ಗುಬ್ಬಿಮರಿ ಎಂಬ ಸಿನಿಮಾ ಬಿಡುಗಡೆಗೆ ಸಿದ್ಧವಾಗಿದೆ. ಇದು ಮಕ್ಕಳ ಚಿತ್ರವೇ. ಆದರೆ ಮಕ್ಕಳಷ್ಟೇ ನೋಡುವಂಥ ಚಿತ್ರವಲ್ಲ. ಹಿರಿಯರೂ ಇದನ್ನು ನೋಡಿ ಕಲಿಯುವಂತ ಸಾಕಷ್ಟು ಅಂಶ ಸಿನಿಮಾದಲ್ಲಿದೆ' ಎಂದರು ನಿರ್ದೇಶಕ ಮಧು ಡಕಣಾಚಾರ್. ಅವರ ನಿರ್ದೇಶನದ ಗುಬ್ಬಿಮರಿ ಚಿತ್ರದ ಪತ್ರಿಕಾ ಗೋಷ್ಠಿಯಲ್ಲಿ ಅವರು ಈ ಅನಿಸಿಕೆ ಹಂಚಿಕೊಂಡರು. ಇದೇ ವೇಳೆ ಈ ಚಿತ್ರದ ಟ್ರೇಲರ್ ಸಹ ರಿಲೀಸ್ ಮಾಡಲಾಯ್ತು. ತಾಯಿಯಾಗಿ, ಹೆಂಡತಿಯಾಗಿ ಎಲ್ಲರೂ ಹೆಣ್ಣನ್ನು ಪೂಜಿಸುತ್ತಾರೆ. ಆದರೆ ಅದೇ ಮಗುವಿನ ವಿಷಯದಲ್ಲಿ ಹೆಣ್ಣಿನ ಬಗ್ಗೆ ತಾತ್ಸಾರವಿದೆ. ಅದು ತಪ್ಪು. ಹೆಣ್ಣು ಭ್ರೂಣ ಹತ್ಯೆ ಎಂಥ ಘೋರ ಎಂಬುದನ್ನು ಈ ಸಿನಿಮಾದಲ್ಲಿ ಅನಾವರಣ ಮಾಡುವ ಪ್ರಯತ್ನ ಮಾಡಿದ್ದೇನೆ’ ಎಂದರು ಡಕಣಾಚಾರ್. ಆನಂದ ಬಾಬು, ಡಾ.ನಿಶ್ಚಿತಾ ಈ ಚಿತ್ರದ ನಿರ್ಮಾಪಕರು. ಎ.ಟಿ.ರವೀಶ್ ಸಿನಿಮಾಗೆ ಸಂಗೀತ ನೀಡಿದ್ದು, ಶೀಘ್ರವೇ ಈ ಚಿತ್ರವನ್ನು ತೆರೆ ಕಾಣಿಸುವ ಪ್ರಯತ್ನದಲ್ಲಿರುವುದಾಗಿ ಹೇಳಿದರು ನಿರ್ಮಾಪಕರು.
ಮಾಸ್ಟರ್ ಚಿನ್ಮಯ್, ಮಾ. ಸಂಜಯ್, ಸಿಂಧು, ಕಾಮಿಡಿ ಕಿಲಾಡಿಗಳು ಸಂತು, ಮಂಗಳಮುಖಿ ಪ್ರಿಯಾಂಕಾ ಸೇರಿದಂತೆ ಅನೇಕರು ಗುಬ್ಬಿಮರಿ ಸಿನಿಮಾದ ತಾರಾಬಳಗ. ದೀಪು ಮತ್ತು ಸಿದ್ದು ಈ ಚಿತ್ರದ ಸಿನಿಮಾಟೋಗ್ರಾಫರ್ ಆಗಿ ಕೆಲಸ ಮಾಡಿದ್ದಾರೆ. ಸುಂದರ್ ಈ ಚಿತ್ರದ ಚಿತ್ರಕಥೆ ಮತ್ತು ಸಂಭಾಷಣೆ ರಚಿಸಿದ್ದಾರೆ.
