ನವದೆಹಲಿ: ಕ್ಯೂಎಸ್ ವಿಶ್ವವಿದ್ಯಾಲಯಗಳ ಶ್ರೇಯಾಂಕವನ್ನು ಪ್ರಕಟಿಸಲಾಗಿದ್ದು, ಇದೇ ಮೊದಲ ಬಾರಿಗೆ ಭಾರತದ 54 ಉನ್ನತ ಶಿಕ್ಷಣ ಸಂಸ್ಥೆಗಳು ಸ್ಥಾನ ಪಡೆದಿವೆ.
ಘೋಷಿಸಲಾದ ಶ್ರೇಯಾಂಕಗಳ ಪ್ರಕಾರ, ದೆಹಲಿಯ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಐಐಟಿ), 2026 ರ ಕ್ಯೂಎಸ್ ವರ್ಲ್ಡ್ ಯೂನಿವರ್ಸಿಟಿ ಶ್ರೇಯಾಂಕದಲ್ಲಿ 123 ನೇ ಸ್ಥಾನಕ್ಕೆ ಏರುವ ಮೂಲಕ ಅತ್ಯುತ್ತಮ ಶ್ರೇಯಾಂಕ ಪಡೆದ ಭಾರತೀಯ ಸಂಸ್ಥೆಯಾಗಿದೆ, ದೇಶದ 54 ವಿಶ್ವವಿದ್ಯಾಲಯಗಳು ಮತ್ತು ಸಂಸ್ಥೆಗಳು ಈ ಪ್ರತಿಷ್ಠಿತ ಪಟ್ಟಿಯಲ್ಲಿ ಸ್ಥಾನ ಪಡೆದಿವೆ. ದೆಹಲಿ ಐಐಟಿ ಒಟ್ಟು 27 ಸ್ಥಾನಗಳ ಏರಿಕೆಯನ್ನು ಈ ಬಾರಿ ದಾಖಲಿಸಿದೆ. ಲಂಡನ್ ಮೂಲದ ಜಾಗತಿಕ ಉನ್ನತ ಶಿಕ್ಷಣ ವಿಶ್ಲೇಷಣಾ ಸಂಸ್ಥೆ ಕ್ವಾಕ್ವೆರೆಲ್ಲಿ ಸೈಮಂಡ್ಸ್ ವಾರ್ಷಿಕವಾಗಿ ಪ್ರಕಟಿಸುವ ಕ್ಯೂಎಸ್ ವರ್ಲ್ಡ್ ಯೂನಿವರ್ಸಿಟಿ ಶ್ರೇಯಾಂಕಗಳು, ಶೈಕ್ಷಣಿಕ ಖ್ಯಾತಿ, ಅಧ್ಯಾಪಕ-ವಿದ್ಯಾರ್ಥಿ ಅನುಪಾತ, ಸಂಶೋಧನಾ ಪರಿಣಾಮ, ಅಂತರರಾಷ್ಟ್ರೀಯ ವಿದ್ಯಾರ್ಥಿ ವೈವಿಧ್ಯತೆ ಮತ್ತು ಪದವೀಧರ ಉದ್ಯೋಗಾವಕಾಶ ಸೇರಿದಂತೆ ವಿವಿಧ ಕಾರ್ಯಕ್ಷಮತೆ ಸೂಚಕಗಳ ಆಧಾರದ ಮೇಲೆ ವಿಶ್ವವಿದ್ಯಾಲಯಗಳನ್ನು ನಿರ್ಣಯಿಸುತ್ತವೆ. ಈ ವರ್ಷ ಶ್ರೇಯಾಂಕಕ್ಕೆ ಎಂಟು ಹೊಸ ಸಂಸ್ಥೆಗಳನ್ನು ಸೇರಿಸುವುದರೊಂದಿಗೆ, ಭಾರತವು ಈಗ 54 ಸಂಸ್ಥೆಗಳನ್ನು ಒಳಗೊಂಡಿದೆ, ಇದು ಯುಎಸ್ (192 ಸಂಸ್ಥೆಗಳು), ಯುಕೆ (90 ಸಂಸ್ಥೆಗಳು) ಮತ್ತು ಮೇನ್‌ಲ್ಯಾಂಡ್ ಚೀನಾ (72 ಸಂಸ್ಥೆಗಳು) ನಂತರ ನಾಲ್ಕನೇ ಹೆಚ್ಚು ಪ್ರತಿನಿಧಿಸುವ ದೇಶವಾಗಿದೆ. ಐಐಟಿ ಬಾಂಬೆ ಹಾಗೂ ಐಐಟಿ ಮದ್ರಾಸ್ ಗಳು ಅತ್ಯುತ್ತಮ 200 ಶಿಕ್ಷಣ ಸಂಸ್ಥೆಗಳ ಪೈಕಿ ಗುರುತಿಸಿಕೊಂಡಿವೆ. ಅತ್ಯುತ್ತಮ 500 ವಿಶ್ವವಿದ್ಯಾಲಯಗಳ ಪೈಕಿ ಐಐಟಿ ಖರಗ್ ಪುರ, ಐಐಎಸ್ ಸಿ ಬೆಂಗಳೂರು, ಐಐಟಿ ಕಾನ್ಪುರ, ದೆಹಲಿ ವಿಶ್ವವಿದ್ಯಾಲಯ ಹಾಗೂ ಅಣ್ಣಾ ವಿಶ್ವವಿದ್ಯಾಲಯಗಳು ಸಹ ಸ್ಥಾನ ಪಡೆದುಕೊಂಡಿವೆ. ಜಗತ್ತಿನ ಒಟ್ಟಾರೆ 1 ಸಾವಿರದ 500 ಉನ್ನತ ವಿಶ್ವವಿದ್ಯಾಲಯಗಳನ್ನು ಈ ಶ್ರೇಯಾಂಕದಲ್ಲಿ ಪರಿಗಣಿಸಲಾಗಿದ್ದು, ಅಮೆರಿಕದ ಕೇಂಬ್ರಿಜ್ ನಲ್ಲಿರುವ ಮೆಸಾಚುಸೆಟ್ಸ್ ಇನ್ ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಎಂದಿನಂತೆ ಮೊದಲ ಸ್ಥಾನಗಳಿಸಿದೆ.
