ಬೆಂಗಳೂರು ಸಿಲಿಕಾನ್ ಸಿಟಿ ಎಂದೇ ಖ್ಯಾತಿ ಪಡೆದಿದ್ದರೂ, ಅದರ ರಸ್ತೆಗಳ ಗುಣಮಟ್ಟದ ಕುರಿತು ನಿರಂತರ ಚರ್ಚೆಗಳು ನಡೆಯುತ್ತಲೇ ಇವೆ. ವಿಶೇಷವಾಗಿ ಮಳೆಗಾಲದಲ್ಲಿ ರಸ್ತೆಗುಂಡಿಗಳು ಹೆಚ್ಚಾಗಿ, ವಾಹನ ಸವಾರರಿಗೆ ನರಕ ದರ್ಶನವಾಗುತ್ತದೆ. ಇದೀಗ, ವರ್ತೂರು-ಗಂಜೂರು ರಸ್ತೆಯ ಸ್ಥಿತಿಯ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ಒಂದು ಪೋಸ್ಟ್, ಈ ಸಮಸ್ಯೆಯನ್ನು ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ.
ಸಾಮಾನ್ಯವಾಗಿ ರಸ್ತೆಗಳಲ್ಲಿ 98% ರಸ್ತೆ ಇದ್ದು, ಕೇವಲ 2% ಮಾತ್ರ ಗುಂಡಿಗಳಿರುತ್ತವೆ. ಆದರೆ, ವರ್ತೂರು-ಗಂಜೂರು ರಸ್ತೆಯ ಚಿತ್ರವನ್ನು ಹಂಚಿಕೊಂಡಿರುವ ಸಾರ್ವಜನಿಕರೊಬ್ಬರು, ಇಲ್ಲಿ 98% ಗುಂಡಿಗಳಿದ್ದು, ಕೇವಲ 2% ಮಾತ್ರ ರಸ್ತೆ ಇದೆ ಎಂದು ವ್ಯಂಗ್ಯ ಮಾಡಿದ್ದಾರೆ. ಈ ರಸ್ತೆಯ ಸ್ಥಿತಿಯನ್ನು ನೋಡಿದರೆ, ಇದು ರಸ್ತೆಯಲ್ಲ, ಕೆರೆ ಎಂದು ಅನಿಸುತ್ತದೆ ಎಂದು ಹೇಳಿದ್ದಾರೆ. ಗ್ರೇಟರ್ ಬೆಂಗಳೂರಿನ ಅಧಿಕೃತ ಖಾತೆಯನ್ನು ಟ್ಯಾಗ್ ಮಾಡಿ, ಈ ರಸ್ತೆಯನ್ನು ಗುಂಡಿಮುಕ್ತಗೊಳಿಸುವಂತೆ ಮನವಿ ಮಾಡಿದ್ದಾರೆ.
ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ, ನೆಟ್ಟಿಗರು ಇದಕ್ಕೆ ತಮಾಷೆಯಾಗಿ ಪ್ರತಿಕ್ರಿಯಿಸಿದ್ದಾರೆ. ಕೆಲವರು, “ಬೆಂಗಳೂರಿನಲ್ಲಿ ಇನ್ನು ಮುಂದೆ ಕಾರುಗಳ ಬದಲು ಬೋಟ್‌ಗಳನ್ನು ಬಳಸಬೇಕಾಗಬಹುದು” ಎಂದು ಹೇಳಿದ್ದಾರೆ. ಇನ್ನು ಕೆಲವರು, “ಇದು ಅಂತರಾಷ್ಟ್ರೀಯ ಜಲ ಹೆದ್ದಾರಿ. ಇಲ್ಲಿ ಕಾರುಗಳು ಬೋಟ್‌ಗಳಂತೆ ಬದಲಾಗುತ್ತವೆ, ಹೆಲ್ಮೆಟ್‌ಗಳನ್ನು ಲೈಫ್ ಜಾಕೆಟ್‌ಗಳಿಂದ ಬದಲಾಯಿಸಬೇಕಾಗುತ್ತದೆ ಮತ್ತು ಗೂಗಲ್ ನಕ್ಷೆಗಳು ‘500 ಮೀಟರ್‌ಗಳಷ್ಟು ನೇರವಾಗಿ ಈಜುವುದನ್ನು ಮುಂದುವರಿಸಿ’ ಎಂದು ಸಲಹೆ ನೀಡುತ್ತವೆ” ಎಂದು ಹಾಸ್ಯ ಮಾಡಿದ್ದಾರೆ.
ರಸ್ತೆಗುಂಡಿಗಳ ಸಮಸ್ಯೆಯು ಬೆಂಗಳೂರಿನಲ್ಲಿ ಹೊಸದೇನಲ್ಲ. ಪ್ರತಿ ಮಳೆಗಾಲದಲ್ಲೂ ಈ ಸಮಸ್ಯೆ ಉಲ್ಬಣಗೊಳ್ಳುತ್ತದೆ. ಉತ್ತಮ ರಸ್ತೆಗಳು ನಗರದ ಅಭಿವೃದ್ಧಿಗೆ ಅತ್ಯಗತ್ಯ. ಆದರೆ, ಬೆಂಗಳೂರಿನ ರಸ್ತೆಗಳ ಸ್ಥಿತಿಯನ್ನು ನೋಡಿದರೆ, ಅದು ಅಭಿವೃದ್ಧಿಯತ್ತ ಸಾಗಿದೆಯೋ ಅಥವಾ ಹಿಮ್ಮುಖವಾಗಿ ಚಲಿಸುತ್ತಿದೆಯೋ ಎಂಬ ಪ್ರಶ್ನೆ ಮೂಡುತ್ತದೆ.
ಈ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳುವುದು ಬಹಳ ಮುಖ್ಯ. ಅಧಿಕಾರಿಗಳು ಈ ಬಗ್ಗೆ ಗಂಭೀರವಾಗಿ ಪರಿಗಣಿಸಿ, ರಸ್ತೆಗುಂಡಿಗಳನ್ನು ಮುಚ್ಚಿ, ಉತ್ತಮ ಗುಣಮಟ್ಟದ ರಸ್ತೆಗಳನ್ನು ನಿರ್ಮಿಸಬೇಕು. ಇಲ್ಲವಾದರೆ, ಮುಂದೊಂದು ದಿನ ಬೆಂಗಳೂರಿನ ರಸ್ತೆಗಳಲ್ಲಿ ಬೋಟ್‌ಗಳನ್ನು ಓಡಿಸಬೇಕಾದ ಪರಿಸ್ಥಿತಿ ಬಂದರೆ ಆಶ್ಚರ್ಯವಿಲ್ಲ ಎನ್ನುತಿದ್ದಾರೆ ನೆಟ್ಟಿಗರು.
