20 ಲಕ್ಷ ಪುಸ್ತಕಗಳ ಉಚಿತ ಗ್ರಂಥಾಲಯ “ಪುಸ್ತಕ ಮನೆ” ಸ್ಥಾಪಿಸಿ ಶಿಕ್ಷಣ ಮತ್ತು ಸಾಹಿತ್ಯ ಕ್ಷೇತ್ರದಲ್ಲಿ ಅಪೂರ್ವ ಸೇವೆ.
ಮಂಡ್ಯ: 2026ರ ಗಣರಾಜ್ಯೋತ್ಸವದ ಸಂದರ್ಭದಲ್ಲಿ ಮಂಡ್ಯ ಜಿಲ್ಲೆಯ ಪಾಂಡವಪುರ ತಾಲೂಕಿನ ಹರಳಹಳ್ಳಿ ಗ್ರಾಮದ ಅಂಕೇ ಗೌಡರಿಗೆ ಪದ್ಮಶ್ರೀ ಪ್ರಶಸ್ತಿ ಘೋಷಿಸಲಾಗಿದೆ. ಸಾಹಿತ್ಯ ಮತ್ತು ಶಿಕ್ಷಣ ಕ್ಷೇತ್ರದಲ್ಲಿ ಅವರು ಸಲ್ಲಿಸಿರುವ ಅಪೂರ್ವ ಹಾಗೂ ಅಪ್ರತಿಮ ಸೇವೆಯನ್ನು ಗುರುತಿಸಿ, ಭಾರತ ಸರ್ಕಾರ ಈ ರಾಷ್ಟ್ರಮಟ್ಟದ ಗೌರವವನ್ನು ಘೋಷಿಸಿದೆ.
75 ವರ್ಷದ ಪುಸ್ತಕಪ್ರೇಮಿ, ಗ್ರಂಥಸಂಕಲಕ ಹಾಗೂ ಜ್ಞಾನಸೇವಕನಾದ ಅಂಕೇ ಗೌಡರು, ತಮ್ಮ ಜೀವನವನ್ನೇ ಪುಸ್ತಕಗಳಿಗೆ ಅರ್ಪಿಸಿರುವ ಅಪರೂಪದ ವ್ಯಕ್ತಿತ್ವ. ಅವರು ಸ್ಥಾಪಿಸಿರುವ “ಪುಸ್ತಕ ಮನೆ” ಗ್ರಂಥಾಲಯವು ಭಾರತದಲ್ಲೇ ಅತಿದೊಡ್ಡ ಉಚಿತ ಪ್ರವೇಶ ಗ್ರಂಥಾಲಯಗಳಲ್ಲಿ ಒಂದಾಗಿ ಪರಿಗಣಿತವಾಗಿದೆ.
ಇದನ್ನೂ ಓದಿ: ಸಂಘರ್ಷ ರಹಿತ ರಾಜ್ಯಪಾಲರ ನಡೆ: ಗಣರಾಜ್ಯ ಭಾಷಣ ನಿರಾಳ
ಜೀವನ ಮತ್ತು ಕಾರ್ಯ: ಬಸ್ ಕಂಡಕ್ಟರ್ನಿಂದ ಪದ್ಮಶ್ರೀ ಪುರಸ್ಕೃತನ ತನಕ ಅಂಕೇ ಗೌಡರು ತಮ್ಮ ಬಾಲ್ಯದಲ್ಲಿ ಬಸ್ ಕಂಡಕ್ಟರ್ ಆಗಿ ಜೀವನ ಆರಂಭಿಸಿದ್ದರು. ಕಷ್ಟದ ಬದುಕಿನ ನಡುವೆಯೇ ಪುಸ್ತಕಗಳ ಮೇಲಿನ ಅಪಾರ ಪ್ರೀತಿಯಿಂದ, ತಮ್ಮ ಗಳಿಕೆಯ ಬಹುತೇಕ ಭಾಗವನ್ನು ವರ್ಷಗಳ ಕಾಲ ಪುಸ್ತಕ ಸಂಗ್ರಹಕ್ಕೆ ಮೀಸಲಿಟ್ಟರು.
ನಂತರ ತಮ್ಮ ಸ್ವಂತ ಗೃಹವನ್ನೇ ಮಾರಾಟ ಮಾಡಿ, ಆ ಸಂಪತ್ತನ್ನು ಗ್ರಂಥಾಲಯದ ವಿಸ್ತಾರ ಮತ್ತು ಅಭಿವೃದ್ಧಿಗೆ ಹೂಡಿದ ಅಪರೂಪದ ತ್ಯಾಗವನ್ನು ಅವರು ಮಾಡಿದ್ದಾರೆ. ನಿವೃತ್ತಿಯಿಂದ ಬಂದ ₹35 ಲಕ್ಷ ಹಣ, ಮೈಸೂರಿನ ಸೈಟ್ ಮಾರಾಟದಿಂದ ಬಂದ ಮೊತ್ತ—ಎಲ್ಲವೂ ಪುಸ್ತಕಗಳ ಬಂಡವಾಳವಾಯಿತು. ಈ ಸಾಧನೆಯಲ್ಲಿ ಪತ್ನಿಯಿಂದ ಸಂಪೂರ್ಣ ಬೆಂಬಲ ದೊರೆತಿದೆ ಎಂದು ಅವರು ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಮಾನವ–ಆನೆ ಸಂಘರ್ಷ ತಗ್ಗಿಸಲು ಮಹತ್ವದ ಹೆಜ್ಜೆ
“ನನಗೆ ಯಾವುದೇ ದುಃಖ ಇಲ್ಲ. ಜೀವನದಲ್ಲಿ ತುಂಬಾ ಕಷ್ಟ ಅನುಭವಿಸಿದ್ದೇನೆ. ಅದೇ ನನಗೆ ಪುಸ್ತಕಗಳ ಮಹತ್ವ ಕಲಿಸಿತು” ಎಂಬುದು ಅಂಕೇ ಗೌಡರ ಜೀವನ ತತ್ವ.
“ಪುಸ್ತಕ ಮನೆ” — ಜ್ಞಾನಕ್ಕೆ ಮುಕ್ತ ದ್ವಾರ: ಅಂಕೇ ಗೌಡರು ಸ್ಥಾಪಿಸಿರುವ “ಪುಸ್ತಕ ಮನೆ” ಗ್ರಂಥಾಲಯದಲ್ಲಿ ಸುಮಾರು 20 ಲಕ್ಷ ಪುಸ್ತಕಗಳ ಸಂಗ್ರಹ. ಅಂದಾಜು 5 ಲಕ್ಷ ಅಪರೂಪದ ವಿದೇಶಿ ಪುಸ್ತಕಗಳು. 5,000ಕ್ಕೂ ಹೆಚ್ಚು ನಿಘಂಟುಗಳು ಇರುವುದರಿಂದ ಇದು ಸಂಶೋಧನೆ ಮತ್ತು ಅಧ್ಯಯನದ ಅಪೂರ್ವ ಕೇಂದ್ರವಾಗಿ ರೂಪುಗೊಂಡಿದೆ.
ಇದನ್ನೂ ಓದಿ: ಮದರಿ ಗ್ರಾಮದ ನದಿ ತೀರದ ಜಮೀನಿನಲ್ಲಿ ಚಿರತೆ ಪ್ರತ್ಯಕ್ಷ
ಈ ಗ್ರಂಥಾಲಯಕ್ಕೆ ಪ್ರವೇಶ ಪೂರ್ಣವಾಗಿ ಉಚಿತ. ಯಾವುದೇ ಸದಸ್ಯತ್ವ ಶುಲ್ಕವಿಲ್ಲ, ಯಾವುದೇ ಪ್ರಮಾಣಪತ್ರದ ಅವಶ್ಯಕತೆಯಿಲ್ಲ. ವಿದ್ಯಾರ್ಥಿಗಳು, ಸಂಶೋಧಕರು, ಉನ್ನತ ಸ್ಪರ್ಧಾತ್ಮಕ ಪರೀಕ್ಷಾ ಅಭ್ಯರ್ಥಿಗಳು ಮಾತ್ರವಲ್ಲದೆ, ಕೆಲ ಸಂದರ್ಭಗಳಲ್ಲಿ ಸುಪ್ರೀಂ ಕೋರ್ಟ್ ನ್ಯಾಯಾಧೀಶರು ಮತ್ತು ಖ್ಯಾತ ಚಿಂತಕರು ಸಹ ಈ ಗ್ರಂಥಾಲಯಕ್ಕೆ ಭೇಟಿ ನೀಡಿದ್ದಾರೆ.
ಸಾಮಾಜಿಕ ಸೇವೆ: ಅಂಕೇ ಗೌಡರು ಸಾಮಾಜಿಕವಾಗಿ ಗುರುತಿಸಿಕೊಂಡಿರುವ ವ್ಯಕ್ತಿತ್ವ. ಜನಪ್ರಿಯತೆ, ಪ್ರಶಸ್ತಿಗಳ ಹಿಂದೆ ಓಡದೆ, ಮೌನವಾಗಿ ಸಮಾಜಸೇವೆಯಲ್ಲಿ ತೊಡಗಿಸಿಕೊಂಡಿರುವ ಅವರು ಈಗ ಪದ್ಮಶ್ರೀ ಪ್ರಶಸ್ತಿಯಿಂದ ರಾಷ್ಟ್ರಮಟ್ಟದಲ್ಲಿ ಗುರುತಿಸಲ್ಪಟ್ಟಿದ್ದಾರೆ.
ಇದನ್ನೂ ಓದಿ: ವೀರರಾಣಿ ಚನ್ನಮ್ಮ ಮೂರ್ತಿ ರಕ್ಷಣೆ ಭವಿಷ್ಯ ಡೋಲಾಯಮಾನ
ಬೆಂಬಲ ಮತ್ತು ಭವಿಷ್ಯದ ಕನಸು: ಈ ಗ್ರಂಥಾಲಯದ ವಿಸ್ತಾರಕ್ಕಾಗಿ ಎಚ್.ಡಿ. ಕುಮಾರಸ್ವಾಮಿ ಅವರು ₹1 ಕೋಟಿ ದೇಣಿಗೆ ನೀಡಿರುವುದು ಗಮನಾರ್ಹ. ಇದಲ್ಲದೆ, ಸರ್ಕಾರದಿಂದ 10 ಎಕರೆ ಜಾಗ ಸಿಗಬೇಕೆಂಬ ಬಯಕೆಯನ್ನು ಅಂಕೇ ಗೌಡರು ವ್ಯಕ್ತಪಡಿಸಿದ್ದಾರೆ. ಇದು ಈ ಜ್ಞಾನಕೇಂದ್ರವನ್ನು ಇನ್ನಷ್ಟು ವಿಸ್ತಾರವಾಗಿ ರೂಪಿಸಲು ನೆರವಾಗಲಿದೆ.
ರಾಷ್ಟ್ರಮಟ್ಟದ ಗೌರವ: ಪುಸ್ತಕಗಳ ಮೂಲಕ ಪ್ರತಿಯೊಬ್ಬ ಓದುಗನಿಗೂ ಜ್ಞಾನ ಸಿಗಬೇಕು ಎಂಬ ಏಕೈಕ ಧ್ಯೇಯದೊಂದಿಗೆ ಬದುಕಿದ ಅಂಕೇ ಗೌಡರಿಗೆ, ರಾಜ್ಯೋತ್ಸವ, ಲಿಮ್ಮಾ ರಾಷ್ಟ್ರೀಯ ಪ್ರಶಸ್ತಿ ಸೇರಿದಂತೆ ಹಲವಾರು ಪ್ರಶಸ್ತಿಗಳು ಇವರನ್ನು ಅರಸಿ ಬಂದಿವೆ. ಇನ್ನು 2026ರ ಪದ್ಮಶ್ರೀ ಪ್ರಶಸ್ತಿಯು ಅವರ ಜೀವನದ ತ್ಯಾಗ ಮತ್ತು ಸೇವೆಗೆ ಸಲ್ಲಿಸಿದ ರಾಷ್ಟ್ರದ ಗೌರವವಾಗಿದೆ.
