ಭಾರತದ ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಸದ್ಯ ಬೆಂಗಳೂರು ಮೂಲದ ಕಂಪನಿಯೊಂದು ದೊಡ್ಡ ಮಟ್ಟದ ಸಂಚಲನ ಸೃಷ್ಟಿಸಿದೆ. ಹಸಿರು ಇಂಧನ ಮತ್ತು ಪರಿಸರಸ್ನೇಹಿ ತಂತ್ರಜ್ಞಾನ ಆವಿಷ್ಕಾರಗಳಲ್ಲಿ ಮುಂಚೂಣಿಯಲ್ಲಿರುವ ‘ಜಿಪಿಎಸ್ ರಿನ್ಯೂವಬಲ್ಸ್’ (GPS Renewables) ಸಂಸ್ಥೆಯು ತನ್ನ ಸೀರೀಸ್ ‘ಸಿ’ ಹೂಡಿಕೆ ಸುತ್ತಿನಲ್ಲಿ ಬರೋಬ್ಬರಿ 635 ಕೋಟಿ ರೂಪಾಯಿಗಳ ಬಂಡವಾಳವನ್ನು ಯಶಸ್ವಿಯಾಗಿ ಕ್ರೋಢೀಕರಿಸಿದೆ. ದೇಶದಲ್ಲಿ ಹಸಿರು ಇಂಧನ ಮೂಲಸೌಕರ್ಯಗಳನ್ನು ಬಲಪಡಿಸಲು ಮತ್ತು ಸಂಕುಚಿತ ಜೈವಿಕ ಅನಿಲ ಅಂದರೆ ಸಿ.ಬಿ.ಜಿ (CBG) ಯೋಜನೆಗಳನ್ನು ವ್ಯಾಪಕವಾಗಿ ವಿಸ್ತರಿಸಲು ಈ ಬೃಹತ್ ಹೂಡಿಕೆ ಕಂಪನಿಗೆ ದಿಕ್ಸೂಚಿಯಾಗಲಿದೆ.
ಈ ಹೂಡಿಕೆಯ ಹಿಂದಿನ ಹಣಕಾಸಿನ ವಿನ್ಯಾಸವನ್ನು ಗಮನಿಸಿದರೆ, ಜಾಗತಿಕ ಮಟ್ಟದ ಪ್ರಮುಖ ಹೂಡಿಕೆದಾದರು ಈ ಬೆಂಗಳೂರು ಮೂಲದ ಕಂಪನಿಯ ತಂತ್ರಜ್ಞಾನ ಮತ್ತು ದೂರದೃಷ್ಟಿಯ ಮೇಲೆ ಅಪಾರ ನಂಬಿಕೆ ಇಟ್ಟಿರುವುದು ಸ್ಪಷ್ಟವಾಗಿ ಕಾಣುತ್ತದೆ. ಪ್ರಮುಖವಾಗಿ, ಪಿಕ್ಸೆಲ್ಸ್ಕೈ ಕ್ಯಾಪಿಟಲ್ ನೇತೃತ್ವದಲ್ಲಿ ನಡೆದ ಈಕ್ವಿಟಿ ಹೂಡಿಕೆ ಸುತ್ತಿನಲ್ಲಿ ಸ್ಪೆಕ್ಟ್ರಮ್ ಇಂಪ್ಯಾಕ್ಟ್ ಫ್ಯಾಮಿಲಿ ಆಫೀಸ್ ಸೇರಿದಂತೆ ಹಲವು ಪ್ರಮುಖರು ಭಾಗಿಯಾಗಿದ್ದು, ಒಟ್ಟು 125 ಕೋಟಿ ರೂಪಾಯಿಗಳ ಈಕ್ವಿಟಿ ಹೂಡಿಕೆಯನ್ನು ಮಾಡಿದ್ದಾರೆ.
ಕಂಪನಿಯ ಹೆಮ್ಮೆಯ ಯೋಜನಾ ಅಭಿವೃದ್ಧಿ ವೇದಿಕೆಯಾದ ‘ಆರ್ಯ’ ಕೂಡ ಜಾಗತಿಕ ಹೂಡಿಕೆದಾರರನ್ನು ಆಕರ್ಷಿಸುವಲ್ಲಿ ಯಶಸ್ವಿಯಾಗಿದೆ. ಪ್ರಮುಖ ಕೊರಿಯನ್ ಸಮೂಹ ಸಂಸ್ಥೆಯೊಂದರಿಂದ ‘ಆರ್ಯ’ ವೇದಿಕೆಗೆ ಬರೋಬ್ಬರಿ 200 ಕೋಟಿ ರೂಪಾಯಿಗಳ ಹೂಡಿಕೆ ಲಭಿಸಿದೆ. ಇದರ ಜೊತೆಗೆ, ಜಾಗತಿಕ ದೈತ್ಯ ಸಂಸ್ಥೆಯಾದ ಸೊಜಿಟ್ಜ್ ಕಾರ್ಪೊರೇಷನ್ ಹಾಗೂ ಭಾರತದ ಹೆಮ್ಮೆಯ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಸಹಭಾಗಿತ್ವದಲ್ಲಿ ಕಂಪನಿಯು ಈಗಾಗಲೇ 310 ಕೋಟಿ ರೂಪಾಯಿಗಳ ಬಂಡವಾಳವನ್ನು ಕ್ರೋಢೀಕರಿಸಿಕೊಂಡಿದ್ದು, ಇವೆಲ್ಲವೂ ಸೇರಿ ಕಂಪನಿಯ ಒಟ್ಟು ಬಂಡವಾಳದ ಮೌಲ್ಯವನ್ನು 635 ಕೋಟಿ ರೂಪಾಯಿಗಳಿಗೆ ಹೆಚ್ಚಿಸಿದೆ.
ಈ ಐತಿಹಾಸಿಕ ಮೈಲಿಗಲ್ಲಿನ ಕುರಿತು ಹರ್ಷ ವ್ಯಕ್ತಪಡಿಸಿರುವ ಜಿಪಿಎಸ್ ರಿನ್ಯೂವಬಲ್ಸ್ ಸಂಸ್ಥೆಯ ಸಹ-ಸ್ಥಾಪಕ ಹಾಗೂ ಸಿಇಒ ಮೇನಾಕ್ ಚಕ್ರಬರ್ತಿ ಅವರು, ಈ ಹೂಡಿಕೆಯು ಕೇವಲ ಒಂದು ಕಂಪನಿಯ ಬೆಳವಣಿಗೆಯಲ್ಲ, ಬದಲಿಗೆ ನವೀಕರಿಸಬಹುದಾದ ನೈಸರ್ಗಿಕ ಅನಿಲ ಕ್ಷೇತ್ರದ ಮೇಲಿನ ಹೂಡಿಕೆದಾರರ ಅಚಲ ವಿಶ್ವಾಸಕ್ಕೆ ಹಿಡಿದ ಕೈಗನ್ನಡಿಯಾಗಿದೆ ಎಂದು ಹೆಮ್ಮೆಯಿಂದ ಹೇಳಿದ್ದಾರೆ. ಅಷ್ಟೇ ಅಲ್ಲದೆ, ಭಾರತದಲ್ಲಿ ಅತ್ಯಾಧುನಿಕ ಹಾಗೂ ಶುದ್ಧ ಇಂಧನ ಮೂಲಸೌಕರ್ಯಗಳನ್ನು ನಿರ್ಮಿಸುವ ಮೂಲಕ ದೇಶದ ಹಸಿರು ಭವಿಷ್ಯಕ್ಕೆ ಕಂಪನಿ ಸದಾ ಬದ್ಧವಾಗಿರುತ್ತದೆ ಎಂಬ ಭರವಸೆಯನ್ನೂ ನೀಡಿದ್ದಾರೆ.
