Namm Metro: ಸಿಲಿಕಾನ್ ಸಿಟಿಯ ಜೀವನಾಡಿಯಾಗಿರುವ ‘ನಮ್ಮ ಮೆಟ್ರೋ’, ತನ್ನ ವೇಗ ಮತ್ತು ದಕ್ಷತೆಯಿಂದಲೇ ಜನಪ್ರಿಯವಾಗಿದೆ. ಆದರೆ, ಇತ್ತೀಚಿನ ದಿನಗಳಲ್ಲಿ ಮೆಟ್ರೋ ನಿಲ್ದಾಣಗಳಲ್ಲಿ ಹಳಿಗೆ ಜಿಗಿದು ಆತ್ಮಹತ್ಯೆ ಮಾಡಿಕೊಳ್ಳುವ ಅಥವಾ ಹಳಿಗೆ ಇಳಿಯುವ ಘಟನೆಗಳು ಹೆಚ್ಚಾಗುತ್ತಿರುವುದು ಆತಂಕಕ್ಕೆ ಕಾರಣವಾಗಿತ್ತು.
ಪ್ರಯಾಣಿಕರ ಸುರಕ್ಷತೆಯೇ ನಮ್ಮ ಆದ್ಯತೆ ಎಂದು ಸಾರಿದ್ದ ಬಿಎಂಆರ್‌ಸಿಎಲ್ (BMRCL), ಇದೀಗ ಅಂತಹ ಅವಘಡಗಳಿಗೆ ಶಾಶ್ವತ ಪರಿಹಾರ ನೀಡಲು ಮುಂದಾಗಿದೆ. ಮೆಟ್ರೋ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಎಂ.ಜಿ.ರಸ್ತೆ ನಿಲ್ದಾಣದಲ್ಲಿ ಅತ್ಯಾಧುನಿಕ ‘ಪ್ಲಾಟ್‌ಫಾರ್ಮ್ ಸ್ಕ್ರೀನ್ ಡೋರ್’ (PSD) ವ್ಯವಸ್ಥೆಯನ್ನು ಅಳವಡಿಸಲು ಸಜ್ಜಾಗಿದೆ.
ಏನಿದು ಪಿಎಸ್‌ಡಿ (PSD) ವ್ಯವಸ್ಥೆ?: ದೆಹಲಿ, ಚೆನ್ನೈ ಮತ್ತು ಮುಂಬೈ ಮೆಟ್ರೋಗಳಲ್ಲಿ ಈಗಾಗಲೇ ಬಳಕೆಯಲ್ಲಿರುವ ಈ ಪ್ಲಾಟ್‌ಫಾರ್ಮ್ ಸ್ಕ್ರೀನ್ ಡೋರ್ ವ್ಯವಸ್ಥೆಯು ಪ್ರಯಾಣಿಕರ ಸುರಕ್ಷತೆಗೆ ವರದಾನವಾಗಿದೆ. ಮೆಟ್ರೋ ಪ್ಲಾಟ್‌ಫಾರ್ಮ್ ಮತ್ತು ರೈಲು ಹಳಿಗಳ ನಡುವೆ ಕಾಂಪೌಂಡ್ ರೀತಿಯಲ್ಲಿ ಗಾಜಿನ ಅಥವಾ ಫೈಬರ್ ಗೋಡೆ ನಿರ್ಮಿಸಿ, ಅದಕ್ಕೆ ಸ್ವಯಂಚಾಲಿತ ಬಾಗಿಲುಗಳನ್ನು ಅಳವಡಿಸಲಾಗುತ್ತದೆ.
ಮೆಟ್ರೋ ರೈಲು ಬಂದು ನಿಂತಾಗ ಮಾತ್ರ ಈ ಬಾಗಿಲುಗಳು ರೈಲಿನ ಬಾಗಿಲಿನ ಜೊತೆಜೊತೆಗೆ ತೆರೆದುಕೊಳ್ಳುತ್ತವೆ. ರೈಲು ಹೊರಟ ಬಳಿಕ ಇವು ಮುಚ್ಚಿರುತ್ತವೆ. ಇದರಿಂದ ಯಾರೂ ಆಕಸ್ಮಿಕವಾಗಿ ಹಳಿಗೆ ಬೀಳಲು ಅಥವಾ ಬೇಕಂತಲೇ ಹಳಿಗೆ ಜಿಗಿಯಲು ಸಾಧ್ಯವಿರುವುದಿಲ್ಲ.
ಹಳದಿ ಹೋಯ್ತು, ಗುಲಾಬಿ ಬಂತು!: ವಾಸ್ತವವಾಗಿ, ಬಿಎಂಆರ್‌ಸಿಎಲ್ ಎರಡು ವರ್ಷಗಳ ಹಿಂದೆಯೇ ಹಳದಿ ಮಾರ್ಗದ (ಆರ್.ವಿ. ರಸ್ತೆ – ಬೊಮ್ಮಸಂದ್ರ) ಕೋನಪ್ಪನ ಅಗ್ರಹಾರ ನಿಲ್ದಾಣದಲ್ಲಿ ಈ ವ್ಯವಸ್ಥೆಯನ್ನು ಜಾರಿಗೆ ತರುವುದಾಗಿ ಹೇಳಿತ್ತು. ಆದರೆ ಕಾರಣಾಂತರಗಳಿಂದ ಅದು ಸಾಧ್ಯವಾಗಿಲ್ಲ.
ಇದೀಗ ಗುಲಾಬಿ ಮಾರ್ಗಕ್ಕೆ (Pink Line) ಈ ಹೈಟೆಕ್ ಸ್ಪರ್ಶ ನೀಡಲು ನಿರ್ಧರಿಸಲಾಗಿದೆ. ಕಾಳೇನ ಅಗ್ರಹಾರದಿಂದ ನಾಗವಾರದವರೆಗೆ ನಿರ್ಮಾಣವಾಗುತ್ತಿರುವ ಗುಲಾಬಿ ಮಾರ್ಗವು ಎಂ.ಜಿ.ರಸ್ತೆಯಲ್ಲಿ ನೇರಳೆ ಮಾರ್ಗವನ್ನು ಸಂಧಿಸಲಿದೆ. ಹೀಗಾಗಿ ಎಂ.ಜಿ.ರಸ್ತೆಯ ಭೂಗತ ನಿಲ್ದಾಣದಲ್ಲಿ ಜನದಟ್ಟಣೆ ಹೆಚ್ಚುವ ಸಾಧ್ಯತೆಯಿರುವುದರಿಂದ ಇಲ್ಲಿಯೇ ಮೊದಲ ಪಿಎಸ್‌ಡಿ ಅಳವಡಿಕೆಗೆ ಮುಹೂರ್ತ ನಿಗದಿಪಡಿಸಲಾಗಿದೆ.
ಚೀನಾ ಕಂಪನಿಗೆ ಗುತ್ತಿಗೆ, ಸುರಕ್ಷತೆಯೇ ಹೊಣೆ: ಎಂ.ಜಿ. ರಸ್ತೆ ನಿಲ್ದಾಣದಲ್ಲಿ ಈ ವ್ಯವಸ್ಥೆಯನ್ನು ಅಳವಡಿಸುವ ಗುತ್ತಿಗೆಯನ್ನು ಚೀನಾ ಮೂಲದ ಸಂಸ್ಥೆಯೊಂದು ಪಡೆದುಕೊಂಡಿದೆ. ಮೆಜೆಸ್ಟಿಕ್ ನಿಲ್ದಾಣದಲ್ಲಿ ನೂಕುನುಗ್ಗಲು ತಡೆಯಲು ಸ್ಟೀಲ್ ಬ್ಯಾರಿಕೇಡ್ ಹಾಕಲಾಗಿರುವುದನ್ನು ನಾವು ನೋಡಿದ್ದೇವೆ.
ಆದರೆ ಪಿಎಸ್‌ಡಿ ಅದಕ್ಕಿಂತಲೂ ಉನ್ನತ ಮಟ್ಟದ ತಂತ್ರಜ್ಞಾನವಾಗಿದೆ. ಇದು ಕೇವಲ ಆತ್ಮಹತ್ಯೆ ತಡೆಯುವುದಲ್ಲದೆ, ಭೂಗತ ನಿಲ್ದಾಣಗಳಲ್ಲಿ ಹವಾನಿಯಂತ್ರಣ (AC) ವ್ಯವಸ್ಥೆಯು ಹೆಚ್ಚು ಪರಿಣಾಮಕಾರಿಯಾಗಿ ಕೆಲಸ ಮಾಡಲು ನೆರವಾಗುತ್ತದೆ, ತನ್ಮೂಲಕ ವಿದ್ಯುತ್ ಉಳಿತಾಯಕ್ಕೂ ದಾರಿಯಾಗುತ್ತದೆ.
ಯಾವಾಗ ಕಾರ್ಯಾರಂಭ?: ಸದ್ಯ ಎಂ.ಜಿ.ರಸ್ತೆಯಲ್ಲಿ ಪ್ರಾಯೋಗಿಕವಾಗಿ ಈ ಬಾಗಿಲುಗಳನ್ನು ಅಳವಡಿಸಲಾಗುತ್ತದೆ. ಇದರ ಕಾರ್ಯಕ್ಷಮತೆಯನ್ನು ನೋಡಿಕೊಂಡು, ಗುಲಾಬಿ ಮಾರ್ಗದ ಉಳಿದ 12 ಭೂಗತ ನಿಲ್ದಾಣಗಳಿಗೂ ಇದನ್ನು ವಿಸ್ತರಿಸಲು ಬಿಎಂಆರ್‌ಸಿಎಲ್ ಪ್ಲಾನ್ ಮಾಡಿದೆ.
ಇನ್ನು ಕಾಳೇನ ಅಗ್ರಹಾರದಿಂದ ನಾಗವಾರದವರೆಗಿನ 21 ಕಿ.ಮೀ. ಉದ್ದದ ಪಿಂಕ್ ಲೈನ್ ಕಾಮಗಾರಿ ಭರದಿಂದ ಸಾಗಿದ್ದು, 2026ರ ಮೇ ವೇಳೆಗೆ ಎತ್ತರಿಸಿದ ಮಾರ್ಗ ಹಾಗೂ ಡಿಸೆಂಬರ್ ವೇಳೆಗೆ ಸಂಪೂರ್ಣ ಮಾರ್ಗ ಸಾರ್ವಜನಿಕರಿಗೆ ಮುಕ್ತವಾಗುವ ನಿರೀಕ್ಷೆಯಿದೆ.
