SSLC: 2026ರ ಮಾರ್ಚ್‌ನಲ್ಲಿ ನಡೆಯಲಿರುವ SSLC ಪರೀಕ್ಷೆಯನ್ನು ಖಾಸಗಿಯಾಗಿ ಬರೆಯಲು ಸಿದ್ಧತೆ ನಡೆಸುತ್ತಿರುವ ಸಾವಿರಾರು ವಿದ್ಯಾರ್ಥಿಗಳಿಗೆ ಕರ್ನಾಟಕ ಶಾಲಾ ಪರೀಕ್ಷೆ ಮತ್ತು ಮೌಲ್ಯ ನಿರ್ಣಯ ಮಂಡಳಿಯ ಹೊಸ ಆನ್‌ಲೈನ್ ನೋಂದಣಿ ವ್ಯವಸ್ಥೆಯು ಅಕ್ಷರಶಃ ಶಾಪವಾಗಿ ಪರಿಣಮಿಸಿದೆ. ತಂತ್ರಜ್ಞಾನದ ಮೂಲಕ ಪ್ರಕ್ರಿಯೆಯನ್ನು ಸುಲಭಗೊಳಿಸುವ ಬದಲು, ಮತ್ತಷ್ಟು ಜಟಿಲಗೊಳಿಸಿ ವಿದ್ಯಾರ್ಥಿಗಳನ್ನು ಸಂಕಷ್ಟಕ್ಕೆ ದೂಡಲಾಗಿದೆ.
ತಂತ್ರಜ್ಞಾನದ ಹೆಸರಲ್ಲಿ ತಾಳ್ಮೆ ಪರೀಕ್ಷೆ: ಹೊಸ ಆನ್‌ಲೈನ್ ವ್ಯವಸ್ಥೆಯು ವಿದ್ಯಾರ್ಥಿಗಳ ತಾಳ್ಮೆಯನ್ನು ಪರೀಕ್ಷಿಸುವಂತಿದೆ. ಮೊಬೈಲ್ ಸಂಖ್ಯೆ ನೀಡಿ ನೋಂದಣಿ ಆರಂಭಿಸಿದ ಕ್ಷಣದಿಂದ ಹಿಡಿದು, ಪದೇ ಪದೇ ಬರುವ OTP, ಪಾಸ್‌ವರ್ಡ್ ಸಮಸ್ಯೆಗಳು ಮತ್ತು ನಿಧಾನಗತಿಯ ಸರ್ವರ್‌ನಿಂದಾಗಿ ವಿದ್ಯಾರ್ಥಿಗಳು ಹೈರಾಣಾಗಿದ್ದಾರೆ. ಒಂದು ಸಣ್ಣ ತಪ್ಪು ಸಂಭವಿಸಿದರೂ, ಇಡೀ ಪ್ರಕ್ರಿಯೆಯನ್ನು ಮತ್ತೆ ಮೊದಲಿನಿಂದ ಆರಂಭಿಸಬೇಕಾದ ಅನಿವಾರ್ಯತೆ ವಿದ್ಯಾರ್ಥಿಗಳನ್ನು ಹತಾಶೆಗೆ ತಳ್ಳಿದೆ.
ಹಣ ಕಟ್ಟಿದ ಮೇಲಷ್ಟೇ ಶಾಲೆಯ ಹೆಸರು ಬಹಿರಂಗ!: ಈ ವ್ಯವಸ್ಥೆಯ ಅತ್ಯಂತ ಅವೈಜ್ಞಾನಿಕ ಮತ್ತು ವಿಚಿತ್ರ ನಿಯಮವೆಂದರೆ, ವಿದ್ಯಾರ್ಥಿಯು ಪರೀಕ್ಷಾ ಶುಲ್ಕವಾಗಿ 958 ರೂಪಾಯಿ ಪಾವತಿಸಿದ ನಂತರವೇ ತನಗೆ ಯಾವ ಶಾಲೆಯು ನೋಂದಣಿ ಕೇಂದ್ರವಾಗಿ ನಿಗದಿಯಾಗಿದೆ ಎಂಬುದು ತಿಳಿಯುತ್ತದೆ.
ದುರದೃಷ್ಟವಶಾತ್, ಒಮ್ಮೆ ಶುಲ್ಕ ಪಾವತಿಸಿದರೆ, ಅರ್ಜಿಯಲ್ಲಿ ಯಾವುದೇ ತಪ್ಪುಗಳನ್ನು ಸರಿಪಡಿಸಲು ಅಥವಾ ತಮಗೆ ನಿಗದಿಯಾದ ದೂರದ ಶಾಲೆಯನ್ನು ಬದಲಾಯಿಸಲು ಯಾವುದೇ ಅವಕಾಶವಿಲ್ಲ. ಇದು ವಿದ್ಯಾರ್ಥಿಗಳನ್ನು ಅಕ್ಷರಶಃ ಅಸಹಾಯಕ ಸ್ಥಿತಿಗೆ ತಲುಪಿಸಿದೆ.
ಕುಳಿತಲ್ಲೇ ಅರ್ಜಿ, ಆದರೂ ತಪ್ಪದ ಅಲೆದಾಟ: ಆನ್‌ಲೈನ್ ನೋಂದಣಿಯ ಮೂಲ ಉದ್ದೇಶವೇ ಸಮಯ ಮತ್ತು ಅಲೆದಾಟವನ್ನು ತಪ್ಪಿಸುವುದು. ಆದರೆ ಇಲ್ಲಿ ಉಲ್ಟಾ ಹೊಡೆಯುತ್ತಿದೆ. ಉದಾಹರಣೆಗೆ, ಉಡುಪಿಯ ವಿದ್ಯಾರ್ಥಿನಿಯೊಬ್ಬಳು ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಿದಾಗ, ಆಕೆಗೆ ಸುಮಾರು 28 ಕಿಲೋಮೀಟರ್ ದೂರದ ಹೆಜಮಾಡಿ ಸರ್ಕಾರಿ ಶಾಲೆಯನ್ನು ವ್ಯವಸ್ಥೆಯೇ ಸ್ವಯಂಚಾಲಿತವಾಗಿ ಆಯ್ಕೆ ಮಾಡಿದೆ. ಈಗ ಆ ವಿದ್ಯಾರ್ಥಿನಿ ತನ್ನೆಲ್ಲಾ ಮೂಲ ದಾಖಲೆಗಳೊಂದಿಗೆ ಅಷ್ಟು ದೂರ ಪ್ರಯಾಣಿಸಿ, ಮತ್ತೊಮ್ಮೆ ದಾಖಲೆಗಳನ್ನು ಸಲ್ಲಿಸಬೇಕಿದೆ. ಇದು ವಿದ್ಯಾರ್ಥಿಗಳ ಸಮಯ ಮತ್ತು ಹಣ ಎರಡನ್ನೂ ವ್ಯರ್ಥ ಮಾಡುವ ‘ಡಬಲ್ ಕೆಲಸ’ವಾಗಿದೆ.
ದೀಪಾವಳಿ ರಜೆ ಮುಗಿದು ಶಾಲೆಗಳು ತಡವಾಗಿ ಆರಂಭವಾಗಿರುವುದರಿಂದ, ಅಕ್ಟೋಬರ್ 31ರ ಅಂತಿಮ ಗಡುವಿನೊಳಗೆ ಈ ಎಲ್ಲಾ ಗೊಂದಲಗಳ ಮಧ್ಯೆ ನೋಂದಣಿ ಪೂರ್ಣಗೊಳಿಸುವುದು ವಿದ್ಯಾರ್ಥಿಗಳಿಗೆ ದೊಡ್ಡ ಸವಾಲಾಗಿದೆ. ಕೂಡಲೇ ಮಂಡಳಿಯು ಮಧ್ಯಪ್ರವೇಶಿಸಿ, ಪಿನ್‌ಕೋಡ್ ಆಧಾರದಲ್ಲಿ ಸಮೀಪದ ಶಾಲೆಗಳನ್ನು ಆಯ್ಕೆ ಮಾಡಲು ಅವಕಾಶ ನೀಡಬೇಕು ಮತ್ತು ನೋಂದಣಿ ದಿನಾಂಕವನ್ನು ವಿಸ್ತರಿಸಬೇಕು ಎಂಬುದು ವಿದ್ಯಾರ್ಥಿಗಳು ಹಾಗೂ ಶಿಕ್ಷಣ ತಜ್ಞರ ಒಕ್ಕೊರಲ ಆಗ್ರಹವಾಗಿದೆ.
