ಪಶ್ಚಿಮ ಬಂಗಾಳದ ದುರ್ಗಾಪುರದಲ್ಲಿ ನಡೆದ ಸಾಮೂಹಿಕ ಅತ್ಯಾಚಾರ ಪ್ರಕರಣ ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದೆ. ಒಡಿಶಾ ಮೂಲದ ವೈದ್ಯಕೀಯ ವಿದ್ಯಾರ್ಥಿನಿಯ ಮೇಲೆ ನಡೆದ ಈ ಹೇಯ ಕೃತ್ಯಕ್ಕೆ ಸಂಬಂಧಿಸಿದಂತೆ ಪೊಲೀಸರು ಈಗಾಗಲೇ ಐವರು ಆರೋಪಿಗಳನ್ನು ಬಂಧಿಸಿದ್ದು, ಅವರಲ್ಲಿ ಪ್ರಮುಖ ಆರೋಪಿ ಸಫೀಕ್‌ನ ಬಂಧನಕ್ಕೆ ಆತನ ಸ್ವಂತ ಸಹೋದರಿಯೇ ನೆರವಾಗಿದ್ದು ಎಲ್ಲರನ್ನೂ ಅಚ್ಚರಿಗೊಳಿಸಿದೆ.
ಅಕ್ಟೋಬರ್ 10 ರಂದು ನಡೆದ ಈ ಘಟನೆಗೆ ಸಂಬಂಧಿಸಿದಂತೆ, ತಲೆಮರೆಸಿಕೊಂಡಿದ್ದ ಸಫೀಕ್ನನ್ನು ಪತ್ತೆಹಚ್ಚಲು ಪೊಲೀಸರು ತೀವ್ರ ಕಾರ್ಯಾಚರಣೆ ನಡೆಸಿದ್ದರು. ಈ ಸಂದರ್ಭದಲ್ಲಿ, ಸಫೀಕ್‌ನ ಸಹೋದರಿ ರೋಜಿನಾ ಪೊಲೀಸರ ನೆರವಿಗೆ ಬಂದರು. ತಮ್ಮ ಕುಟುಂಬಕ್ಕೆ ಅಪಖ್ಯಾತಿ ಬಂದಿರುವುದನ್ನು ಸಹಿಸದ ರೋಜಿನಾ, ಸಫೀಕ್ ತಪ್ಪಿತಸ್ಥನಾಗಿದ್ದರೆ ಕಾನೂನನ್ನು ಎದುರಿಸಲೇಬೇಕು ಎಂದು ದೃಢ ನಿಶ್ಚಯ ಮಾಡಿದ್ದರು.
ರೋಜಿನಾ ಸಹಾಯದಿಂದ, ಆಂಡಾಲ್ ಸೇತುವೆಯ ಬಳಿ ಆಕೆಯನ್ನು ಭೇಟಿಯಾಗಲು ಬಂದ ಸಫೀಕ್ನನ್ನು ಪೊಲೀಸರು ಯಶಸ್ವಿಯಾಗಿ ಬಂಧಿಸಿದರು. ಮಾಧ್ಯಮದವರೊಂದಿಗೆ ಮಾತನಾಡಿದ ರೋಜಿನಾ, ತಮ್ಮ ಕುಟುಂಬದ ಮೇಲೆ ಸಫೀಕ್‌ನ ಕೃತ್ಯದಿಂದ ಆಗಿರುವ ಕಳಂಕದ ಬಗ್ಗೆ ನೋವು ವ್ಯಕ್ತಪಡಿಸಿದರು.
“ನನ್ನ ಸಹೋದರ ದುರ್ಗಾಪುರದ ರೋಲಿಂಗ್ ಮಿಲ್‌ನಲ್ಲಿ ಕೆಲಸ ಮಾಡುತ್ತಿದ್ದ. ಆತನಿಗೆ ಅಪ್ರಾಪ್ತ ಮಕ್ಕಳಿದ್ದಾರೆ. ಆತನ ತಪ್ಪಿಗೆ ನಮ್ಮ ಕುಟುಂಬದವರು ಯಾಕೆ ಪ್ರತಿದಿನ ಪೊಲೀಸ್ ಠಾಣೆಗೆ ಅಲೆದಾಡಬೇಕು? ನಮ್ಮ ಕುಟುಂಬ ಬಡವರಾಗಿರಬಹುದು, ಆದರೆ ಸ್ವಾಭಿಮಾನಕ್ಕೆ ಹೆಚ್ಚಿನ ಬೆಲೆ ನೀಡುತ್ತೇವೆ. ಅವನು ತಪ್ಪಿತಸ್ಥನಾಗಿದ್ದರೆ ಶಿಕ್ಷೆಯನ್ನು ಎದುರಿಸಲೇಬೇಕು” ಎಂದು ರೋಜಿನಾ ಹೇಳಿದರು.
ರೋಜಿನಾ ಕರೆಯನ್ನು ನಂಬಿ ಆಂಡಾಲ್ ಸೇತುವೆ ಬಳಿ ಬಂದ ಸಫೀಕ್, ಸಹೋದರಿಯ ಸಹಾಯದಿಂದಲೇ ಪೊಲೀಸರ ಬಲೆಗೆ ಬಿದ್ದನು. ಬಂಧನಕ್ಕೊಳಗಾದಾಗ ಸಫೀಕ್ ಭಯದಿಂದ ನಡುಗುತ್ತಿದ್ದ ಎಂದು ರೋಜಿನಾ ತಿಳಿಸಿದರು. “ಅವನು ಶರಣಾಗುವ ಮೂಲಕ ಸರಿಯಾದ ಕೆಲಸ ಮಾಡಿದನೆಂದು ನಾನು ಹೇಳಿದೆ. ಅವನಿಂದಾಗಿ ಇಡೀ ಕುಟುಂಬವು ನಾಚಿಕೆಪಡಬಾರದು” ಎಂದು ರೋಜಿನಾ ಹೇಳಿದರು.
ಈ ಪ್ರಕರಣದಲ್ಲಿ ಪೊಲೀಸರು ಅತ್ಯಂತ ತ್ವರಿತವಾಗಿ ಕಾರ್ಯನಿರ್ವಹಿಸಿದ್ದಾರೆ. ಅಸನ್ಸೋಲ್-ದುರ್ಗಾಪುರ ಪೊಲೀಸ್ ಆಯುಕ್ತ ಸುನಿಲ್ ಚೌಧರಿ ಮಾತನಾಡಿ, “ಅಪರಾಧ ನಡೆದ ಸ್ಥಳದಲ್ಲಿದ್ದ ಎಲ್ಲಾ ಐದು ಆರೋಪಿಗಳನ್ನು ಬಂಧಿಸಲಾಗಿದೆ. ಸಂತ್ರಸ್ತೆಗೆ ಶೀಘ್ರವಾಗಿ ನ್ಯಾಯ ಒದಗಿಸುತ್ತೇವೆ ಮತ್ತು ಯಾವುದೇ ಅಪರಾಧಿಯನ್ನೂ ಬಿಡುವುದಿಲ್ಲ” ಎಂದು ಭರವಸೆ ನೀಡಿದರು.
ಎಸ್‌ಕೆ ನಾಸಿರುದ್ದೀನ್, ಎಸ್‌ಕೆ ರಿಯಾಜುದ್ದೀನ್, ಅಪು ಬರುಯಿ ಮತ್ತು ಫಿರ್ದೌಸ್ ಎಂಬ ಇತರ ನಾಲ್ವರು ಆರೋಪಿಗಳನ್ನು ಈಗಾಗಲೇ ಬಂಧಿಸಲಾಗಿದೆ. ರಿಯಾಜುದ್ದೀನ್ ಐದು ವರ್ಷಗಳ ಹಿಂದೆ ಸಂತ್ರಸ್ತೆ ಓದುತ್ತಿದ್ದ ಕಾಲೇಜಿನಲ್ಲಿ ಕಾವಲುಗಾರನಾಗಿದ್ದ ಎಂಬ ಮಾಹಿತಿ ಸಹ ಲಭ್ಯವಾಗಿದೆ.
ದುರ್ಗಾಪುರ ಬಾರ್ ಅಸೋಸಿಯೇಷನ್ ಈ ಪ್ರಕರಣದ ಆರೋಪಿಗಳ ಪರವಾಗಿ ಯಾವುದೇ ಸದಸ್ಯರು ವಾದಿಸುವುದಿಲ್ಲ ಎಂದು ನಿರ್ಧರಿಸಿದ್ದು, ಇದು ಸಂತ್ರಸ್ತೆಗೆ ನ್ಯಾಯ ಒದಗಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ. ಜಾಮೀನು ಪಡೆಯಲು ಪ್ರಯತ್ನಿಸದ ಕಾರಣ ಸಫೀಕ್ ಮತ್ತು ನಾಸಿರುದ್ದೀನ್ ಇಬ್ಬರನ್ನೂ 9 ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದೆ.
ಸಂತ್ರಸ್ತೆಯ ಡಿಎನ್‌ಎ ಪ್ರೊಫೈಲಿಂಗ್ ಮತ್ತು ವೈದ್ಯಕೀಯ ಪರೀಕ್ಷೆಯ ಮಾದರಿಗಳನ್ನು ಸಂಗ್ರಹಿಸಿ, ಆಕೆಯ ಹೇಳಿಕೆಯನ್ನು ದಾಖಲಿಸಲು ಮತ್ತು ಆರೋಪಿಗಳ ಗುರುತಿನ ಪೆರೇಡ್ ಆಯೋಜಿಸಲು ಪೊಲೀಸರು ಸಿದ್ಧತೆ ನಡೆಸಿದ್ದಾರೆ.
