ವೇದ ಪರಂಪರೆಯಲ್ಲಿ ಅಪೂರ್ವ ಸಾಧನೆ: 50 ದಿನದಲ್ಲಿ ‘ದಂಡಕ್ರಮ’ ಪಾರಾಯಣ ಪೂರ್ಣಗೊಳಿಸಿದ 19ರ ಯುವಕ

ರಾಷ್ಟ್ರದ ವೇದಪಾರಂಪರ್ಯಕ್ಕೆ ಹೊಸ ಹೊಳಪು ತಂದಂತಹ ಐತಿಹಾಸಿಕ ಸಾಧನೆಯನ್ನು ಮಹಾರಾಷ್ಟ್ರದ ಅಹಲ್ಯಾನಗರ ಮೂಲದ ಕೇವಲ 19 ವರ್ಷದ ಯುವ ವೇದಮೂರ್ತಿ ದೇವವ್ರತ ಮಹೇಶ್ ರೇಖೆ ಮಾಡಿದ್ದಾರೆ. ಶುಕ್ಲ ಯಜುರ್ವೇದದ ಮಾಧ್ಯಂದಿನ ಶಾಖೆಯ ಅತಿ ಕಠಿಣವೆಂದು ಪರಿಗಣಿಸಲ್ಪಡುವ ‘ದಂಡಕ್ರಮ ಪಾರಾಯಣ’ವನ್ನು ಕೇವಲ 50 ದಿನಗಳಲ್ಲಿ ಯಶಸ್ವಿಯಾಗಿ ಪೂರ್ಣಗೊಳಿಸಿರುವ ಅವರ ಈ ಸಾಧನೆಯನ್ನು ದೇಶದ ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ಹಲವು ಗಣ್ಯರು ಹೃತ್ಪೂರ್ವಕವಾಗಿ ಅಭಿನಂದಿಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿಯ ಪ್ರಶಂಸೆಯ ಸಂದೇಶ: ಸಾಮಾಜಿಕ ಜಾಲತಾಣದಲ್ಲಿ ಯುವ ವೇದಮೂರ್ತಿಯನ್ನು ಅಭಿನಂದಿಸಿದ ಪ್ರಧಾನಿ ಮೋದಿ ಅವರು 19 ವರ್ಷದ ದೇವವ್ರತರು ತೋರಿಸಿರುವ ಸಮರ್ಪಣಾ ಭಾವನೆ ನಮ್ಮ ಭಾರತೀಯ ಸಂಸ್ಕೃತಿಯ ಶ್ರೇಷ್ಠತೆಯನ್ನು ಮತ್ತಷ್ಟು ಪ್ರತಿಷ್ಠಿತವಾಗಿ ತೋರಿಸಿದೆ. ವೇದಪಾರಂಪರ್ಯವನ್ನು ಉಳಿಸುವ ಈ ಅಪೂರ್ವ ಕಾರ್ಯ ಪ್ರತಿಯೊಬ್ಬ ಭಾರತೀಯನಿಗೂ ಹೆಮ್ಮೆಯ ಸಂಗತಿ ಎಂದು ಹೇಳಿದ್ದಾರೆ.

ಮಹಾಭಾರತೀಯ ವೇದ ಪರಂಪರೆಯಲ್ಲಿ ಅತ್ಯಂತ ಗಾಢ ಅಧ್ಯಯನ ಮತ್ತು ನಿಷ್ಠೆಯ ಸಂಕೇತ ಎನ್ನಲಾಗುವ ‘ದಂಡಕ್ರಮ ಪಾರಾಯಣ’ದಲ್ಲಿ ಸುಮಾರು 2000 ಮಂತ್ರಗಳು ಸೇರಿದ್ದು, ಅವುಗಳನ್ನು ವಿಶೇಷ ಕ್ರಮದಲ್ಲಿ, ನಿರ್ದಿಷ್ಟ ವೇದವಿಧಾನ ಪಾಲನೆ ಮೂಲಕ ಪಠಿಸಬೇಕು. ಸಾಮಾನ್ಯವಾಗಿ ಹಿರಿಯ ವೇದಶಾಸ್ತ್ರಜ್ಞರು ಮಾತ್ರ ಕೈಗೊಳ್ಳುವ ಈ ಪಾರಾಯಣವನ್ನು 19 ವರ್ಷದ ಯುವಕನೊಬ್ಬ ಸಂಪೂರ್ಣಗೊಳಿಸಿರುವುದು ಅಪೂರ್ವ ಸಂಗತಿ ಎಂದೇ ಗುರುಗಳು ಹೇಳಿದ್ದಾರೆ.

ಪ್ರಧಾನಿ ಮೋದಿ ತಮ್ಮ ಪೋಸ್ಟ್‌ನಲ್ಲಿ, ನಮ್ಮ ಗುರುಪರಂಪರೆಯ ಶ್ರೀಮಂತ ಪರಂಪರೆಯನ್ನು ದೇವವ್ರತರು ಮರುಜೀವಂತಗೊಳಿಸಿದ್ದಾರೆ. ಈ ಸಾಧನೆಯು ಕಾಶಿಯಂತಹ ಪವಿತ್ರ ನಗರದಲ್ಲಿ ನಡೆದಿರುವುದು ನನಗೆ ಸಂಸದರಾಗಿ ವಿಶೇಷ ಸಂತೋಷ ತಂದಿದೆ ಎಂದು ತಿಳಿಸಿದರು.

ಪ್ರಹ್ಲಾದ್ ಜೋಶಿಯವರ ಅಭಿನಂದನೆ: ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಕೂಡ ದೇವವ್ರತ ಅವರನ್ನು ಶ್ಲಾಘಿಸಿದ್ದು, ಶುಕ್ಲ ಯಜುರ್ವೇದದ ಮಾಧ್ಯಂದಿನ ಶಾಖೆಯ ಸುಮಾರು 2,000 ಮಂತ್ರಗಳ ದಂಡಕ್ರಮ ಪಾರಾಯಣವನ್ನು ಕೇವಲ 19 ವರ್ಷದ ಯುವ ವೇದಮೂರ್ತಿ ಪೂರ್ಣಗೊಳಿಸಿರುವುದು ದೇಶದ ವೇದಪರಂಪರೆಗೆ ಹೆಮ್ಮೆಯ ಸಂಗತಿ ಎಂದು ಟ್ವೀಟ್ ಮಾಡಿದ್ದಾರೆ.

ವೇದಪರಂಪರೆಯ ಸಂರಕ್ಷಣೆಗೆ ಯುವಕನ ನಿಷ್ಠೆ: ವೇದಗಳ ಸಂರಕ್ಷಣೆ, ಪಾರಾಯಣ ಪರಂಪರೆಯನ್ನು ಮುಂದಿನ ತಲೆಮಾರುಗಳಿಗೆ ತಲುಪಿಸುವಲ್ಲಿ ಇಂತಹ ಯುವಕರ ಸಮರ್ಪಣೆ ಮಹತ್ವದ್ದಾಗಿದೆ. ದೇವವ್ರತರಿಗೆ ಮಾರ್ಗದರ್ಶನ ನೀಡಿದ ಸಾಧುಸಂತರು, ವೇದವಿದ್ವಾಂಸರು, ಸಂಸ್ಥೆಗಳು ಹಾಗೂ ಕುಟುಂಬದವರ ಪಾತ್ರವನ್ನೂ ಮೋದಿ ಶ್ಲಾಘಿಸಿದ್ದಾರೆ.

ಯುವ ಪೀಳಿಗೆಗೆ ಸ್ಫೂರ್ತಿ: ಇಂದಿನ ಕಾಲದಲ್ಲಿ ಯುವಕರ ಕುತೂಹಲವು ಬೇರೆಡೆ ಹರಿಯುತ್ತಿರುವ ಸಂದರ್ಭದಲ್ಲಿ, ಪಾರಂಪರ್ಯ ಜ್ಞಾನವನ್ನು ಹೀಗೆಯೇ ಅಳೆದು ಬೆಳಗಿಸಿದ ದೇವವ್ರತ ಅವರ ಸಾಧನೆ ಯುವ ಪೀಳಿಗೆಗೆ ಅಪಾರ ಸ್ಫೂರ್ತಿ ನೀಡಲಿದೆ ಎಂಬುದು ವಿದ್ವಾಂಸರ ಅಭಿಪ್ರಾಯ.