ನವದೆಹಲಿ: ಭಾರತದ ಜೂಡೋ ಕ್ಷೇತ್ರದಲ್ಲಿ ಮಹತ್ವದ ಮೈಲುಗಲ್ಲು ಸಾಧನೆಯಾಗಿದೆ. ಮಹಿಳೆಯರ 63 ಕೆಜಿ ತೂಕ ವಿಭಾಗದಲ್ಲಿ ಜೂನಿಯರ್ ವಿಶ್ವ ಶ್ರೇಯಾಂಕದಲ್ಲಿ ನಂ.1 ಸ್ಥಾನವನ್ನು ಗಿಟ್ಟಿಸಿಕೊಂಡು, 20 ವರ್ಷದ ಹಿಮಾಂಶಿ ಟೋಕಾಸ್ ಇತಿಹಾಸ ನಿರ್ಮಿಸಿದ್ದಾರೆ. ಜೂಡೋ ವಿಶ್ವ ಶ್ರೇಯಾಂಕ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದ ಮೊದಲ ಭಾರತೀಯ ಕ್ರೀಡಾಪಟುವಾಗಿ ಅವರು ಹೆಗ್ಗಳಿಕೆ ಗಳಿಸಿದ್ದಾರೆ.
ಅಂತರರಾಷ್ಟ್ರೀಯ ಜೂಡೋ ಫೆಡರೇಶನ್ (IJF) ಪ್ರಕಟಿಸಿರುವ ಇತ್ತೀಚಿನ ವಿಶ್ವ ಶ್ರೇಯಾಂಕ ಪಟ್ಟಿಯ ಪ್ರಕಾರ, ಹಿಮಾಂಶಿ ಒಟ್ಟು 610 ಅಂಕಗಳನ್ನು ಗಳಿಸಿ ಮೂರನೇ ಸ್ಥಾನದಿಂದ ನೇರವಾಗಿ ಅಗ್ರಸ್ಥಾನಕ್ಕೇರಿದ್ದಾರೆ. ಈ ಸಾಧನೆ ಮೂಲಕ ಅವರು ಭಾರತದಲ್ಲಿ ಜೂಡೋ ಕ್ರೀಡೆಯ ಭವಿಷ್ಯಕ್ಕೆ ಹೊಸ ದಿಕ್ಕು ತೋರಿಸಿದ್ದಾರೆ.
ಶಾಹಿನ್ ದರ್ಜಾದಾ – ಮತ್ತೊಂದು ಸಾಧನೆ: ಇದೇ ವೇಳೆ ಮಹಿಳೆಯರ 57 ಕೆಜಿ ತೂಕ ವಿಭಾಗದಲ್ಲಿ ಭಾರತದ ಶಾಹಿನ್ ರಜಕ್‌ಭಾಯ್ ದರ್ಜಾದಾ ನಾಲ್ಕನೇ ಸ್ಥಾನ ಪಡೆದು ಗಮನ ಸೆಳೆದಿದ್ದಾರೆ. ಇದೇ ಮೊಟ್ಟ ಮೊದಲ ಬಾರಿಗೆ ಇಬ್ಬರು ಭಾರತೀಯ ಮಹಿಳಾ ಜೂಡೋ ಪಟುಗಳು ತಮ್ಮ ತೂಕ ವಿಭಾಗಗಳಲ್ಲಿ ವಿಶ್ವದ ಮೊದಲ ಐದು ಸ್ಥಾನಗಳಲ್ಲಿ ಸ್ಥಾನ ಪಡೆದಿರುವುದು ಮಹತ್ವದ್ದಾಗಿದೆ.
ಏಷ್ಯನ್ ಜೂನಿಯರ್ ಚಾಂಪಿಯನ್‌ಶಿಪ್‌ನಲ್ಲಿ ಜಯ: ಹಿಮಾಂಶಿ ಟೋಕಾಸ್ ಅವರ ಈ ಸಾಧನೆಗೆ ಪ್ರಮುಖ ಕಾರಣ ಕಳೆದ ವಾರ (ಸೆಪ್ಟೆಂಬರ್ 13, 2025) ಕಝಾಕಿಸ್ತಾನದಲ್ಲಿ ನಡೆದ ಏಷ್ಯನ್ ಜೂನಿಯರ್ ಜೂಡೋ ಚಾಂಪಿಯನ್‌ಶಿಪ್‌ನಲ್ಲಿ ಪಡೆದ ಚಿನ್ನದ ಪದಕ. ಈ ವರ್ಷದ ಇದು ಅವರ ಮೂರನೇ ಪ್ರಶಸ್ತಿ. ಇದಕ್ಕೂ ಮೊದಲು ಅವರು ವಿವಿಧ ಅಂತರರಾಷ್ಟ್ರೀಯ ಟೂರ್ನಿಗಳಲ್ಲಿ ಪದಕ ಗೆದ್ದು ಗಮನ ಸೆಳೆದಿದ್ದರು.
ರಿಲಯನ್ಸ್ ಫೌಂಡೇಶನ್ ಬೆಂಬಲ: ಹಿಮಾಂಶಿ ಟೋಕಾಸ್ ರಿಲಯನ್ಸ್ ಫೌಂಡೇಶನ್‌ನಿಂದ ಬೆಂಬಲಿತವಾಗಿದ್ದು, ಅವರು ನೀಡಿದ ತರಬೇತಿ ಮತ್ತು ಸೌಲಭ್ಯಗಳು ಈ ಸಾಧನೆಗೆ ಕಾರಣವಾಗಿವೆ. ಹಿಮಾಂಶಿ ತಮ್ಮ ಕಿರಿಯ ವಯಸ್ಸಿನಲ್ಲಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆ ತೋರಿದುದರಿಂದ ಮುಂದಿನ ಒಲಿಂಪಿಕ್ ಕ್ರೀಡಾಕೂಟಗಳಲ್ಲಿ ಭಾರತಕ್ಕೆ ಪದಕ ತಂದುಕೊಡುವ ಭರವಸೆಯನ್ನು ಮೂಡಿಸಿದ್ದಾರೆ.
ಭಾರತದ ಕ್ರೀಡಾಂಗಣಕ್ಕೆ ನೂತನ ಪುಟ: ಜೂಡೋ ಕ್ರೀಡೆಯಲ್ಲಿ ಭಾರತವು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಚ್ಚು ಹೆಸರು ಮಾಡದಿದ್ದರೂ, ಹಿಮಾಂಶಿ ಟೋಕಾಸ್ ಮತ್ತು ಶಾಹಿನ್ ದರ್ಜಾದಾ ಅವರ ಸಾಧನೆಗಳು ಭಾರತೀಯ ಜೂಡೋಗೆ ಹೊಸ ದಾರಿಯನ್ನೇ ತೆರೆದಿವೆ. ಯುವ ಪೀಳಿಗೆಗೆ ಇದು ಪ್ರೇರಣೆ ನೀಡುವಂತದ್ದು.
