ಅದಾನಿ ಸಮೂಹಕ್ಕೆ ಇದೀಗ ಹೊಸ ಹುರುಪು, ಹಿಂಡನ್‌ಬರ್ಗ್ ವರದಿಯ ನಂತರ ಸಂಕಷ್ಟಕ್ಕೆ ಸಿಲುಕಿದ್ದ ಅದಾನಿ ಗ್ರೂಪ್‌ಗೆ ಹುರುಪು ಬಂದಿದೆ. ಭಾರತೀಯ ಷೇರುಪೇಟೆ ನಿಯಂತ್ರಕ ಸಂಸ್ಥೆ ಸೆಬಿ (SEBI) ಇತ್ತೀಚೆಗೆ ಅದಾನಿ ಗ್ರೂಪ್‌ಗೆ ‘ಕ್ಲೀನ್ ಚಿಟ್’ ನೀಡಿದ ನಂತರ, ಕಂಪನಿಯ ಷೇರುಗಳು ಗೂಳಿಯಂತೆ ಮುನ್ನುಗ್ಗುತ್ತಿವೆ.
ಕೇವಲ ಎರಡು ದಿನಗಳಲ್ಲಿ ಅದಾನಿ ಸಮೂಹದ ಮಾರುಕಟ್ಟೆ ಮೌಲ್ಯವು ಬರೋಬ್ಬರಿ ರೂ1.7 ಲಕ್ಷ ಕೋಟಿ ಹೆಚ್ಚಳ ಕಂಡಿದ್ದು, ಇದು ಹೂಡಿಕೆದಾರರ ವಿಶ್ವಾಸವನ್ನು ಮತ್ತಷ್ಟು ಬಲಪಡಿಸಿದೆ. ಹಿಂಡನ್‌ಬರ್ಗ್ ವರದಿಯಿಂದಾಗಿ ಅದಾನಿ ಸಮೂಹವು ದೊಡ್ಡ ಆರ್ಥಿಕ ನಷ್ಟವನ್ನು ಅನುಭವಿಸಿತ್ತು.
ಆದರೆ, ಸೆಬಿ ತನಿಖೆಯ ನಂತರ ಯಾವುದೇ ಅಕ್ರಮ ಕಂಡುಬಂದಿಲ್ಲ ಎಂದು ಹೇಳಿದ್ದರಿಂದ, ಕಂಪನಿಯ ಮೇಲಿದ್ದ ಕಳಂಕ ದೂರವಾಗಿದೆ. ಈ ಬೆಳವಣಿಗೆಯ ನಂತರ, ಅದಾನಿ ಗ್ರೂಪ್‌ನ ಒಟ್ಟು ಮಾರುಕಟ್ಟೆ ಮೌಲ್ಯವು ರೂ15 ಲಕ್ಷ ಕೋಟಿ ಗಡಿಯನ್ನು ದಾಟಿದೆ.
ಅದಾನಿ ಸಮೂಹದ 10 ಕಂಪನಿಗಳ ಷೇರುಗಳು ಭರ್ಜರಿ ಏರಿಕೆ ಕಂಡಿವೆ. ಅದಾನಿ ಪವರ್ ಕಂಪನಿಯ ಷೇರುಗಳು ಎರಡು ದಿನಗಳಲ್ಲಿ ಶೇ. 35ರಷ್ಟು ಲಾಭ ಗಳಿಸಿವೆ. ಜೊತೆಗೆ, ಕಂಪನಿಯು 1:5 ಷೇರು ವಿಭಜನೆ (ಸ್ಟಾಕ್ ಸ್ಪ್ಲಿಟ್) ಘೋಷಿಸಿದೆ.
ಜಾಗತಿಕ ಹೂಡಿಕೆ ಸಂಸ್ಥೆ ಮೋರ್ಗಾನ್ ಸ್ಟ್ಯಾನ್ಲಿ, ಅದಾನಿ ಪವರ್‌ಗೆ ‘ಓವರ್‌ವೇಟ್’ ರೇಟಿಂಗ್ ನೀಡಿದ್ದು, ಪ್ರತಿ ಷೇರಿಗೆ ರೂ. 818 ಗುರಿ ಬೆಲೆಯನ್ನು ನಿಗದಿಪಡಿಸಿದೆ. ಇನ್ನು ಅದಾನಿ ಟೋಟಲ್ ಗ್ಯಾಸ್ ಷೇರುಗಳು ಶೇ. 27ರಷ್ಟು ಜಿಗಿತ ಕಂಡರೆ, ಅದಾನಿ ಗ್ರೀನ್ ಎನರ್ಜಿ ಮತ್ತು ಅದಾನಿ ಎನರ್ಜಿ ಸೊಲ್ಯೂಷನ್ಸ್ ಷೇರುಗಳು ಶೇ. 12ರಷ್ಟು ಏರಿಕೆ ಕಂಡಿವೆ.
ಸೆಬಿಯ ಕ್ಲೀನ್ ಚಿಟ್ ಅಂತರರಾಷ್ಟ್ರೀಯ ಹೂಡಿಕೆದಾರರನ್ನೂ ಆಕರ್ಷಿಸಿದೆ. ಜೆಫರೀಸ್‌ನ ಕ್ರಿಸ್ ವುಡ್, ರಿಲಯನ್ಸ್ ಇಂಡಸ್ಟ್ರೀಸ್ ಷೇರುಗಳನ್ನು ಮಾರಾಟ ಮಾಡಿ ಅದಾನಿ ಸಮೂಹದ ಅಂಬುಜಾ ಸಿಮೆಂಟ್ಸ್ ಷೇರುಗಳನ್ನು ಖರೀದಿಸಿದ್ದಾರೆ. ಎಸ್.ಬಿ.ಐ. ಸೆಕ್ಯುರಿಟೀಸ್‌ನ ಸನ್ನಿ ಅಗರ್‌ವಾಲ್ ಅವರ ಪ್ರಕಾರ, ಅದಾನಿ ಪೋರ್ಟ್ಸ್, ಅಂಬುಜಾ ಮತ್ತು ಎಸಿಸಿ ಕಂಪನಿಗಳು ಹೂಡಿಕೆಗೆ ಉತ್ತಮ ಆಯ್ಕೆಗಳಾಗಿವೆ.
ಒಟ್ಟಾರೆ, ಅದಾನಿ ಗ್ರೂಪ್‌ನ ಮೇಲಿದ್ದ ಹಿಂಡನ್‌ಬರ್ಗ್ ಕರಿನೆರಳು ಸಂಪೂರ್ಣವಾಗಿ ಮರೆಯಾಗಿದ್ದು, ಕಂಪನಿಯು ಈಗ ತನ್ನ ಬೆಳವಣಿಗೆ ಮತ್ತು ಕಾರ್ಯಕ್ಷಮತೆಯತ್ತ ಗಮನಹರಿಸಲಿದೆ. ಇದು ಭಾರತದ ಆರ್ಥಿಕತೆಗೆ ಮತ್ತು ಷೇರು ಮಾರುಕಟ್ಟೆಗೆ ಧನಾತ್ಮಕ ಸಂಕೇತವಾಗಿದೆ.
