King Kohli: ಭಾರತೀಯ ಕ್ರಿಕೆಟ್‌ನ ರನ್ ಯಂತ್ರ ಎಂದೇ ಖ್ಯಾತರಾದ ವಿರಾಟ್ ಕೊಹ್ಲಿ, ನವೆಂಬರ್ 5, 2025ರಂದು ತಮ್ಮ 37ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿದ್ದಾರೆ. ದೆಹಲಿಯ ಬೀದಿಗಳಿಂದ ವಿಶ್ವ ಕ್ರಿಕೆಟ್‌ನ ರಾಜನಾಗಿ ಬೆಳೆದ ಪಯಣ ರೋಚಕ.
ಚೀಕು ಎಂಬ ಮುದ್ದಿನ ಹೆಸರಿನಿಂದ ಕಿಂಗ್ ಕೊಹ್ಲಿ ಎನಿಸಿಕೊಳ್ಳುವವರೆಗೆ ಸಾಗಿದ ದಾರಿ, ಸ್ಥಿರತೆ, ಬದ್ಧತೆ ಮತ್ತು ಆಕ್ರಮಣಕಾರಿ ಆಟಕ್ಕೆ ಸಮಾನಾರ್ಥಕವಾಗಿದೆ. ಸದ್ಯ ಟೆಸ್ಟ್ ಹಾಗೂ ಟಿ20 ಮಾದರಿಗಳಿಗೆ ವಿದಾಯ ಹೇಳಿ, ಏಕದಿನ ಕ್ರಿಕೆಟ್‌ನಲ್ಲಿ ಮಾತ್ರ ತಮ್ಮ ಆಟವನ್ನು ಮುಂದುವರಿಸಿರುವ ಕೊಹ್ಲಿಯ ಪ್ರತಿಯೊಂದು ಪಂದ್ಯವೂ ಅಭಿಮಾನಿಗಳಿಗೆ ಹಬ್ಬದೂಟವಾಗಿದೆ. ಈ ವಿಶೇಷ ದಿನದಂದು, ಕ್ರಿಕೆಟ್ ಲೋಕದಲ್ಲಿ ಕೊಹ್ಲಿ ಸ್ಥಾಪಿಸಿರುವ ಮೈಲಿಗಲ್ಲುಗಳತ್ತ ಒಂದು ನೋಟ ಇಲ್ಲಿದೆ.
ದಾಖಲೆಗಳ ಸರದಾರ: ಕೊಹ್ಲಿ ತಮ್ಮ ವೃತ್ತಿಜೀವನದಲ್ಲಿ ನಿರ್ಮಿಸಿರುವ ದಾಖಲೆಗಳಿಗೆ ಲೆಕ್ಕವಿಲ್ಲ. ಅವರೊಬ್ಬ ರನ್ ಸರದಾರ ಎಂಬುದಕ್ಕೆ ಅಂಕಿಅಂಶಗಳೇ ಸಾಕ್ಷಿ.
ಏಕದಿನ ಶತಕಗಳ ಸಾಮ್ರಾಟ: ಏಕದಿನ ಕ್ರಿಕೆಟ್‌ನಲ್ಲಿ 51 ಶತಕಗಳನ್ನು ಬಾರಿಸಿರುವ ವಿರಾಟ್, ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಅವರ 49 ಶತಕಗಳ ದಾಖಲೆಯನ್ನು ಮುರಿದು, ಈ ಮಾದರಿಯಲ್ಲಿ ಸಾರ್ವಕಾಲಿಕ ಶ್ರೇಷ್ಠ ಎನಿಸಿಕೊಂಡಿದ್ದಾರೆ.
ವೇಗದ ರನ್ ಗಳಿಕೆ: ಏಕದಿನ ಕ್ರಿಕೆಟ್‌ನಲ್ಲಿ ಅತ್ಯಂತ ವೇಗವಾಗಿ 10 ಸಾವಿರ ರನ್‌ಗಳನ್ನು (ಕೇವಲ 205 ಇನ್ನಿಂಗ್ಸ್‌ಗಳಲ್ಲಿ) ಪೂರೈಸಿದ ಆಟಗಾರ ಎಂಬ ಹೆಗ್ಗಳಿಕೆ ಅವರದ್ದು. ಅಷ್ಟೇ ಅಲ್ಲ, ಅಂತರಾಷ್ಟ್ರೀಯ ಕ್ರಿಕೆಟ್‌ನ ಮೂರೂ ಮಾದರಿಗಳಿಂದ ಕೇವಲ 594 ಇನ್ನಿಂಗ್ಸ್‌ಗಳಲ್ಲಿ 27 ಸಾವಿರ ರನ್ ಗಳಿಸಿದ ವೇಗದ ಆಟಗಾರ ಕೂಡ ಹೌದು.
ಟೆಸ್ಟ್‌ನಲ್ಲಿ ದ್ವಿಶತಕಗಳ ರೂವಾರಿ: ಟೆಸ್ಟ್ ಕ್ರಿಕೆಟ್‌ನಲ್ಲಿ ನಾಯಕನಾಗಿ ಅತಿ ಹೆಚ್ಚು (7) ದ್ವಿಶತಕಗಳನ್ನು ಬಾರಿಸಿದ ಏಕೈಕ ಭಾರತೀಯ ಆಟಗಾರ ಎಂಬ ದಾಖಲೆ ಕೊಹ್ಲಿ ಹೆಸರಿನಲ್ಲಿದೆ.
ಐಪಿಎಲ್ ಕಿಂಗ್: 2016ರ ಐಪಿಎಲ್ ಆವೃತ್ತಿಯಲ್ಲಿ 973 ರನ್ ಗಳಿಸುವ ಮೂಲಕ, ಒಂದೇ ಸೀಸನ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರ ಎಂಬ ಅಳಿಸಲಾಗದ ದಾಖಲೆ ನಿರ್ಮಿಸಿದ್ದಾರೆ.
ನಾಯಕತ್ವ ಮತ್ತು ಪ್ರಶಸ್ತಿಗಳು: ಬ್ಯಾಟಿಂಗ್ ಜೊತೆಗೆ ನಾಯಕತ್ವದಲ್ಲೂ ಕೊಹ್ಲಿ ತಮ್ಮ ಛಾಪು ಮೂಡಿಸಿದ್ದಾರೆ. ಅವರ ನಾಯಕತ್ವದಲ್ಲಿ ಭಾರತ ತಂಡವು ಸತತ ಒಂಬತ್ತು ಟೆಸ್ಟ್ ಸರಣಿಗಳನ್ನು ಗೆದ್ದು, ರಿಕಿ ಪಾಂಟಿಂಗ್ ವಿಶ್ವದಾಖಲೆಯನ್ನು ಸರಿಗಟ್ಟಿತು. ವಿದೇಶಿ ನೆಲದಲ್ಲಿ ಆಸ್ಟ್ರೇಲಿಯಾ, ಇಂಗ್ಲೆಂಡ್ ಮತ್ತು ದಕ್ಷಿಣ ಆಫ್ರಿಕಾಗಳಂತಹ ಬಲಿಷ್ಠ ತಂಡಗಳ ವಿರುದ್ಧ ಟೆಸ್ಟ್ ಸರಣಿಗಳನ್ನು ಗೆದ್ದ ಅತ್ಯಂತ ಯಶಸ್ವಿ ಭಾರತೀಯ ನಾಯಕ ಎಂಬ ಕೀರ್ತಿ ಅವರಿಗಿದೆ.
ಅವರ ಈ ಅಮೋಘ ಸಾಧನೆಗೆ ಸಂದ ಗೌರವಗಳು ಹಲವು. ಭಾರತ ಸರ್ಕಾರದ ಪ್ರತಿಷ್ಠಿತ ಅರ್ಜುನ ಪ್ರಶಸ್ತಿ, ಪದ್ಮಶ್ರೀ ಮತ್ತು ಮೇಜರ್ ಧ್ಯಾನ್ ಚಂದ್ ಖೇಲ್ ರತ್ನ ಪ್ರಶಸ್ತಿಗಳಿಗೆ ಅವರು ಭಾಜನರಾಗಿದ್ದಾರೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ, ಐಸಿಸಿಯ ದಶಕದ ಆಟಗಾರ (2011-2020), ವರ್ಷದ ಕ್ರಿಕೆಟಿಗ (2017, 2018), ಮತ್ತು ವರ್ಷದ ಏಕದಿನ ಆಟಗಾರ (2012, 2017, 2018, 2023) ಸೇರಿದಂತೆ ಹತ್ತು ಬಾರಿ ಐಸಿಸಿ ಪ್ರಶಸ್ತಿಗಳನ್ನು ಗೆದ್ದ ಏಕೈಕ ಆಟಗಾರರಾಗಿದ್ದಾರೆ.
ಗೆದ್ದ ಪ್ರಮುಖ ಟೂರ್ನಿಗಳು: ಕೊಹ್ಲಿಯವರ ವೈಯಕ್ತಿಕ ಸಾಧನೆಗಳು ತಂಡದ ಗೆಲುವಿಗೂ ಕಾರಣವಾಗಿವೆ. ಅವರು ಭಾಗವಹಿಸಿದ ತಂಡಗಳು ಗೆದ್ದ ಕೆಲವು ಪ್ರಮುಖ ಟೂರ್ನಿಗಳು.
2008ರ 19 ವರ್ಷದೊಳಗಿನವರ ವಿಶ್ವಕಪ್
2011ರ ಐಸಿಸಿ ಏಕದಿನ ವಿಶ್ವಕಪ್
2013 ಮತ್ತು 2025ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿ
2024ರ ಐಸಿಸಿ ಟಿ20 ವಿಶ್ವಕಪ್
2010, 2016, 2023ರ ಏಷ್ಯಾ ಕಪ್
ಕೊಹ್ಲಿ ಕೇವಲ ದಾಖಲೆಗಳ ಸರದಾರನಲ್ಲ, ಅವರು ತಮ್ಮ ಫಿಟ್‌ನೆಸ್, ಆಕ್ರಮಣಕಾರಿ ಮನೋಭಾವ ಮತ್ತು ಗೆಲ್ಲುವ ಛಲದಿಂದಾಗಿ ಕೋಟ್ಯಂತರ ಯುವಕರಿಗೆ ಸ್ಫೂರ್ತಿಯಾಗಿದ್ದಾರೆ. ಅವರ ಕ್ರಿಕೆಟ್ ಪಯಣ ಇನ್ನೂ ಮುಂದುವರಿದಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ಮೈಲಿಗಲ್ಲುಗಳನ್ನು ಸ್ಥಾಪಿಸಲಿ ಎಂದು ಹಾರೈಸೋಣ.
