ವಿಜಯಪುರ–ಬೆಂಗಳೂರು ರೈಲು ಸಂಪರ್ಕಕ್ಕೆ ವೇಗ

ಉತ್ತರ ಕರ್ನಾಟಕ ಅಭಿವೃದ್ಧಿಗೆ ಹೊಸ ದಿಕ್ಕು!

ಬೆಂಗಳೂರು: ಕರ್ನಾಟಕದ ಪ್ರಮುಖ ರೈಲು ಯೋಜನೆಗಳ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ರಾಜ್ಯ ಸರ್ಕಾರ ಮತ್ತೊಂದು ಮಹತ್ವದ ಹೆಜ್ಜೆ ಇಟ್ಟಿದೆ. ವಿಜಯಪುರದಿಂದ ಬೆಂಗಳೂರಿನವರೆಗೆ ಇರುವ ರೈಲು ಸಂಚಾರವನ್ನು ವೇಗಗೊಳಿಸುವ ಪ್ರಯತ್ನಗಳು ಹೊಸ ಹಂತ ಪ್ರವೇಶಿಸಿವೆ. ಖನಿಜ ಭವನದಲ್ಲಿ ನೈರುತ್ಯ ರೈಲ್ವೆ ಉನ್ನತಾಧಿಕಾರಿಗಳಿಂದ ನಡೆಸಲಾದ ‘ಫಾಲೋ-ಅಪ್ ಮೀಟಿಂಗ್’ ಬಳಿಕ ಮಾತನಾಡಿದ ಮೂಲಸೌಕರ್ಯ ಅಭಿವೃದ್ಧಿ ಸಚಿವ ಎಂ.ಬಿ. ಪಾಟೀಲ್ ಅವರು ಸಂಚಾರ ಸುಧಾರಣೆಗೆ ಸಂಬಂಧಿಸಿದಂತೆ ಮಹತ್ವದ ಮಾಹಿತಿ ಹಂಚಿಕೊಂಡರು.

ವಿಜಯಪುರ–ಬೆಂಗಳೂರು ಪ್ರಯಾಣ ಸಮಯ ಕಡಿತದ ಮಹತ್ವದ ಗುರಿ: ಪ್ರಸ್ತುತ ವಿಜಯಪುರ–ಬೆಂಗಳೂರು ರೈಲು ಪ್ರಯಾಣಕ್ಕೆ ಸುಮಾರು 15 ಗಂಟೆಗಳಷ್ಟು ಸಮಯ ಬೇಕಾಗುತ್ತದೆ. ಇದನ್ನು 10 ಗಂಟೆಗಳಿಗೆ ಇಳಿಸುವ ಗುರಿ ಸರ್ಕಾರದ ಮುಂದಿದೆ. ಇದರ ಭಾಗವಾಗಿ ಈಗಾಗಲೇ ಹಲವು ತಾಂತ್ರಿಕ ಮತ್ತು ಮಾರ್ಗಬದಲಾವಣೆ ಸಭೆಗಳು ನಡೆದಿದ್ದು, ಇದೀಗ ರೈಲ್ವೆ ಅಧಿಕಾರಿಗಳು ಹುಬ್ಬಳ್ಳಿ ಹಾಗೂ ಗದಗ ಬೈಪಾಸ್ ಮೂಲಕ ರೈಲು ಚಲಾಯಿಸಲು ಯಾವುದೇ ಅಡ್ಡಿಯಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇದು ಯೋಜನೆಗೆ ದೊಡ್ಡ ಉತ್ತೇಜನ ನೀಡಲಿದೆ.

“ಬೆಂಗಳೂರು–ಹುಬ್ಬಳ್ಳಿ ನೇರ ಮಾರ್ಗದಲ್ಲಿ ಕೇವಲ ಪ್ರಮುಖ ನಿಲ್ದಾಣಗಳಲ್ಲಿ ಮಾತ್ರ ನಿಲ್ಲಿಸಿ, ಹುಬ್ಬಳ್ಳಿಯಿಂದ ವಿಜಯಪುರದವರೆಗೆ ಪ್ರಾದೇಶಿಕ ಅಗತ್ಯಕ್ಕೆ ಅನುಗುಣವಾಗಿ ಸೇವೆ ನೀಡಿದರೆ ಪ್ರಯಾಣಿಕರಿಗೆ ಹೆಚ್ಚಿನ ಅನುಕೂಲ ಸಿಗಲಿದೆ. ಈ ಸಂಬಂಧ ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಹಾಗೂ ಸೋಮಣ್ಣ ಅವರಿಗೆ ತಕ್ಷಣವೇ ಪತ್ರ ಬರೆಯಲಾಗುತ್ತಿದೆ ಎಂದು ಸಚಿವರು ತಿಳಿಸಿದ್ದಾರೆ.

ಸಭೆಯ ಇತರೆ ಮುಖ್ಯ ತೀರ್ಮಾನಗಳು

ವಂದೇ ಭಾರತ್ ಸ್ಲೀಪರ್ ಸೇವೆಗೆ ಪ್ರಸ್ತಾವ: ವೇಗ ಮತ್ತು ದೀರ್ಘ ಪ್ರಯಾಣಕ್ಕೆ ಸೂಕ್ತವಾದ Vande Bharat Sleeper ಸೇವೆಯನ್ನು ಪ್ರಸ್ತಾಪಿಸಲಾಗಿದೆ.

ನಾಲ್ಕು ಹಳಿ (Quadrilateral) ಮಾರ್ಗ ಸಮೀಕ್ಷೆ ಅಂತಿಮ ಹಂತ: ಬೆಂಗಳೂರು–ತುಮಕೂರು. ಬೆಂಗಳೂರು–ಮೈಸೂರು. ಈ ಎರಡೂ ಮಾರ್ಗಗಳಲ್ಲಿ ಚತುಷ್ಪಥ ರೈಲು ಮಾರ್ಗದ ಸಮೀಕ್ಷೆ ಅಂತಿಮ ಹಂತದಲ್ಲಿದೆ. ವಂಡಾಲ–ಆಲಮಟ್ಟಿ ಜೋಡಿ ಹಳಿ ಕಾರ್ಯವನ್ನು 2026ರ ಫೆಬ್ರವರಿ ವೇಳೆಗೆ ಪೂರ್ಣಗೊಳಿಸಲಾಗುವುದು.

ರೈಲು ವೇಗ ಹೆಚ್ಚಲು ನೆರವು ನೀಡಲು ವಿದ್ಯುತ್ಕರಣದ ಮೂಲಕ ರೈಲು ಚಲನಕ್ಷಮತೆ ಹೆಚ್ಚುವುದು ಹಾಗೂ ಸಂಚಾರದ ದಟ್ಟಣೆ ಕಡಿಮೆಯಾಗಲಿದೆ.

ಹೊಸ ಮಾರ್ಗಗಳ ವೇಗಗತಿಯಲ್ಲಿ ನಿರ್ಮಾಣ: ಚಿತ್ರದುರ್ಗ–ಆಲಮಟ್ಟಿ ಹಾಗೂ ಯಾದಗಿರಿ–ಆಲಮಟ್ಟಿ ಮತ್ತು ಅನೇಕ ಹೊಸ ಸಂಪರ್ಕ ಮಾರ್ಗಗಳು ಪ್ರಗತಿಯಲ್ಲಿವೆ. ಅದರಲ್ಲಿ ತುಮಕೂರು–ಊರುಕೆರೆ ರೈಲು ಸೇವೆಯು ಈ ವರ್ಷವೇ ಪ್ರಯಾಣಿಕರಿಗೆ ಲಭ್ಯವಾಗಲಿದೆ.
ದೊಡ್ಡಹಳ್ಳಿ–ಪಾವಗಡ ಸಂಪರ್ಕವು 2026 ಜನವರಿ ವೇಳೆಗೆ ಮಾರ್ಗ ಸಿದ್ಧವಾಗಲಿದೆ. ಮಧುಗಿರಿ–ಪಾವಗಡ ಮಾರ್ಗವು 2028 ಫೆಬ್ರವರಿ ವೇಳೆಗೆ ಪೂರ್ಣಗೊಳ್ಳಲಿದೆ.

ಕರಾವಳಿಗೆ ನೇರ ಸಂಪರ್ಕದ ಹೆಜ್ಜೆ: ಹುಬ್ಬಳ್ಳಿ–ಅಂಕೋಲಾ ರೈಲು ಯೋಜನೆಗೆ ಬೇಕಾದ ಅಡ್ಡಿಗಳನ್ನು ನಿವಾರಣೆ ಮಾಡುವ ಕ್ರಮ ಚರ್ಚಿಸಿದ್ದು. ಇದು ಉತ್ತರ ಕರ್ನಾಟಕಕ್ಕೆ ನೇರ ಸಮುದ್ರ ತೀರ ಸಂಪರ್ಕ ಕಲ್ಪಿಸುವ ಪ್ರಮುಖ ಯೋಜನೆ. ಬೆಂಗಳೂರು–ಹಾಸನ–ಮಂಗಳೂರು ಜೋಡಿ ಹಳಿ ಮಾರ್ಗ ಜೋಡಿಸುವ ಕುರಿತು ಚರ್ಚೆ ನಡೆಯಿತು, ಇದು ಮಂಗಳೂರು ಬಂದರು ಸಂಪರ್ಕವನ್ನು ಬಲಪಡಿಸಲಿದೆ.