✍️ ವರದಿ: ರವಿ ಸಿ. ವಿಜಾಪೂರ | ಜಾಣರಗುರು | ಸಂಯುಕ್ತ ಕರ್ನಾಟಕ
ಸ್ಕೊಲಾಸ್ಟಿಕ್ ಆಪ್ಟಿಟ್ಯೂಡ್ ಟೆಸ್ಟ್ (SAT) ಗೆ ತಯಾರಿ ನಡೆಸುತ್ತಿರುವ ವಿದ್ಯಾರ್ಥಿಗಳಿಗೆ ಗೂಗಲ್ ಮಹತ್ವದ ನೆರವು ನೀಡಿದ್ದು, ಜೆಮಿನಿ (Gemini) ಅಪ್ಲಿಕೇಶನ್ ಮೂಲಕ ಉಚಿತ ಪೂರ್ಣಾವಧಿಯ ಅಣಕು ಪರೀಕ್ಷೆಗಳನ್ನು ಆರಂಭಿಸಿದೆ. ಈ ಪರೀಕ್ಷೆಗಳು ಪ್ರಖ್ಯಾತ ಶಿಕ್ಷಣ ಸಂಸ್ಥೆಯಾದ ಪ್ರಿನ್ಸ್ಟನ್ ರಿವ್ಯೂ (The Princeton Review) ಸಹಯೋಗದೊಂದಿಗೆ ರೂಪಿಸಲಾಗಿದೆ.
ವಿದ್ಯಾರ್ಥಿಗಳು ತಮ್ಮ ಅನುಕೂಲಕ್ಕೆ ತಕ್ಕಂತೆ ಯಾವುದೇ ಸಮಯದಲ್ಲಿ ಆನ್ಲೈನ್ನಲ್ಲಿ ಈ ಪರೀಕ್ಷೆಗಳನ್ನು ಬರೆಯಬಹುದು. ಸಂಪೂರ್ಣವಾಗಿ ಉಚಿತವಾಗಿರುವ ಈ ಸೇವೆ, SAT ಗೆ ಸಿದ್ಧರಾಗುತ್ತಿರುವ ವಿದ್ಯಾರ್ಥಿಗಳಿಗೆ ಮಹತ್ತರ ಅವಕಾಶವಾಗಿದೆ.
ಗೂಗಲ್ ತನ್ನ ಅಧಿಕೃತ ಸಾಮಾಜಿಕ ಮಾಧ್ಯಮ ಖಾತೆಯ ಮೂಲಕ ಜೆಮಿನಿ ಅಪ್ಲಿಕೇಶನ್ನಲ್ಲಿ SAT ಗಾಗಿ ಬೇಡಿಕೆಯ ಮೇರೆಗೆ ಅಭ್ಯಾಸ ಪರೀಕ್ಷೆಗಳನ್ನು ಪ್ರಾರಂಭಿಸಿರುವುದಾಗಿ ಘೋಷಿಸಿದೆ. ಈ ಅಣಕು ಪರೀಕ್ಷೆಗಳು ನೈಜ ಪರೀಕ್ಷೆಯ ಮಾದರಿಯನ್ನೇ ಅನುಸರಿಸಿ ರೂಪಿಸಲಾಗಿವೆ.
ತಕ್ಷಣದ ಪ್ರತಿಕ್ರಿಯೆ ವ್ಯವಸ್ಥೆ: ಜೆಮಿನಿಯಲ್ಲಿ ಅಣಕು ಪರೀಕ್ಷೆ ಪೂರ್ಣಗೊಳಿಸಿದ ಬಳಿಕ, ವಿದ್ಯಾರ್ಥಿಗಳಿಗೆ ತಕ್ಷಣದ ವಿಶ್ಲೇಷಣಾತ್ಮಕ ಪ್ರತಿಕ್ರಿಯೆ ದೊರೆಯುತ್ತದೆ.
🔹 ವಿದ್ಯಾರ್ಥಿಗಳು ಯಾವ ವಿಷಯದಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದಾರೆ
🔹 ಯಾವ ಭಾಗದಲ್ಲಿ ಹೆಚ್ಚು ಶ್ರಮ ಬೇಕು
🔹 ದೌರ್ಬಲ್ಯಗಳ ಗುರುತು
🔹 ಸುಧಾರಣೆಗೆ ಬೇಕಾದ ಅಧ್ಯಯನ ಯೋಜನೆ
ಇವೆಲ್ಲವನ್ನೂ ಜೆಮಿನಿ ಸ್ವಯಂಚಾಲಿತವಾಗಿ ವಿಶ್ಲೇಷಿಸಿ ನೀಡುತ್ತದೆ. ವಿದ್ಯಾರ್ಥಿಗಳು ಸರಿಯಾದ ಉತ್ತರಗಳ ವಿವರಣೆ ಮತ್ತು ತಾರ್ಕಿಕ ಹಿನ್ನೆಲೆಯನ್ನೂ ತಿಳಿದುಕೊಳ್ಳಬಹುದು.
ವಿಷಯವಾರು ಪರೀಕ್ಷಾ ವ್ಯವಸ್ಥೆ: SAT ಅಭ್ಯಾಸ ಪರೀಕ್ಷೆ ಆರಂಭಿಸಲು ಜೆಮಿನಿಗೆ ಸೂಚನೆ ನೀಡಿದ ನಂತರ, ವಿದ್ಯಾರ್ಥಿಗಳಿಗೆ ಮೂರು ಪ್ರಮುಖ ವಿಭಾಗಗಳು ಲಭ್ಯವಾಗುತ್ತವೆ. ಓದುವಿಕೆ, ಬರವಣಿಗೆ, ಗಣಿತ ಹೀಗೆ ವಿದ್ಯಾರ್ಥಿಗಳು ಆಯ್ಕೆಮಾಡಿದ ವಿಷಯದ ಮೇಲೆ ಕ್ಲಿಕ್ ಮಾಡಿದರೆ, ಸಂಪೂರ್ಣ ಪರೀಕ್ಷಾ ಪತ್ರಿಕೆ ತೆರೆದುಕೊಳ್ಳುತ್ತದೆ. ಪ್ರಿನ್ಸ್ಟನ್ ರಿವ್ಯೂ ಸಂಸ್ಥೆ 1400ಕ್ಕೂ ಹೆಚ್ಚು ಕೋರ್ಸ್ಗಳಿಗೆ ಸಂಬಂಧಿಸಿದ ಮಾಕ್ ಟೆಸ್ಟ್ಗಳನ್ನೂ ಒದಗಿಸುತ್ತಿದೆ.
SAT ತಯಾರಿ ಇನ್ನು ಹೆಚ್ಚು ಚುರುಕು: ಈ ಅಣಕು ಪರೀಕ್ಷೆಗಳು ನೈಜ ಪರೀಕ್ಷೆಯ ಅನುಭವವನ್ನು ನೀಡುತ್ತವೆ. ಪ್ರಶ್ನೆಗಳ ಸ್ವರೂಪ, ಸಮಯ ನಿರ್ವಹಣೆ ಮತ್ತು ಒತ್ತಡದ ಪರಿಸ್ಥಿತಿಯನ್ನು ಅನುಕರಿಸುವ ಮೂಲಕ ವಿದ್ಯಾರ್ಥಿಗಳ ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತವೆ. ಪರೀಕ್ಷೆ ನಂತರ ಲಭ್ಯವಾಗುವ ವಿಶ್ಲೇಷಣೆ ವಿದ್ಯಾರ್ಥಿಗಳಿಗೆ ತಮ್ಮ ದೌರ್ಬಲ್ಯಗಳನ್ನು ಸರಿಪಡಿಸಿಕೊಳ್ಳಲು ನೆರವಾಗುತ್ತದೆ. ಇದರಿಂದ ಪರಿಣಾಮಕಾರಿ ಮತ್ತು ಕೇಂದ್ರೀಕೃತ ಅಧ್ಯಯನ ಸಾಧ್ಯವಾಗುತ್ತದೆ.
ಏನಿದು SAT ಪರೀಕ್ಷೆ?: SAT (Scholastic Assessment Test) ಎಂಬುದು ಕಾಲೇಜು ಮಂಡಳಿಯಿಂದ ಬ್ಲೂಬುಕ್ ಅಪ್ಲಿಕೇಶನ್ ಮೂಲಕ ನಡೆಸಲಾಗುವ ಪದವಿಪೂರ್ವ ಮಟ್ಟದ ಪ್ರಮಾಣಿತ ಪರೀಕ್ಷೆಯಾಗಿದೆ.
🔹 10ರಿಂದ 12ನೇ ತರಗತಿಯ ವಿದ್ಯಾರ್ಥಿಗಳು
🔹 ವಿದೇಶಿ ವಿಶ್ವವಿದ್ಯಾಲಯಗಳಲ್ಲಿ ಪದವಿಪೂರ್ವ ಪ್ರವೇಶ ಬಯಸುವವರು
🔹 ಯುಎಸ್, ಕೆನಡಾ, ಯುಕೆ ಸೇರಿದಂತೆ ಹಲವು ದೇಶಗಳ ವಿದ್ಯಾರ್ಥಿಗಳು ಈ ಪರೀಕ್ಷೆಯನ್ನು ಬರೆಯಬಹುದು.
ಪ್ರಸ್ತುತ ಸುಮಾರು 65 ದೇಶಗಳ 4000ಕ್ಕೂ ಹೆಚ್ಚು ಸಂಸ್ಥೆಗಳು SAT ಅಂಕಗಳನ್ನು ಪ್ರವೇಶಕ್ಕಾಗಿ ಪರಿಗಣಿಸುತ್ತಿವೆ.
ಪರೀಕ್ಷೆಯ ಎರಡು ವಿಭಾಗಗಳು: 1) Reading + Writing (RW), 2) Mathematics ಪ್ರಶ್ನೆಗಳು MCQ ಮತ್ತು Student-Produced Responses ರೂಪದಲ್ಲಿರುತ್ತವೆ.
2026ರ SAT ನೋಂದಣಿ ಆರಂಭ: ಕಾಲೇಜು ಮಂಡಳಿ 2026ರ SAT ಪರೀಕ್ಷಾ ವೇಳಾಪಟ್ಟಿಯನ್ನು ಪ್ರಕಟಿಸಿದೆ.
🔹 ಮಾರ್ಚ್ ಪರೀಕ್ಷೆ – ಫೆಬ್ರವರಿ 17 ಅಂತಿಮ ದಿನ
🔹 ಮೇ ಪರೀಕ್ಷೆ – ಏಪ್ರಿಲ್ 17 ಅಂತಿಮ ದಿನ
🔹 ಜೂನ್ ಪರೀಕ್ಷೆ – ಮೇ 22 ಅಂತಿಮ ದಿನ
ನೋಂದಣಿ: ಅಧಿಕೃತ ಜಾಲತಾಣ https://satsuite.collegeboard.org/ ಮೂಲಕ ನೋಂದಣಿ ಮಾಡಬಹುದಾಗಿದೆ.
JEE ಆಕಾಂಕ್ಷಿಗಳಿಗೆ ಸುವರ್ಣಾವಕಾಶ: ಐಐಟಿ ಪ್ರವೇಶದ ಕನಸು ಕಾಣುತ್ತಿರುವ ವಿದ್ಯಾರ್ಥಿಗಳಿಗೂ ಗೂಗಲ್ ಮಹತ್ವದ ಕೊಡುಗೆ ನೀಡಿದೆ. ಜೆಇಇ ಮುಖ್ಯ ಪರೀಕ್ಷೆಗೆ ಉಚಿತ ಪೂರ್ಣಾವಧಿಯ ಅಣಕು ಪರೀಕ್ಷೆಗಳನ್ನು ಜೆಮಿನಿ ಪ್ಲಾಟ್ಫಾರ್ಮ್ನಲ್ಲಿ ಆರಂಭಿಸಲಾಗಿದೆ. ಇದರಿಂದ ವಿದ್ಯಾರ್ಥಿಗಳು ಪರೀಕ್ಷಾ ಮಾದರಿ ಅರ್ಥಮಾಡಿಕೊಳ್ಳಬಹುದು, ದೌರ್ಬಲ್ಯಗಳನ್ನು ಗುರುತಿಸಬಹುದು, ತಂತ್ರ ರೂಪಿಸಬಹುದು ಮತ್ತು ಕಾರ್ಯಕ್ಷಮತೆ ವಿಶ್ಲೇಷಣೆ ಪಡೆಯಬಹುದಾದ ಲಾಭಗಳಿವೆ.
Careers360 – Physics Wallah ಪಾಲುದಾರಿಕೆ: ಈ ಯೋಜನೆಯನ್ನು ಯಶಸ್ವಿಗೊಳಿಸಲು ಗೂಗಲ್, Careers360 ಹಾಗೂ Physics Wallah ಸಂಸ್ಥೆಗಳೊಂದಿಗೆ ಪಾಲುದಾರಿಕೆ ಮಾಡಿಕೊಂಡಿದೆ. ಇದರ ಮೂಲಕ ಉಚಿತ ಜೆಇಇ ಮಾಕ್ ಟೆಸ್ಟ್ಗಳನ್ನು ವಿದ್ಯಾರ್ಥಿಗಳು ಸುಲಭವಾಗಿ ಬಳಸಿಕೊಳ್ಳಬಹುದು.
