ಭಾರತದ ಸೇನಾ ಬಲದ ಮುಂದೆ ಪಾಕ್ ದುರ್ಬಲ: ಅಮೆರಿಕದ ಮಾಜಿ ಗುಪ್ತಚರ ಅಧಿಕಾರಿ

ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಂಘರ್ಷದ ಬಗ್ಗೆ ಜಗತ್ತಿನಾದ್ಯಂತ ಚರ್ಚೆಗಳು ನಡೆಯುತ್ತಲೇ ಇರುತ್ತವೆ. ಆದರೆ, ಈ ಚರ್ಚೆಗಳಿಗೆ ಹೊಸ ಆಯಾಮ ನೀಡುವಂತಹ ಸ್ಫೋಟಕ ಸತ್ಯವೊಂದನ್ನು ಅಮೆರಿಕದ ಕೇಂದ್ರ ಗುಪ್ತಚರ ಸಂಸ್ಥೆಯ (ಸಿಐಎ) ಮಾಜಿ ಅಧಿಕಾರಿಯೊಬ್ಬರು ಬಹಿರಂಗಪಡಿಸಿದ್ದಾರೆ.

15 ವರ್ಷಗಳ ಕಾಲ ಸಿಐಎಯಲ್ಲಿ ಸೇವೆ ಸಲ್ಲಿಸಿದ್ದ ಜಾನ್ ಕಿರಿಯಾಕೌ ಪ್ರಕಾರ, ಪಾಕಿಸ್ತಾನವು ಸಾಂಪ್ರದಾಯಿಕ ಯುದ್ಧದಲ್ಲಿ ಭಾರತವನ್ನು ಎಂದಿಗೂ ಸೋಲಿಸಲು ಸಾಧ್ಯವಿಲ್ಲ. ಪ್ರತಿ ಬಾರಿ ಯುದ್ಧದ ಕಾರ್ಮೋಡ ಕವಿದಾಗಲೂ ಪಾಕಿಸ್ತಾನದ ಸೋಲು ಖಚಿತ ಎಂಬ ಸತ್ಯವನ್ನು ಅವರು ಅಂಕಿ-ಅಂಶಗಳ ಸಮೇತ ಮುಂದಿಟ್ಟಿದ್ದಾರೆ.

ಭಾರತದೆದುರು ಪಾಕ್ ಸೈನ್ಯ ನಗಣ್ಯ: ಎಎನ್ಐ ಸುದ್ದಿಸಂಸ್ಥೆಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಜಾನ್, “ಭಾರತ ಮತ್ತು ಪಾಕಿಸ್ತಾನದ ನಡುವೆ ಪೂರ್ಣ ಪ್ರಮಾಣದ ಸಾಂಪ್ರದಾಯಿಕ ಯುದ್ಧವಾದರೆ, ಪಾಕಿಸ್ತಾನ ಸೋಲುವುದು ನಿಶ್ಚಿತ. ಅವರ ಸೇನಾ ಸಾಮರ್ಥ್ಯ ಭಾರತದ ಮುಂದೆ ಏನೂ ಅಲ್ಲ. ಇದೇ ಕಾರಣಕ್ಕೆ ಪಾಕಿಸ್ತಾನವು ನೇರ ಯುದ್ಧಕ್ಕೆ ಇಳಿಯುವ ಬದಲು, ಗಡಿಯಾಚೆಗಿನ ಭಯೋತ್ಪಾದನೆಯಂತಹ ಕೃತ್ಯಗಳ ಮೂಲಕ ಭಾರತವನ್ನು ಪ್ರಚೋದಿಸುತ್ತಲೇ ಇರುತ್ತದೆ,” ಎಂದು ಸ್ಪಷ್ಟಪಡಿಸಿದ್ದಾರೆ.

2016ರ ಸರ್ಜಿಕಲ್ ಸ್ಟ್ರೈಕ್, 2019ರ ಬಾಲಾಕೋಟ್ ವೈಮಾನಿಕ ದಾಳಿ, ಹಾಗೂ 2025ರ ಪಹಲ್ಗಾಮ್ ದಾಳಿಗೆ ಪ್ರತಿಯಾಗಿ ಭಾರತ ನಡೆಸಿದ ‘ಆಪರೇಷನ್ ಸಿಂಧೂರ’ದಂತಹ ಕಾರ್ಯಾಚರಣೆಗಳು ಭಾರತದ ಸೇನಾ ಶಕ್ತಿಯನ್ನು ಜಗತ್ತಿಗೆ ತೋರಿಸಿವೆ. ಇಂತಹ ಪ್ರತಿಯೊಂದು ಘಟನೆಯ ನಂತರವೂ ಪಾಕಿಸ್ತಾನವು ತಾನಾಗಿಯೇ ಕದನ ವಿರಾಮಕ್ಕೆ ಮೊರೆ ಹೋಗಿದೆ ಎಂದು ವಿವರಿಸಿದ್ದಾರೆ.

ಪಾಕಿಸ್ತಾನದ ಅಣ್ವಸ್ತ್ರಕ್ಕೆ ಅಮೆರಿಕದ ಕಂಟ್ರೋಲ್?: 2001ರಲ್ಲಿ ಭಾರತದ ಸಂಸತ್ ಮೇಲೆ ನಡೆದ ಭಯೋತ್ಪಾದಕ ದಾಳಿಯ ನಂತರದ ಒಂದು ಆಘಾತಕಾರಿ ಸತ್ಯವನ್ನು ಜಾನ್ ಬಹಿರಂಗಪಡಿಸಿದ್ದಾರೆ. ಆ ಸಮಯದಲ್ಲಿ ಭಾರತವು ‘ಆಪರೇಷನ್ ಪರಾಕ್ರಮ್’ ಮೂಲಕ ದೊಡ್ಡ ಮಟ್ಟದ ಪ್ರತೀಕಾರಕ್ಕೆ ಸಿದ್ಧವಾಗಿತ್ತು. ಯುದ್ಧದ ಭೀತಿಯಿಂದ ನಡುಗಿದ ಪಾಕಿಸ್ತಾನ, ತನ್ನ ನಾಗರಿಕರನ್ನು ಇಸ್ಲಾಮಾಬಾದ್‌ನಿಂದ ಸ್ಥಳಾಂತರಿಸಲು ಆರಂಭಿಸಿತ್ತು.

ಆದರೆ, ತೆರೆಮರೆಯಲ್ಲಿ ನಡೆದಿದ್ದು ಬೇರೆಯೇ ಕಥೆ. ಅಂದಿನ ಪಾಕ್ ಅಧ್ಯಕ್ಷ ಪರ್ವೇಜ್ ಮುಷರಫ್, ತಮ್ಮ ದೇಶದ ಪರಮಾಣು ಶಸ್ತ್ರಾಸ್ತ್ರಗಳ ನಿಯಂತ್ರಣವನ್ನು ಅಮೆರಿಕದ ರಕ್ಷಣಾ ಕೇಂದ್ರವಾದ ಪೆಂಟಗನ್‌ಗೆ ಹಸ್ತಾಂತರಿಸಿದ್ದರು! ಈ ಒಂದು ಘಟನೆಯು, ಬಿಕ್ಕಟ್ಟಿನ ಸಮಯದಲ್ಲಿ ಪಾಕಿಸ್ತಾನದ ಪರಮಾಣು ಬೆದರಿಕೆ ಎಷ್ಟು ಪೊಳ್ಳು ಎಂಬುದನ್ನು ಸಾಬೀತುಪಡಿಸುತ್ತದೆ.

ಸೌದಿಯಿಂದ ಬದುಕುಳಿದಿದ್ದ ಪಾಕ್ ಅಣುಬಾಂಬ್ ಪಿತಾಮಹ!: ಪಾಕಿಸ್ತಾನದ ‘ಅಣುಬಾಂಬ್ ಪಿತಾಮಹ’ ಎಂದೇ ಕುಖ್ಯಾತನಾದ ಅಬ್ದುಲ್ ಖದೀರ್ ಖಾನ್‌ನನ್ನು ಹತ್ಯೆ ಮಾಡಲು ಅಮೆರಿಕ ಸಂಪೂರ್ಣ ಸಿದ್ಧತೆ ನಡೆಸಿತ್ತು.

“ನಾವು ಇಸ್ರೇಲ್ ಸಹಾಯದಿಂದ ಎಕ್ಯೂ ಖಾನ್‌ನನ್ನು ಸುಲಭವಾಗಿ ಮುಗಿಸಬಹುದಿತ್ತು. ಆದರೆ, ಸೌದಿ ಅರೇಬಿಯಾ ಸರ್ಕಾರವು ಮಧ್ಯ ಪ್ರವೇಶಿಸಿ, ‘ದಯವಿಟ್ಟು ಅವನನ್ನು ಬಿಟ್ಟುಬಿಡಿ, ನಾವು ಅವನೊಂದಿಗೆ ಕೆಲಸ ಮಾಡುತ್ತಿದ್ದೇವೆ’ ಎಂದು ಮನವಿ ಮಾಡಿಕೊಂಡಿತು. ಸೌದಿಯ ಒಂದು ಮನವಿ ಅಬ್ದುಲ್ ಖದೀರ್ ಖಾನ್‌ನ ಪ್ರಾಣವನ್ನು ಉಳಿಸಿತು,” ಎಂದು ಜಾನ್ ಕಿರಿಯಾಕೌ ಹೇಳಿದ್ದಾರೆ.

ಈ ಸತ್ಯಗಳನ್ನು ಬಹಿರಂಗಪಡಿಸಲು ಯತ್ನಿಸಿದ್ದಕ್ಕಾಗಿ ತಮ್ಮನ್ನು 23 ತಿಂಗಳು ಜೈಲಿಗೆ ಹಾಕಲಾಗಿತ್ತು ಎಂದು ಹೇಳಿಕೊಂಡಿರುವ ಜಾನ್, “ಸತ್ಯವನ್ನು ಮಾತನಾಡಿದ್ದಕ್ಕೆ ನನಗೆ ಯಾವುದೇ ವಿಷಾದವಿಲ್ಲ,” ಎಂದು ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದಾರೆ.