Virat Kohli: ಭಾರತೀಯ ಕ್ರಿಕೆಟ್‌ನ ಇಬ್ಬರು ದಿಗ್ಗಜರು ಒಂದೇ ಫ್ರೇಮ್‌ನಲ್ಲಿ ಕಂಡರೆ ಅಭಿಮಾನಿಗಳ ಸಂಭ್ರಮಕ್ಕೆ ಪಾರವೇ ಇರುವುದಿಲ್ಲ. ಅಂತಹದ್ದೇ ಒಂದು ಅಪರೂಪದ ಮತ್ತು ಹೃದಯಸ್ಪರ್ಶಿ ಘಟನೆಗೆ ಜಾರ್ಖಂಡ್‌ನ ರಾಜಧಾನಿ ರಾಂಚಿ ಸಾಕ್ಷಿಯಾಗಿದೆ.
ಟೀಮ್ ಇಂಡಿಯಾದ ‘ಕ್ಯಾಪ್ಟನ್ ಕೂಲ್’ ಮಹೇಂದ್ರ ಸಿಂಗ್ ಧೋನಿ, ತಮ್ಮ ನೆಚ್ಚಿನ ಗೆಳೆಯ ಹಾಗೂ ರನ್ ಮಷೀನ್ ವಿರಾಟ್ ಕೊಹ್ಲಿಯನ್ನು ತಮ್ಮದೇ ಕಾರಿನಲ್ಲಿ ಕುಳ್ಳಿರಿಸಿಕೊಂಡು ಸ್ವತಃ ಡ್ರೈವ್ ಮಾಡಿಕೊಂಡು ಹೋಗುತ್ತಿರುವ ವಿಡಿಯೋ ಈಗ ಇಂಟರ್ನೆಟ್‌ನಲ್ಲಿ ಧೂಳೆಬ್ಬಿಸಿದೆ.
ಏನಿದು ಘಟನೆ?: ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿಗಾಗಿ ರಾಂಚಿಗೆ ಬಂದಿಳಿದ ವಿರಾಟ್ ಕೊಹ್ಲಿ, ತಮ್ಮ ಬಿಡುವಿನ ವೇಳೆಯಲ್ಲಿ ಧೋನಿ ಫಾರ್ಮ್‌ಹೌಸ್‌ಗೆ ಭೇಟಿ ನೀಡಿದ್ದರು. ನವೆಂಬರ್ 27ರಂದು ರಾತ್ರಿ ನಡೆದ ಈ ಭೋಜನಕೂಟದಲ್ಲಿ ವಿಕೆಟ್ ಕೀಪರ್ ರಿಷಭ್ ಪಂತ್ ಕೂಡ ಭಾಗಿಯಾಗಿದ್ದರು.
ಊಟದ ಬಳಿಕ ಧೋನಿ ತಮ್ಮ ಆಪ್ತ ಮಿತ್ರ ಕೊಹ್ಲಿಯನ್ನು ಹೋಟೆಲ್‌ಗೆ ತಲುಪಿಸಲು ನಿರ್ಧರಿಸಿದರು. ಯಾವುದೇ ಭದ್ರತಾ ಸಿಬ್ಬಂದಿಯ ಹಂಗಿಲ್ಲದೆ, ಅಹಮ್ಮುಬಿಮ್ಮಿಲ್ಲದೆ ಧೋನಿ ತಮ್ಮ ಎಸ್‌ಯುವಿ ಕಾರಿನ ಸ್ಟೀರಿಂಗ್ ಹಿಡಿದರೆ, ಪಕ್ಕದ ಸೀಟಿನಲ್ಲಿ ಕೊಹ್ಲಿ ಕುಳಿತು ಹರಟುತ್ತಾ ಸಾಗಿದ್ದು ನೋಡುಗರಿಗೆ ಹಳೆಯ ದಿನಗಳನ್ನು ನೆನಪಿಸಿತು. ಇದನ್ನು ಸ್ಟಾರ್ ಸ್ಪೋರ್ಟ್ಸ್ “ವರ್ಷದ ಪುನರ್ಮಿಲನ” ಎಂದು ಬಣ್ಣಿಸಿದೆ.
ಕಣಕ್ಕಿಳಿಯಲು ಕೊಹ್ಲಿ ಸಜ್ಜು: ನವೆಂಬರ್ 30ರಂದು ರಾಂಚಿಯಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಮೊದಲ ಏಕದಿನ ಪಂದ್ಯ ನಡೆಯಲಿದ್ದು, ಇದಕ್ಕಾಗಿ ಕೊಹ್ಲಿ ಲಂಡನ್‌ನಿಂದ ನೇರವಾಗಿ ಭಾರತಕ್ಕೆ ಮರಳಿದ್ದಾರೆ. ವಿಶೇಷವೆಂದರೆ, ರಾಂಚಿಯಲ್ಲಿ ವಿರಾಟ್ ಆಡಲಿರುವ ಮೊದಲ ಪಂದ್ಯ ಇದಾಗಲಿದೆ (ಕಳೆದ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಮಗ ಅಕಾಯ್ ಜನನದ ಕಾರಣ ಅವರು ಗೈರಾಗಿದ್ದರು).
ಟೆಸ್ಟ್ ಮತ್ತು ಟಿ20 ಮಾದರಿಯಿಂದ ದೂರ ಸರಿದಿರುವ ಕೊಹ್ಲಿ, ಏಕದಿನ ಕ್ರಿಕೆಟ್‌ನಲ್ಲಿ ಮಾತ್ರ ತಮ್ಮ ಜಾದೂ ಮುಂದುವರಿಸಿದ್ದಾರೆ. ಈಗಾಗಲೇ 51 ಶತಕ ಹಾಗೂ 14,255 ರನ್‌ಗಳ ಪರ್ವತವನ್ನೇ ನಿರ್ಮಿಸಿರುವ ಅವರು, ಇತ್ತೀಚೆಗೆ ಆಸ್ಟ್ರೇಲಿಯಾ ವಿರುದ್ಧ ಅಜೇಯ 74 ರನ್ ಸಿಡಿಸಿ ಭಾರತವನ್ನು ಸೋಲಿನ ಸುಳಿಯಿಂದ ಪಾರು ಮಾಡಿದ್ದರು.
ಕೆ.ಎಲ್ ರಾಹುಲ್ ಸಾರಥ್ಯ: ಈ ಸರಣಿಯಲ್ಲಿ ತಂಡದ ನಾಯಕತ್ವದಲ್ಲಿ ಬದಲಾವಣೆಯಾಗಿದೆ. ಖಾಯಂ ನಾಯಕ ರೋಹಿತ್ ಶರ್ಮಾ ಅನುಪಸ್ಥಿತಿ ಹಾಗೂ ಶುಭಮನ್ ಗಿಲ್ ಮತ್ತು ರಿಷಭ್ ಪಂತ್ ಗಾಯದ ಸಮಸ್ಯೆಯಿಂದ ಬಳಲುತ್ತಿರುವುದರಿಂದ, ತಂಡದ ಚುಕ್ಕಾಣಿಯನ್ನು ಅನುಭವಿ ಕೆ.ಎಲ್ ರಾಹುಲ್ ಅವರಿಗೆ ನೀಡಲಾಗಿದೆ. ಇನ್ನು ಓಪನಿಂಗ್ ಸ್ಲಾಟ್‌ನಲ್ಲಿ ರೋಹಿತ್ ಶರ್ಮಾ ಜೊತೆಗೆ ಯುವ ಸ್ಫೋಟಕ ಬ್ಯಾಟ್ಸ್‌ಮನ್ ಯಶಸ್ವಿ ಜೈಸ್ವಾಲ್ ಇನ್ನಿಂಗ್ಸ್ ಆರಂಭಿಸುವ ಸಾಧ್ಯತೆಯಿದೆ.
