ಟೆಸ್ಲಾ ಯುಗ ಮುಗೀತು? ಬೆಂಗಳೂರಿನಲ್ಲಿ ಭಾರತದ ಮೊದಲ ಚಾಲಕರಹಿತ ಕಾರು ‘ವಿರಿನ್’!

ಬೆಂಗಳೂರು: ಚಾಲಕರಹಿತ ಕಾರುಗಳೆಂದರೆ ಕೇವಲ ಟೆಸ್ಲಾ, ಗೂಗಲ್‌ನಂತಹ ವಿದೇಶಿ ಕಂಪನಿಗಳ ಹೆಸರುಗಳಷ್ಟೇ ಕೇಳಿಬರುತ್ತಿದ್ದ ಕಾಲ ಮುಗಿಯಿತು. ಇದೀಗ, ತಂತ್ರಜ್ಞಾನದ ರಾಜಧಾನಿ ನಮ್ಮ ಬೆಂಗಳೂರಿನಲ್ಲೇ ಭಾರತದ ಮೊಟ್ಟಮೊದಲ, ಸಂಪೂರ್ಣ ಸ್ವದೇಶಿ ನಿರ್ಮಿತ ಚಾಲಕರಹಿತ ಕಾರು ಅನಾವರಣಗೊಂಡಿದೆ. ಇದು ಕೇವಲ ಒಂದು ವಾಹನವಲ್ಲ, ಬದಲಿಗೆ ಭಾರತದ ತಾಂತ್ರಿಕ ಸಾಮರ್ಥ್ಯಕ್ಕೆ ಹಿಡಿದ ಕೈಗನ್ನಡಿ.

‘ವಿರಿನ್’ ನಮ್ಮ ಹೆಮ್ಮೆಯ ಸಂಕೇತ:ಈ ಕ್ರಾಂತಿಕಾರಿ ಕಾರಿಗೆ ‘ವಿರಿನ್’ (WIRIN) ಎಂದು ಹೆಸರಿಡಲಾಗಿದೆ, ‘ವಿಪ್ರೋ-ಐಐಎಸ್ಸಿ ರಿಸರ್ಚ್ ಆ್ಯಂಡ್ ಇನ್ನೋವೇಷನ್ ನೆಟ್‌ವರ್ಕ್’ ಎಂಬುದರ ಸಂಕ್ಷಿಪ್ತ ರೂಪ. ಈ ಹೆಸರೇ ಹೇಳುವಂತೆ, ಇದು ಭಾರತೀಯ ವಿಜ್ಞಾನ ಸಂಸ್ಥೆ (IISc), ವಿಪ್ರೋ ಮತ್ತು ಆರ್‌ವಿ ಇಂಜಿನಿಯರಿಂಗ್ ಕಾಲೇಜಿನ ಪ್ರತಿಭಾವಂತ ವಿದ್ಯಾರ್ಥಿಗಳು ಹಾಗೂ ತಜ್ಞರ ಸತತ ಪ್ರಯತ್ನದ ಫಲ.

ಅಕ್ಟೋಬರ್ 29ರಂದು ಬೆಂಗಳೂರಿನ ಆರ್‌ವಿ ಇಂಜಿನಿಯರಿಂಗ್ ಕಾಲೇಜಿನ ಆವರಣದಲ್ಲಿ ಈ ಕಾರನ್ನು ಅನಾವರಣಗೊಳಿಸಿದಾಗ, ಅಲ್ಲಿ ನೆರೆದಿದ್ದ ಪ್ರತಿಯೊಬ್ಬರಲ್ಲೂ ಹೆಮ್ಮೆಯ ಭಾವ ಮೂಡಿತ್ತು.

ತಂತ್ರಜ್ಞಾನದ ಹಿಂದೆ ನಮ್ಮವರೇ: ‘ವಿರಿನ್’ ಕಾರಿನ ವಿಶೇಷತೆಯೆಂದರೆ, ಇದರಲ್ಲಿ ಬಳಸಲಾದ ಪ್ರತಿಯೊಂದು ತಂತ್ರಜ್ಞಾನವೂ ಸಂಪೂರ್ಣವಾಗಿ ಭಾರತದಲ್ಲೇ ಅಭಿವೃದ್ಧಿಪಡಿಸಿದ್ದು. ಅತ್ಯಾಧುನಿಕ ಸ್ವಯಂಚಾಲಿತ (Autonomous) ವ್ಯವಸ್ಥೆ, ರೋಬೋಟಿಕ್ಸ್ ತಂತ್ರಜ್ಞಾನ ಮತ್ತು ವೇಗದ ಸಂವಹನಕ್ಕಾಗಿ 5ಜಿ ತಂತ್ರಜ್ಞಾನವನ್ನು ಇದರಲ್ಲಿ ಅಳವಡಿಸಲಾಗಿದೆ.

ಕಾರು ತನ್ನ ಸುತ್ತಮುತ್ತಲಿನ ಪರಿಸರವನ್ನು ಗ್ರಹಿಸಲು ಅತ್ಯಾಧುನಿಕ ಸೆನ್ಸರ್‌ಗಳನ್ನು ಬಳಸುತ್ತದೆ ಮತ್ತು ಯಾವುದೇ ಮಾನವ ಹಸ್ತಕ್ಷೇಪವಿಲ್ಲದೆ ನಿಖರವಾಗಿ ಚಲಿಸುತ್ತದೆ.

ಅನಾವರಣದ ದಿನ, ಆರ್‌ವಿ ಕಾಲೇಜಿನ ಆವರಣದಲ್ಲಿ ಪ್ರಾಯೋಗಿಕ ಚಾಲನೆಗಾಗಿ ವಿಶೇಷವಾಗಿ ನಿರ್ಮಿಸಲಾಗಿದ್ದ ಉಬ್ಬುತಗ್ಗುಗಳ ಹಾದಿಯಲ್ಲಿ ‘ವಿರಿನ್’ ಸರಾಗವಾಗಿ ಸಾಗಿ, ತನಗೆ ನೀಡಲಾಗಿದ್ದ ಮಾರ್ಗಸೂಚಿಗಳನ್ನು ಚಾಚೂತಪ್ಪದೆ ಪಾಲಿಸಿ, ನಿಗದಿತ ಗುರಿಯನ್ನು ತಲುಪಿತು. ಈ ಯಶಸ್ವಿ ಚಾಲನೆಯನ್ನು ಕಣ್ತುಂಬಿಕೊಂಡ ವಿಜ್ಞಾನಿಗಳು ಮತ್ತು ವಿದ್ಯಾರ್ಥಿಗಳ ಕಣ್ಣಲ್ಲಿ ಆನಂದಭಾಷ್ಪವೇ ಹರಿದಿತ್ತು.

ತಂತ್ರಜ್ಞಾನಕ್ಕೆ ಆಧ್ಯಾತ್ಮಿಕ ಸ್ಪರ್ಶ: ಈ ಐತಿಹಾಸಿಕ ಕ್ಷಣಕ್ಕೆ ಉತ್ತರಾದಿಮಠದ ಶ್ರೀ ಸತ್ಯಾತ್ಮತೀರ್ಥ ಸ್ವಾಮೀಜಿಗಳು ಸಾಕ್ಷಿಯಾಗಿ, ಆಶೀರ್ವದಿಸಿದ್ದು ಮತ್ತೊಂದು ವಿಶೇಷ. ದೇಶೀಯ ಪ್ರತಿಭೆಗಳ ಈ ಸಾಧನೆಯನ್ನು ಮನಸಾರೆ ಶ್ಲಾಘಿಸಿದರು ಕಾರಿನ ಮೊದಲ ಪ್ರಯಾಣಿಕರಾಗಿ ಆಸೀನರಾದರು.

ಶ್ರೀಗಳು ತಮ್ಮ ಶಿಷ್ಯರೊಂದಿಗೆ ಕಾರನ್ನೇರಿ ಕ್ಯಾಂಪಸ್‌ನಲ್ಲಿ ಒಂದು ಸುತ್ತು ಬಂದಿದ್ದು, ಈ ಮೂಲಕ ವಿಜ್ಞಾನ ಮತ್ತು ಆಧ್ಯಾತ್ಮದ ಅಪರೂಪದ ಸಂಗಮಕ್ಕೆ ಈ ಕಾರ್ಯಕ್ರಮ ಸಾಕ್ಷಿಯಾಯಿತು.

ಇದು ಕೇವಲ ಒಂದು ಕಾರಿನ ಅನಾವರಣವಲ್ಲ, ಬದಲಿಗೆ ಜಾಗತಿಕ ತಂತ್ರಜ್ಞಾನದ ಭೂಪಟದಲ್ಲಿ ಭಾರತ ತನ್ನ ಛಾಪನ್ನು ಮತ್ತಷ್ಟು ದಟ್ಟವಾಗಿ ಮೂಡಿಸುತ್ತಿರುವುದರ ಸಂಕೇತ. ‘ವಿರಿನ್’ ಮುಂದಿನ ದಿನಗಳಲ್ಲಿ ಭಾರತದ ಸಾರಿಗೆ ವ್ಯವಸ್ಥೆಯಲ್ಲಿ ಹೊಸ ಕ್ರಾಂತಿಗೆ ನಾಂದಿ ಹಾಡುವುದರಲ್ಲಿ ಯಾವುದೇ ಸಂಶಯವಿಲ್ಲ.