ಗೆಳತಿಯರಿಗೆ ದುಬಾರಿ ಐಫೋನ್ ಉಡುಗೊರೆಯಾಗಿ ನೀಡಬೇಕು ಎಂಬ ವಿಚಿತ್ರ ಆಸೆಗೆ ಬಿದ್ದ ಇಬ್ಬರು ಅಪ್ರಾಪ್ತರು, ಬರೋಬ್ಬರಿ ಆರೂವರೆ ಲಕ್ಷ ರೂಪಾಯಿ ಮೌಲ್ಯದ ಐಷಾರಾಮಿ ನಲ್ಲಿಗಳನ್ನು ಕಳವು ಮಾಡಿ ಕೊನೆಗೆ ಪೊಲೀಸರ ಅತಿಥಿಯಾಗಿರುವ ವಿಲಕ್ಷಣ ಘಟನೆಯೊಂದು ಮಹಾರಾಷ್ಟ್ರದ ನಾಗ್ಪುರದಲ್ಲಿ ಬೆಳಕಿಗೆ ಬಂದಿದೆ. ಪ್ರೀತಿಯ ಹೆಸರಿನಲ್ಲಿ ಶಾರ್ಟ್ಕಟ್ ಮೂಲಕ ಹಣ ಸಂಪಾದಿಸಲು ಹೊರಟ ಈ ಇಬ್ಬರು ಹುಡುಗರು, ಲಕ್ಷಾಂತರ ರೂಪಾಯಿ ಮೌಲ್ಯದ ಐಷಾರಾಮಿ ಕಂಟೆಂಟ್ಗಳನ್ನು ಕೇವಲ ಇಪ್ಪತ್ತು ಸಾವಿರ ರೂಪಾಯಿಗೆ ಗುಜರಿ ವ್ಯಾಪಾರಿಗೆ ಮಾರಿ ಈಗ ಕಾನೂನಿನ ಬಲೆಗೆ ಬಿದ್ದಿದ್ದಾರೆ.
ನಾಗ್ಪುರ ನಗರದ ರಾಹುಲ್ ಸೆರಾಮಿಕ್ಸ್ ಪ್ರೈವೇಟ್ ಲಿಮಿಟೆಡ್ ಎಂಬ ಪ್ರಸಿದ್ಧ ಟೈಲ್ಸ್ ಹಾಗೂ ಸ್ಯಾನಿಟರಿ ವೇರ್ ಅಂಗಡಿಯಲ್ಲಿ ಈ ಹೈಟೆಕ್ ಕಳ್ಳತನ ನಡೆದಿದೆ. ಕಳೆದ ಮೇ 27ರ ಮಧ್ಯರಾತ್ರಿ ಯಾರಿಗೂ ಅನುಮಾನ ಬಾರದಂತೆ ಸ್ಕೆಚ್ ಹಾಕಿದ್ದ ಈ ಅಪ್ರಾಪ್ತರು, ಅಂಗಡಿಯ ಮೇಲ್ಛಾವಣಿಯ ತಗಡಿನ ಶೀಟ್ಗಳನ್ನು ಅತ್ಯಂತ ಚಾಣಾಕ್ಷತನದಿಂದ ತೆಗೆದು ಒಳನುಗ್ಗಿದ್ದಾರೆ. ಕಣ್ಣಿಗೆ ಕಂಡಿದ್ದನ್ನೆಲ್ಲಾ ಕದಿಯುವ ಬದಲಾಗಿ ಅಂಗಡಿಯಲ್ಲಿದ್ದ ಅತ್ಯಂತ ದುಬಾರಿ ಮತ್ತು ವಿಲಕ್ಷಣವಾದ ನಲ್ಲಿಗಳನ್ನೇ ಟಾರ್ಗೆಟ್ ಮಾಡಿದ್ದಾರೆ. ಕಳುವಾದ ವಸ್ತುಗಳಲ್ಲಿ ಸುಮಾರು 4 ಲಕ್ಷ ರೂಪಾಯಿ ಮೌಲ್ಯದ ಚಿನ್ನದ ವಿನ್ಯಾಸದ (Gold Plated) ಕೇವಲ ಐದು ನಲ್ಲಿಗಳು ಸೇರಿದಂತೆ, ಅತ್ಯಂತ ಐಷಾರಾಮಿ ಎನಿಸುವ ರೋಸ್ ಗೋಲ್ಡ್ ಮತ್ತು ಸಿಲ್ವರ್ ಬಣ್ಣದ ನಲ್ಲಿಗಳು ಸೇರಿದ್ದವು.
ತಾವು ಕದ್ದ ವಸ್ತುಗಳ ಅಸಲಿ ಬೆಲೆ ಆರೂವರೆ ಲಕ್ಷ ರೂಪಾಯಿ ಎಂಬ ಕನಿಷ್ಠ ಜ್ಞಾನವೂ ಇಲ್ಲದ ಈ ಜೋಡಿ, ಕದ್ದ ಮಾಲನ್ನೆಲ್ಲಾ ತಗೆದುಕೊಂಡು ಹೋಗಿ ಕೇವಲ 20 ಸಾವಿರ ರೂಪಾಯಿಗೆ ಗುಜರಿ ಅಂಗಡಿಯವನಿಗೆ ಮಾರಾಟ ಮಾಡಿದ್ದಾರೆ. ಆದರೆ, ಅಂಗಡಿ ಮಾಲೀಕರು ಕಳ್ಳತನದ ಬಗ್ಗೆ ದೂರು ನೀಡಿದ ತಕ್ಷಣ ಸಿಸಿಟಿವಿ ದೃಶ್ಯಾವಳಿ ಹಾಗೂ ಖಚಿತ ಮಾಹಿತಿ ಆಧರಿಸಿ ಕಾರ್ಯಾಚರಣೆ ನಡೆಸಿದ ನಾಗ್ಪುರ ಪೊಲೀಸರು ತನಿಖೆ ನಡೆಸಿ ಇಬ್ಬರು ಅಪ್ರಾಪ್ತರನ್ನು ವಶಕ್ಕೆ ಪಡೆದಿದ್ದಾರೆ. ಪ್ರೇಯಸಿಯರನ್ನು ಮೆಚ್ಚಿಸಲು ಐಫೋನ್ ಕೊಡಿಸಲು ಹೋಗಿ ಜೈಲು ಪಾಲಾಗಿರುವ ಈ ಅಪ್ರಾಪ್ತರ ಕಥೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
