Bengaluru Airport:’ಕಲಾಲೋಕ ಮಳಿಗೆ’ ಏನಿದು ‘ಕಲಾಲೋಕ’ದ ಹಿಂದಿನ ಉದ್ದೇಶ? ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ (KIA) ಕಾಲಿಡುತ್ತಿದ್ದಂತೆಯೇ ಇನ್ನು ನಿಮಗೆ ಕರುನಾಡಿನ ಕಲೆ, ಸಂಸ್ಕೃತಿ ಮತ್ತು ಪರಂಪರೆಯ ಶ್ರೀಮಂತಿಕೆಯ ದರ್ಶನವಾಗಲಿದೆ.
ರಾಜ್ಯದ ಹೆಮ್ಮೆಯ ಕರಕುಶಲ ಉತ್ಪನ್ನಗಳನ್ನು ಒಂದೇ ಸೂರಿನಡಿ ಜಾಗತಿಕ ಪ್ರಯಾಣಿಕರಿಗೆ ಪರಿಚಯಿಸುವ ಮಹತ್ವಾಕಾಂಕ್ಷೆಯೊಂದಿಗೆ, ಕರ್ನಾಟಕ ಸರ್ಕಾರವು ವಿಮಾನ ನಿಲ್ದಾಣದ ಟರ್ಮಿನಲ್-2 ರಲ್ಲಿ “ಕಲಾಲೋಕ ಮಳಿಗೆ”ಯನ್ನು ಸ್ಥಾಪಿಸಿದೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಘಂಟಾನಾದದ ಮೂಲಕ ಈ ವಿಶಿಷ್ಟ ಮಳಿಗೆಗೆ ಚಾಲನೆ ನೀಡಿದ್ದಾರೆ.
ಏನಿದು ‘ಕಲಾಲೋಕ’ದ ಹಿಂದಿನ ಉದ್ದೇಶ?: ದೇಶದ ಮೂರನೇ ಅತಿ ಜನನಿಬಿಡ ವಿಮಾನ ನಿಲ್ದಾಣವಾಗಿರುವ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಪ್ರತಿದಿನ ಸಾವಿರಾರು ದೇಶಿ ಮತ್ತು ವಿದೇಶಿ ಪ್ರಯಾಣಿಕರು ಭೇಟಿ ನೀಡುತ್ತಾರೆ.
ಇಲ್ಲಿಂದ ಹೊರಗೆ ಕಾಲಿಡುವ ಮುನ್ನವೇ ಅವರಿಗೆ ಕರ್ನಾಟಕದ ಅಸ್ಮಿತೆಯ ಪರಿಚಯವಾಗಬೇಕು, ನಮ್ಮ ನಾಡಿನ ಕಲಾತ್ಮಕ ಶ್ರೀಮಂತಿಕೆಯ ಅನುಭವ ಸಿಗಬೇಕು ಎಂಬುದು ‘ಕಲಾಲೋಕ’ದ ಪ್ರಮುಖ ಉದ್ದೇಶ. ಈ ಮಳಿಗೆಯು ಕೇವಲ ಒಂದು ಮಾರಾಟ ಕೇಂದ್ರವಲ್ಲ, ಬದಲಾಗಿ ಕರ್ನಾಟಕದ ಹೆಮ್ಮೆಯ ಉತ್ಪನ್ನಗಳಿಗೆ ಜಾಗತಿಕ ಮಟ್ಟದಲ್ಲಿ ಪ್ರಚಾರ, ಬ್ರ್ಯಾಂಡಿಂಗ್ ಮತ್ತು ಮಾರುಕಟ್ಟೆ ಒದಗಿಸುವ ಒಂದು ವೇದಿಕೆಯಾಗಿದೆ.
‘ಕಲಾಲೋಕ’ದಲ್ಲಿ ಏನೆಲ್ಲಾ ಲಭ್ಯ?: ಈ ‘ಕಲಾಲೋಕ’ದೊಳಗೆ ಕಾಲಿಟ್ಟರೆ, ನಿಮ್ಮ ಕಣ್ಣಿಗೆ ಬೀಳುವುದೇ ಕರ್ನಾಟಕದ ಹೆಮ್ಮೆಯ ಉತ್ಪನ್ನಗಳ ದೃಶ್ಯಕಾವ್ಯ. ಇಲ್ಲಿ ಜಗತ್ಪ್ರಸಿದ್ಧ ಚನ್ನಪಟ್ಟಣದ ಬಣ್ಣಬಣ್ಣದ ಆಟಿಕೆಗಳು, ಕಣ್ಣು ಕೋರೈಸುವ ಮೈಸೂರು ಸಿಲ್ಕ್ ಸೀರೆಗಳು, ನೈಪುಣ್ಯತೆಯ ಪ್ರತೀಕವಾದ ಇಳಕಲ್ ಸೀರೆಗಳು, ಮತ್ತು ಸಂಸ್ಕೃತಿಯನ್ನು ಬಿಂಬಿಸುವ ಲಂಬಾಣಿ ಕಸೂತಿ ಕಲಾಕೃತಿಗಳು ನಿಮ್ಮನ್ನು ಸ್ವಾಗತಿಸುತ್ತವೆ.
ಅಷ್ಟೇ ಅಲ್ಲ, ಭೌಗೋಳಿಕ ಮಾನ್ಯತೆ (GI Tag) ಪಡೆದ ರಾಜ್ಯದ ವಿಶಿಷ್ಟ ಉತ್ಪನ್ನಗಳಾದ ಮೈಸೂರು ಸ್ಯಾಂಡಲ್ ಸೋಪ್, ಪರಿಮಳ ಬೀರುವ ಶ್ರೀಗಂಧದ ಕೆತ್ತನೆಗಳು, ಸುಂದರವಾದ ರೋಸ್‌ವುಡ್ ಕಲಾಕೃತಿಗಳು, ಚರ್ಮದ ಉತ್ಪನ್ನಗಳು ಮತ್ತು ಕರ್ನಾಟಕದ ಅಪ್ಪಟ ಕಾಫಿ ಪುಡಿ ಕೂಡ ಇಲ್ಲಿ ಲಭ್ಯವಿದೆ. ಒಟ್ಟಿನಲ್ಲಿ, ಕರ್ನಾಟಕದ ಅನನ್ಯ ಸೊಬಗನ್ನು ಒಂದೇ ಸೂರಿನಡಿ ಕಣ್ತುಂಬಿಕೊಳ್ಳುವ ಮತ್ತು ಖರೀದಿಸುವ ಅವಕಾಶವನ್ನು ಈ ಮಳಿಗೆ ಕಲ್ಪಿಸಿದೆ.
ಕುಶಲಕರ್ಮಿಗಳಿಗೆ ಹೊಸ ಭರವಸೆ: ಈ ಮಳಿಗೆಯ ಸ್ಥಾಪನೆಯು ಕೇವಲ ವ್ಯಾಪಾರದ ದೃಷ್ಟಿಯಿಂದ ಮಾತ್ರವಲ್ಲ, ರಾಜ್ಯದ ಸಾವಿರಾರು ಕರಕುಶಲಕರ್ಮಿಗಳು ಮತ್ತು ನೇಕಾರರ ಬದುಕಿನಲ್ಲಿ ಹೊಸ ಬೆಳಕು ಚೆಲ್ಲುವ ಮಹತ್ವದ ಹೆಜ್ಜೆಯಾಗಿದೆ. ತಮ್ಮ ಉತ್ಪನ್ನಗಳಿಗೆ ಮಾರುಕಟ್ಟೆ ಸಿಗದೆ ಕಷ್ಟಪಡುತ್ತಿದ್ದ ಕಲಾವಿದರಿಗೆ ‘ಕಲಾಲೋಕ’ ಒಂದು ದೊಡ್ಡ ವೇದಿಕೆಯನ್ನು ಒದಗಿಸಲಿದ್ದು, ಅವರ ಕಲೆಗೆ ಅಂತರಾಷ್ಟ್ರೀಯ ಮನ್ನಣೆ ದೊರಕಿಸಿಕೊಡುವಲ್ಲಿ ಪ್ರಮುಖ ಪಾತ್ರ ವಹಿಸಲಿದೆ ಎಂದು ನಿರೀಕ್ಷಿಸಲಾಗಿದೆ.
