ಕಾರವಾರ: 1971ರಲ್ಲಿ ಪಾಕಿಸ್ತಾನ ವಿರುದ್ಧ ನಡೆದ ಇಂಡೋ-ಪಾಕ್ ಸಮರದಲ್ಲಿ ಡಿಸೆಂಬರ್ 4ರಂದು ಭಾರತೀಯ ನೌಕಾಪಡೆಯು ಕರಾಚಿ ಬಂದರಿನ ಮೇಲೆ ನಡೆಸಿದ ಐತಿಹಾಸಿಕ ದಾಳಿಯಿಂದ ಸಾಧಿಸಿದ ವಿಜಯದ ಸ್ಮರಣಾರ್ಥ ಭಾರತೀಯ ನೌಕಾ ದಿನವನ್ನು ಕಾರವಾರದ ಐಎನ್ಎಸ್ ಕದಂಬ ನೌಕಾನೆಲೆಯಲ್ಲಿ ಗುರುವಾರ ಭಾವೈಕ್ಯತೆಯಿಂದ ಆಚರಿಸಲಾಯಿತು.
ಈ ನೆಲೆಯಲ್ಲಿನ ನೌಕಾದಳ ಭವನದಲ್ಲಿ ನಡೆದ ಸ್ಫೂರ್ತಿದಾಯಕ ಕಾರ್ಯಕ್ರಮದಲ್ಲಿ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಭಾಗವಹಿಸಿ ನೌಕಾಪಡೆಯ ಯೋಧರಿಗೆ ಗೌರವ ನಮನ ಸಲ್ಲಿಸಿದರು.
ಯುದ್ಧ ವಿಜಯದ ಸ್ಮರಣೆ: 1971ರ ಯುದ್ಧದ ವೇಳೆಗೆ ಭಾರತೀಯ ನೌಕಾಪಡೆ ಅತ್ಯಂತ ಸಾಹಸಿಕ ದಾಳಿಯ ಮೂಲಕ ಪಾಕಿಸ್ತಾನದ ಕರಾಚಿ ಬಂದರಿನಲ್ಲಿ ಪ್ರಮುಖ ನೌಕಾ ನೆಲೆಗಳನ್ನು ನಾಶಪಡಿಸಿತು.
ಈ ವಿಜಯ ಭಾರತೀಯ ನೌಕಾಪಡೆಯ ತಂತ್ರ ಸಾಮರ್ಥ್ಯ, ಸಾಹಸ, ಮತ್ತು ಕೌಶಲ್ಯದ ಐಕಾನಿಕ್ ಉದಾಹರಣೆ ಎಂದೇ ಪರಿಗಣಿಸಲಾಗಿದೆ.
ದೇಶಭಕ್ತಿ ಗಾನ & ಬೀಟಿಂಗ್ ರಿಟ್ರೀಟ್: ಕಾರ್ಯಕ್ರಮದ ಆರಂಭದಲ್ಲಿ ನೌಕಾಪಡೆಯ ಬ್ಯಾಂಡ್ ತಂಡದಿಂದ ದೇಶಭಕ್ತಿ ಗೀತೆಗಳ ವಾದನ ನಡೆಯಿತು. ನಂತರ ಬೀಟಿಂಗ್ ರಿಟ್ರೀಟ್ ಮೂಲಕ ಕರ್ತವ್ಯನಿಷ್ಠೆ, ತ್ಯಾಗ ಮತ್ತು ರಾಷ್ಟ್ರರಕ್ಷಣೆಗಾಗಿ ನೌಕಾಪಡೆಯ ಬಲಿದಾನವನ್ನು ಸ್ಮರಿಸಲಾಯಿತು.
ಕಾರ್ಯಕ್ರಮ ಅಂತ್ಯದಲ್ಲಿ ನೌಕಾಪಡೆಯ ಧ್ವಜವನ್ನು ಗೌರವದೊಂದಿಗೆ ಅವರೋಹಣ ಮಾಡಲಾಯಿತು.
ನೌಕಾನೆಲೆಯ ದೀಪಾಲಂಕಾರ & ಸಿಡಿಮದ್ದು ಕಣ್ತುಂಬುವ ದರ್ಶನ: ಈ ಸಂಭ್ರಮಾಚರಣೆಯ ಅಂಗವಾಗಿ ಕಾರವಾರ ನೌಕಾಪಡೆಯ ನೌಕೆಗಳಿಗೆ ವಿಶೇಷ ವಿದ್ಯುತ್ ದೀಪಾಲಂಕಾರ ಹಾಗೂ ನೌಕೆಯಿಂದ ಸಿಡಿಮದ್ದು ಪ್ರದರ್ಶನ ಸಮುದ್ರದಲ್ಲಿ ಬೆಳಕು & ಧ್ವನಿಯ ಮೂಲಕ ನೌಕಾಬಲ ಪ್ರದರ್ಶನ ಎಲ್ಲವೂ ಸಾರ್ವಜನಿಕರ ಮನ ಸೆಳೆಯುವಂತಿತ್ತು.
ಸಾಂಸ್ಕೃತಿಕ ಕಾರ್ಯಕ್ರಮಗಳು: ನೌಕಾನೆಲೆ ಶಾಲೆಯ ವಿದ್ಯಾರ್ಥಿಗಳು, ಅಗ್ನಿವೀರರು ಮತ್ತು ನೌಕಾ ಸಿಬ್ಬಂದಿಯ ಕಲಾತ್ಮಕ ಪ್ರದರ್ಶನ ಕಾರ್ಯಕ್ರಮಕ್ಕೆ ಇನ್ನಷ್ಟು ಮೆರಗು ನೀಡಿತು.
ಗಣ್ಯರ ಹಾಜರಿ: ಕಾರ್ಯಕ್ರಮದಲ್ಲಿ ಪ್ರಮುಖ ಅಧಿಕಾರಿಗಳು ಭಾಗವಹಿಸಿದ್ದರು ರಿಯರ್ ಅಡ್ಮಿರಲ್ ವಿಕ್ರಂ ಮೆನನ್ (ಫ್ಲ್ಯಾಗ್ ಕಮಾಂಡಂಟ್, ಕರ್ನಾಟಕ ನೌಕಾ ನೆಲೆ) ಕೆ. ಲಕ್ಷ್ಮಿ ಪ್ರಿಯಾ (ಜಿಲ್ಲಾಧಿಕಾರಿ) ಡಾ. ದಿಲೀಶ್ ಶಶಿ (ಜಿಲ್ಲಾ ಪಂಚಾಯ್ತಿ ಸಿಇಒ) ಎಸ್.ಪಿ ದೀಪನ್ ಎಂ.ಎನ್. ಉಪ ಅರಣ್ಯ ಸಂರಕ್ಷಣಾಧಿಕಾರಿ ರವಿಶಂಕರ್ ನೌಕಾಪಡೆಯ ಹಿರಿಯ ಅಧಿಕಾರಿಗಳು, ಅಗ್ನಿವೀರರು ಮತ್ತು ಸಿಬ್ಬಂದಿ
ಸಮುದ್ರ ಸೇನೆಯ ಶಕ್ತಿ & ಸಮರ್ಪಣೆಗೆ ಗೌರವ: ರಾಷ್ಟ್ರರಕ್ಷಣೆಯ ಮೊದಲ ಸಾಲಿನ ಪಹರೆಗಾರರಾಗಿ ನೌಕಾಪಡೆ ತೋರಿಸುತ್ತಿರುವ ಸಮರ್ಥತೆಯನ್ನು ಸ್ಮರಿಸುವುದರೊಂದಿಗೆ, ಈ ದಿನಾಚರಣೆ ದೇಶಭಕ್ತಿ, ಶಿಸ್ತು, ಶೌರ್ಯ ಮತ್ತು ತ್ಯಾಗದ ಸಂಕೇತವಾಗಿತ್ತು.
