ಹುಬ್ಬಳ್ಳಿ: ಮುಂಗಾರು ಮಳೆಯ ಆರ್ಭಟ ಹೆಚ್ಚಾಗಿದೆ. ಹಳ್ಳ, ನದಿಗಳು ತುಂಬಿ ಹರಿಯುತ್ತಿದೆ. ಪ್ರವಾಸಿ ತಾಣಗಳನ್ನು ನೋಡಲು ಪ್ರತಿದಿನ ನೂರಾರು ಪ್ರವಾಸಿಗರು ಜನರು ತೆರಳುತ್ತಿದ್ದಾರೆ. ಧಾರವಾಡದಿಂದ ಮೌಳಂಗಿ ಫಾಲ್ಸ್‌, ಗೋಕಾಕ್‌ ಫಾಲ್ಸ್‌, ಜೋಗಕ್ಕೆ ತೆರಳುವ ಪ್ರವಾಸಿಗರ ಅನುಕೂಲಕ್ಕಾಗಿ ವಿಶೇಷ ಟೂರ್ ಪ್ಯಾಕೇಜ್ ವ್ಯವಸ್ಥೆ ಮಾಡಲಾಗಿದೆ.
ವಾಯುವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಧಾರವಾಡ ವಿಭಾಗ ಧಾರವಾಡದಿಂದ ಜಲಧಾರೆಗಳನ್ನು ನೋಡಲು ಹೋಗುವ ಪ್ರವಾಸಿಗರಿಗೆ ಅನುಕೂಲ ಮಾಡಿಕೊಡಲು ವಿಶೇಷ ಟೂರ್ ಪ್ಯಾಕೇಜ್‌ಗಳನ್ನು ಘೋಷಣೆ ಮಾಡಿದೆ. ಪ್ರವಾಸಿಗರು ಈ ಪ್ಯಾಕೇಜ್‌ಗಳ ಉಪಯೋಗ ಪಡೆದುಕೊಳ್ಳಬೇಕು ಎಂದು ಕರೆ ನೀಡಲಾಗಿದೆ.
ಪ್ರತಿ ಭಾನುವಾರ ಮತ್ತು ರಜೆ ದಿನಗಳಂದು ಈ ಪ್ರವಾಸಿ ಟೂರ್ ಪ್ಯಾಕೇಜ್ ಲಭ್ಯವಿದೆ. 13/7/2025ರಿಂದ ಈ ಪ್ರವಾಸಿ ಟೂರ್ ಪ್ಯಾಕೇಜ್ ಪ್ರಾರಂಭವಾಗಲಿದೆ. ವೇಗದೂತ ಸಾರಿಗೆಯನ್ನು ಈ ಪ್ಯಾಕೇಜ್‌ಗೆ ಬಳಕೆ ಮಾಡಿಕೊಳ್ಳಲಾಗುತ್ತದೆ.
ಉಚಿತ ಪ್ರಯಾಣಕ್ಕೆ ಅವಕಾಶವಿಲ್ಲ: ಈ ಪ್ಯಾಕೇಜ್ ಟೂರ್ ಅನ್ನು ದಿನಾಂಕ 13/07/2025 ರಿಂದ ಪ್ರಾರಂಭಿಸಲಿದೆ. ಇದು ವಿಶೇಷ ಬಸ್ ಆದ ಕಾರಣ ‘ಶಕ್ತಿ’ ಯೋಜನೆಯಡಿ ಮಹಿಳಾ ಪ್ರಯಾಣಿಕರಿಗೆ ಉಚಿತ ಪ್ರಯಾಣಕ್ಕೆ ಅವಕಾಶ ಇರುವುದಿಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ.
ಧಾರವಾಡ-ಉಳವಿ ದೇವಸ್ಥಾನ: ವಾಯುವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಧಾರವಾಡ ವಿಭಾಗ ಧಾರವಾಡ-ಉಳವಿ ದೇವಸ್ಥಾನ ಟೂರ್ ಪ್ಯಾಕೇಜ್ ಅನ್ನು ದಿನಾಂಕ 13/07/2025 ರಿಂದ ಪ್ರಾರಂಭಿಸಲಿದೆ. ಬೆಳಗ್ಗೆ 7.30ಕ್ಕೆ ಧಾರವಾಡದಿಂದ ಹೊರಟು ದಾಂಡೇಲಿ ಮೊಸಳೆ ಪಾರ್ಕ್‌, ಮೌಳಂಗಿ ಫಾಲ್ಸ್‌, ಕೂಳಗಿ ನೇಚರ್‌ ಪಾರ್ಕ್‌, ಉಳವಿ ದೇವಸ್ಥಾನ ತಲುಪಲಿದೆ. ಉಳವಿಯಿಂದ ಸಂಜೆ ನಾಲ್ಕು ಗಂಟೆಗೆ ಹೊರಡುವ ಬಸ್, ಧಾರವಾಡಕ್ಕೆ 7 ಗಂಟೆಗೆ ತಲುಪಲಿದೆ. ಈ ಪ್ರವಾಸಿ ಪ್ಯಾಕೇಜ್ ಬಸ್ ಪ್ರಯಾಣ ದರ ವಯಸ್ಕರರಿಗೆ 400 ರೂ., ಮಕ್ಕಳಿಗೆ 200 ರೂ. (ಹೋಗಿ ಬರುವ ಸೇರಿ) ಆಗಿದೆ.
ಧಾರವಾಡ-ಹಿಡಕಲ್ ಡ್ಯಾಮ್: ವಾಯುವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಧಾರವಾಡ ವಿಭಾಗ ಧಾರವಾಡ-ಹಿಡಕಲ್ ಡ್ಯಾಮ್ ಟೂರ್ ಪ್ಯಾಕೇಜ್ ಅನ್ನು ದಿನಾಂಕ 13/07/2025 ರಿಂದ ಪ್ರಾರಂಭಿಸಲಿದೆ. ಬೆಳಗ್ಗೆ 7.30ಕ್ಕೆ ಧಾರವಾಡದಿಂದ ಹೊರಟು ನವಿಲ ತೀರ್ಥ ಡ್ಯಾಮ್, ಸೊಗಲ ಕ್ಷೇತ್ರ, ಗೋಕಾಕ್‌ ಫಾಲ್ಸ್‌, ಹಿಡಕಲ್ ಡ್ಯಾಮ್‌ಗೆ ಸಂಜೆ 3.30ಕ್ಕೆ ತಲುಪಲಿದೆ. ಹಿಡಕಲ್ ಡ್ಯಾಮ್‌ನಿಂದ ಸಂಜೆ ನಾಲ್ಕು ಗಂಟೆಗೆ ಹೊರಡುವ ಬಸ್, ಧಾರವಾಡಕ್ಕೆ 7 ಗಂಟೆಗೆ ತಲುಪಲಿದೆ. ಈ ಪ್ರವಾಸಿ ಪ್ಯಾಕೇಜ್ ಬಸ್ ಪ್ರಯಾಣ ದರ ವಯಸ್ಕರರಿಗೆ 430 ರೂ., ಮಕ್ಕಳಿಗೆ 215 ರೂ. (ಹೋಗಿ ಬರುವ ಸೇರಿ) ಆಗಿದೆ.
ಧಾರವಾಡ-ಜೋಗ ಪ್ಯಾಕೇಜ್: ಪ್ರತಿ ಭಾನುವಾರ ಮತ್ತು ರಜಾ ದಿನಗಳಂದು ಧಾರವಾಡದಿಂದ ಈ ಪ್ರವಾಸಿ ಪ್ಯಾಕೇಜ್ ಬಸ್ ಹೊರಡಲಿದೆ. ಧಾರವಾಡದಿಂದ ಬೆಳಗ್ಗೆ 7.15ಕ್ಕೆ ಹೊರಡುವ ಬಸ್ ಶಿರಸಿಯ ಶ್ರೀ ಮಾರಿಕಾಂಬಾ ದೇವಿಯ ದರ್ಶನ ಮಾಡಿಸಿಕೊಂಡು ಜೋಗ ಫಾಲ್ಸ್‌ಗೆ ಸಂಚಾರವನ್ನು ನಡೆಸುತ್ತದೆ. ಈ ಪ್ರವಾಸಿ ಪ್ಯಾಕೇಜ್ ಬಸ್ ಪ್ರಯಾಣ ದರ ವಯಸ್ಕರರಿಗೆ 650 ರೂ., ಮಕ್ಕಳಿಗೆ 325 ರೂ. (ಹೋಗಿ ಬರುವ ಸೇರಿ) ಆಗಿದೆ.
ಪ್ರವಾಸಿ ಪ್ಯಾಕೇಜ್ ಕುರಿತು ಹೆಚ್ಚಿನ ಮಾಹಿತಿಗಾಗಿ 7760991679 ಸಂಖ್ಯೆಗೆ ಕರೆ ಮಾಡಬಹುದು. ಇಲ್ಲವೇ ಆನ್‌ಲೈನ್ ಮೂಲಕ ಟಿಕೆಟ್ ಬುಕ್ ಮಾಡಲು www.ksrtc.in ವೆಬ್‌ ಸೈಟ್‌ಗೆ ಭೇಟಿ ನೀಡಬಹುದು.
