರ್ವಜನಿಕರು ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ.
ತಕ್ಷಣ ಕ್ರಮ ಕೈಗೊಂಡ ಅಧಿಕಾರಿಗಳು: ಸ್ಥಳೀಯ ಅಧಿಕಾರಿಗಳು ತಕ್ಷಣ ಕ್ರಮ ಕೈಗೊಂಡು ಸರಿಯಾದ ಕೇಂದ್ರದ ಮಾಹಿತಿ ವಿದ್ಯಾರ್ಥಿಗಳಿಗೆ ನೀಡಿದರು ಹಾಗೂ ಮುಂದಿನ ಪರೀಕ್ಷೆಗಳಿಗೆ ಸರಿಯಾದ ವಿಳಾಸ ನೀಡಲು ಶಿಕ್ಷಣ ಇಲಾಖೆ ಭರವಸೆ ನೀಡಿದೆ.
