ಬೆಳಗಾವಿ: ಚೆನ್ನಮ್ಮ ವೃತ್ತದಲ್ಲಿ ಕಾಲಿಡಲೂ ಜಾಗವಿಲ್ಲದಷ್ಟು ಜನದಟ್ಟಣೆ, ಎಲ್ಲರಲ್ಲಿಯೂ ರಾಜ್ಯೋತ್ಸವದ ಗುಂಗು, ಹಾಡಿನ ತಾಳಕ್ಕೆ ತಕ್ಕಂತೆ ಕುಣಿದು ಕುಪ್ಪಳಿಸುತ್ತಿರುವ ಜನಸ್ತೋಮದಿಂದ ಅನತಿ ದೂರದಲ್ಲಿ ಅಂದರೆ ಗಣಪತಿ ದೇವಾಲಯದ ಎದುರು ಎಲ್ಲರ ಕಣ್ಮುಂದೆಯೇ ಬಾಲಕಿಯೊಬ್ಬಳ ಮೇಲೆ ಕಾಮುಕರ ತಂಡ ಎರಗಿ ಆಕೆಯ ಅತ್ಯಾಚಾರಕ್ಕೆ ಯತ್ನಿಸುತ್ತದೆ.
ಈ ದೃಶ್ಯವನ್ನು ಕಂಡು ನೆರೆದವರು ಅಚ್ಚರಿಗೊಂಡರೂ ಯಾರೂ ಬಿಡಿಸಲು ಮುಂದಾಗುವುದಿಲ್ಲ.
ಅಷ್ಟರಲ್ಲಿ ಅಲ್ಲಿಗೆ ಬಂದ ಯುವತಿಯರಿಬ್ಬರು ಕಾಮುಕರಿಂದ ಈ ಬಾಲಕಿಯನ್ನು ಕಾಮುಕರಿಂದ ರಕ್ಷಿಸಿ ಕಾಮುಕರಿಗೆ ತಕ್ಕ ಶಾಸ್ತಿ ಮಾಡಿ, ಹೆಣ್ಣು ಮಕ್ಕಳನ್ನು ಗೌರವಿಸುವ ಪಾಠ ಕಲಿಸುತ್ತಾರೆ. ಹೌದು, ಅಲ್ಲಿ ನೆರೆದವರೆಲ್ಲಾ ಮೈಯೆಲ್ಲಾ ಕಣ್ಣಾಗಿ ಈ ದೃಶ್ಯವನ್ನು ನೋಡುತ್ತಾರೆ. ನಮ್ಮ ನಿಮ್ಮನ್ನೆಲ್ಲಾ ಹೆತ್ತ ತಾಯಿ ಹೆಣ್ಣು, ಅವಳನ್ನು ಗೌರವಿಸುವುದನ್ನು ಮೊದಲು ಕಲಿಯಿರಿ, ನೀವೆಲ್ಲಾ ಚೆನ್ನಮ್ಮನ ನಾಡಿನವರು… ನಮಗೆ ಚೆನ್ನಮ್ಮಳೇ ಸ್ಫೂರ್ತಿ ಎಂದು ಆ ಯುವತಿಯರು ಹೇಳುವಾಗ ಎಲ್ಲೆಡೆಯಿಂದ ಚಪ್ಪಾಳೆಯ ಸುರಿಮಳೆ.
ಹೌದು, ಕಾಮುಕರಿಗೆ ತಕ್ಕ ಶಾಸ್ತಿ ಮಾಡುವ ಈ ಪ್ರಾತ್ಯಕ್ಷಿಕೆಯನ್ನು ನಡೆಸಿಕೊಟ್ಟಿದ್ದು, ಎಂಟನೇ ತರಗತಿಯ ವಿದ್ಯಾರ್ಥಿನಿ ವಚನಾ ದೇಸಾಯಿ ಮತ್ತು ತಂಡ. ತಂಡದಲ್ಲಿ ದೇವಯಾನಿ ಪಾಟೀಲ, ಅರುಣಾ ಹಾಗೂ ಕರಾಟೆ ಹುಡುಗರು ಇದ್ದಾರೆ.
