ರಂಗಭೂಮಿಗೆ ಕಾಲಿಟ್ಟು ಅಭಿನಯದ ಮೂಲಖ ಕನ್ನಡ, ತಮಿಳು, ತೆಲುಗು ಮತ್ತು ಮಲಯಾಳಂ ಭಾಷೆಗಳ ಸುಮಾರು ನೂರಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿ ಜನಪ್ರಿಯತೆ ಗಳಿಸಿದ್ದ ಹಿರಿಯ ನಟಿ ಭಾನುಪ್ರಿಯಾ ಅವರು ಮರೆವಿನ ಕಾಯಿಲೆಯಿಂದ ಬಳಲುತ್ತಿದ್ದಾರೆ ಎಂಬ ಆತಂಕಕಾರಿ ಸುದ್ದಿ ತಿಳಿದುಬಂದಿದೆ. 58ನೇ ವಯಸ್ಸಿನಲ್ಲಿ ಈ ಆರೋಗ್ಯ ಸಮಸ್ಯೆ ಅವರನ್ನು ಕಾಡುತ್ತಿದ್ದು, ಸಂಭಾಷಣೆಗಳನ್ನು ನೆನಪಿಟ್ಟುಕೊಳ್ಳಲು ಕಷ್ಟವಾಗುತ್ತಿರುವುದು ಅವರ ವೃತ್ತಿಜೀವನಕ್ಕೆ ದೊಡ್ಡ ಸವಾಲಾಗಿದೆ.
ಭಾನುಪ್ರಿಯಾ ಅವರು ಕನ್ನಡದಲ್ಲಿ ರವಿಚಂದ್ರನ್ ನಟನೆಯ ‘ರಸಿಕ’ ಸೇರಿದಂತೆ ಹಲವು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಅಲ್ಲದೆ ರಜನಿಕಾಂತ್, ಮೋಹನ್‌ಲಾಲ್ ಅವರಂತಹ ದಕ್ಷಿಣ ಭಾರತದ ಘಟಾನುಘಟಿಗಳ ಜೊತೆ ತೆರೆ ಹಂಚಿಕೊಂಡಿದ್ದಾರೆ. ಆದರೆ ಕಳೆದ ಕೆಲವು ವರ್ಷಗಳಿಂದ ಅವರ ನೆನಪಿನ ಶಕ್ತಿ ಕುಂದುತ್ತಿದೆ ಎಂದು ಇತ್ತೀಚಿಗೆ ಕೇಳಿಬಂದಿದೆ.
ಭಾನುಪ್ರಿಯಾ ಸಂಕಷ್ಟ?: ಹೌದು ವೃತ್ತಿಜೀವನ ಮತ್ತು ವೈಯಕ್ತಿಕ ಜೀವನಕ್ಕೆ ಇದೀಗ ಸಂಕಷ್ಟ ಎದುರಾಗಿದೆ. ಈ ಹಿಂದೆ ಸ್ವತಃ ಭಾನುಪ್ರಿಯಾ ಅವರೇ ತಮ್ಮ ಆರೋಗ್ಯ ಸಮಸ್ಯೆಯ ಕುರಿತು ಮಾತನಾಡಿದ್ದರು. “ಶೂಟಿಂಗ್ ವೇಳೆ ನಾನು ಹೇಳಬೇಕಾದ ಡೈಲಾಗ್‌ಗಳನ್ನು ಮರೆಯುತ್ತಿದ್ದೆ.
ಇದು ಸುಮಾರು ಎರಡು ವರ್ಷಗಳಿಂದ ನಡೆಯುತ್ತಿದೆ” ಎಂದು ಅವರು ನೋವು ತೋಡಿಕೊಂಡಿದ್ದರು. ಇತ್ತೀಚೆಗೆ ಕಲಿತ ವಿಷಯಗಳನ್ನು ಕೂಡ ಮರೆಯುತ್ತಿರುವುದಾಗಿ ಮತ್ತು ತಾವು ಕಲಿತಿದ್ದ ಕೂಚಿಪುಡಿ ನೃತ್ಯದ ಮೇಲಿನ ಆಸಕ್ತಿಯೂ ಕಡಿಮೆಯಾಗಿರುವುದಾಗಿ ಅವರು ಹೇಳಿದ್ದಾರೆ.
ಯಾವ ವಿಚಾರದಿಂದ ಹೀಗಾಯಿತು?: ನಟಿಯ ವೈಯಕ್ತಿಕ ಜೀವನದ ಘಟನೆಗಳು ಕೂಡ ಈ ಸಮಸ್ಯೆಗಳ ಮೇಲೆ ಪರಿಣಾಮ ಬೀರಿವೆ ಎನ್ನಲಾಗಿದೆ. 1998ರಲ್ಲಿ ಆದರ್ಶ್ ಕೌಶಲ್ ಅವರನ್ನು ವಿವಾಹವಾಗಿದ್ದ ಭಾನುಪ್ರಿಯಾ ಅವರು, 2018ರಲ್ಲಿ ಪತಿಯನ್ನು ಕಳೆದುಕೊಂಡ ನಂತರ ಅವರ ಜೀವನವು ಸಂಪೂರ್ಣವಾಗಿ ಬದಲಾಯಿತು. ಪತಿಯ ನಿಧನದ ಬಳಿಕ ಅವರ ಬದುಕು ಏರುಪೇರಾಗಿದ್ದು, ಸದ್ಯ ಅವರು ತಮ್ಮ ಸಹೋದರರ ಜೊತೆ ಚೆನ್ನೈನಲ್ಲಿ ವಾಸವಾಗಿದ್ದಾರೆ.
1983ರಲ್ಲಿ ತಮಿಳು ಚಿತ್ರರಂಗಕ್ಕೆ ಕಾಲಿಟ್ಟ ಈ ಜನಪ್ರಿಯ ನಟಿ ಶೀಘ್ರವಾಗಿ ಚೇತರಿಸಿಕೊಂಡು ಮತ್ತೆ ಬಣ್ಣದ ಲೋಕದಲ್ಲಿ ಸಕ್ರಿಯರಾಗಲಿ ಎಂದು ಅವರ ಅಭಿಮಾನಿಗಳು ಹಾರೈಸುತ್ತಿದ್ದಾರೆ.
