ಬೆಂಗಳೂರು: ಬಹುನಿರೀಕ್ಷಿತ ದುಲೀಪ್ ಟ್ರೋಫಿ ದೇಶೀಯ ಕ್ರಿಕೆಟ್ ಟೂರ್ನಿಯಲ್ಲಿ ಕೇಂದ್ರ ವಲಯ ತಂಡವು 11 ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ ಪ್ರಶಸ್ತಿಯನ್ನು ಗೆದ್ದುಕೊಂಡಿದೆ.
ಬೆಂಗಳೂರಿನ ಪ್ರತಿಷ್ಠಿತ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದ ಮೈದಾನದಲ್ಲಿ ನಡೆದ ರೋಚಕ ಫೈನಲ್ ಪಂದ್ಯದಲ್ಲಿ ದಕ್ಷಿಣ ವಲಯವನ್ನು ಆರು ವಿಕೆಟ್‌ಗಳಿಂದ ಮಣಿಸಿ ಕೇಂದ್ರ ವಲಯ ವಿಜಯ ಪತಾಕೆ ಹಾರಿಸಿತು.
ಮೊಹಮ್ಮದ್ ಅಜರುದ್ದೀನ್ ನಾಯಕತ್ವದ ದಕ್ಷಿಣ ವಲಯ ತಂಡವು ಮೊದಲ ಇನ್ನಿಂಗ್ಸ್‌ನಲ್ಲಿ ಕೇವಲ 149 ರನ್‌ಗಳಿಗೆ ಆಲೌಟ್ ಆಗುವ ಮೂಲಕ ಸಂಕಷ್ಟಕ್ಕೆ ಸಿಲುಕಿತು. ಕೇಂದ್ರ ವಲಯದ ಬೌಲರ್‌ಗಳಾದ ಸಾರಾಂಶ್ ಜೈನ್ ಐದು ಮತ್ತು ಕುಮಾರ್ ಕಾರ್ತಿಕೇಯ ನಾಲ್ಕು ವಿಕೆಟ್‌ಗಳನ್ನು ಕಬಳಿಸಿ ದಕ್ಷಿಣ ವಲಯಕ್ಕೆ ದೊಡ್ಡ ಆಘಾತ ನೀಡಿದರು.
ಇದಕ್ಕೆ ಪ್ರತಿಯಾಗಿ, ರಜತ್ ಪಾಟೀದಾರ್ ನಾಯಕತ್ವದ ಕೇಂದ್ರ ವಲಯ ತಂಡವು ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ ಭರ್ಜರಿ 511 ರನ್ ಕಲೆಹಾಕಿ ಬೃಹತ್ ಮುನ್ನಡೆ ಪಡೆಯಿತು. ಯಶ್ ರಾಥೋಡ್ (194 ರನ್) ಮತ್ತು ನಾಯಕ ರಜತ್ ಪಾಟೀದಾರ್ (101 ರನ್) ಸಿಡಿಸಿದ ಅಮೋಘ ಶತಕಗಳು ತಂಡಕ್ಕೆ 362 ರನ್‌ಗಳ ಬೃಹತ್ ಮುನ್ನಡೆಯನ್ನು ತಂದುಕೊಟ್ಟವು.
ದಕ್ಷಿಣ ವಲಯದ ಹೋರಾಟ: ಬೃಹತ್ ಹಿನ್ನಡೆ ಅನುಭವಿಸಿದರೂ, ದಕ್ಷಿಣ ವಲಯವು ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ದಿಟ್ಟ ಹೋರಾಟ ನೀಡಿ 426 ರನ್ ಗಳಿಸಿತು. ಅಂಕಿತ್ ಶರ್ಮಾ (99), ಆ್ಯಂಡ್ರೆ ಸಿದ್ದಾರ್ಥ್ ಅಜೇಯ 84, ಮತ್ತು ಸ್ಮರಣ್ ರವಿಚಂದ್ರನ್ 67, ಉತ್ತಮ ಆಟವು ತಂಡಕ್ಕೆ ಗೌರವಾನ್ವಿತ ಮೊತ್ತವನ್ನು ತಂದುಕೊಟ್ಟಿತು. ಗೆಲುವಿಗೆ ಕೇವಲ 65 ರನ್‌ಗಳ ಸಣ್ಣ ಗುರಿ ಪಡೆದ ಕೇಂದ್ರ ವಲಯ, ಅಂತಿಮ ದಿನದಾಟದಲ್ಲಿ ನಾಲ್ಕು ವಿಕೆಟ್ ನಷ್ಟಕ್ಕೆ ಗುರಿ ತಲುಪಿ ಚಾಂಪಿಯನ್ ಪಟ್ಟ ಅಲಂಕರಿಸಿತು.
ಪಂದ್ಯಶ್ರೇಷ್ಠ ಪ್ರಶಸ್ತಿ: ಕೇಂದ್ರ ವಲಯದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ ಯಶ್ ರಾಥೋಡ್ ಅವರ ಅಮೋಘ ಬ್ಯಾಟಿಂಗ್ ಪ್ರದರ್ಶನಕ್ಕೆ ಪಂದ್ಯಶ್ರೇಷ್ಠ ಪ್ರಶಸ್ತಿ ನೀಡಿ ಗೌರವಿಸಲಾಯಿತು. ಅವರ 194 ರನ್‌ಗಳ ಇನ್ನಿಂಗ್ಸ್ ಪಂದ್ಯದ ಗತಿಯನ್ನೇ ಬದಲಿಸಿತು. ಸುದೀರ್ಘ 11 ವರ್ಷಗಳ ನಂತರ ದುಲೀಪ್ ಟ್ರೋಫಿ ಗೆದ್ದಿರುವ ಕೇಂದ್ರ ವಲಯ ತಂಡವು ದೇಶೀಯ ಕ್ರಿಕೆಟ್‌ನಲ್ಲಿ ಮತ್ತೆ ತನ್ನ ಸಾಮರ್ಥ್ಯವನ್ನು ಸಾಬೀತುಪಡಿಸಿದೆ. ಈ ವಿಜಯವು ತಂಡಕ್ಕೆ ಮತ್ತು ಅಭಿಮಾನಿಗಳಿಗೆ ಹೊಸ ಹುಮ್ಮಸ್ಸನ್ನು ನೀಡಿದೆ.
