AI ಎಂಬ ಕರಾಳ ಜಗತ್ತು: ಸೋದರಿಯರ ಮಾನಕ್ಕಾಗಿ ಜೀವ ತೆತ್ತ ತಮ್ಮ!: ತಂತ್ರಜ್ಞಾನವು ಮಾನವನ ಬದುಕನ್ನು ಹಸನುಗೊಳಿಸುವ ವರವಾದರೆ, ಅದೇ ತಂತ್ರಜ್ಞಾನ ದುಷ್ಟರ ಕೈಗೆ ಸಿಕ್ಕಾಗ ಶಾಪವಾಗಿ ಪರಿಣಮಿಸುತ್ತದೆ ಎಂಬುದಕ್ಕೆ ಹರ್ಯಾಣದಲ್ಲಿ ನಡೆದ ಒಂದು ಘೋರ ದುರಂತವೇ ಸಾಕ್ಷಿ.
ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವನ್ನು ಬಳಸಿಕೊಂಡು ಸೃಷ್ಟಿಸಲಾದ ಸಹೋದರಿಯರ ಅಶ್ಲೀಲ ಫೋಟೋಗಳನ್ನು ಮುಂದಿಟ್ಟು, ಸೈಬರ್ ಕ್ರಿಮಿನಲ್‌ಗಳು ನಡೆಸಿದ ಬ್ಲ್ಯಾಕ್‌ಮೇಲ್‌ಗೆ ಹೆದರಿ 19 ವರ್ಷದ ಕಾಲೇಜು ವಿದ್ಯಾರ್ಥಿಯೊಬ್ಬ ತನ್ನ ಪ್ರಾಣವನ್ನೇ ಕಳೆದುಕೊಂಡಿದ್ದಾನೆ.
ಏನಿದು ಮನಕಲಕುವ ಪ್ರಕರಣ?: ಫರಿದಾಬಾದ್‌ನ ಡಿಎವಿ ಕಾಲೇಜಿನಲ್ಲಿ ದ್ವಿತೀಯ ವರ್ಷದ ವಿದ್ಯಾರ್ಥಿಯಾಗಿದ್ದ ರಾಹುಲ್ ಭಾರತಿ (19), ಈ ದುರಂತಕ್ಕೆ ಬಲಿಯಾದ ಯುವಕ. ಆರೋಪಿಗಳು ರಾಹುಲ್‌ನ ಮೂವರು ಸಹೋದರಿಯರ ಫೋಟೋಗಳನ್ನು ಎಐ ತಂತ್ರಜ್ಞಾನ ಬಳಸಿ ಅಶ್ಲೀಲ ಚಿತ್ರಗಳು ಮತ್ತು ವಿಡಿಯೋಗಳಾಗಿ ಮಾರ್ಫ್ ಮಾಡಿದ್ದರು.
ನಂತರ ಆ ನಕಲಿ ಫೋಟೋಗಳನ್ನು ರಾಹುಲ್‌ನ ವಾಟ್ಸಾಪ್‌ಗೆ ಕಳುಹಿಸಿ, 20 ಸಾವಿರ ಹಣಕ್ಕೆ ಬೇಡಿಕೆ ಇಟ್ಟಿದ್ದರು. ಹಣ ನೀಡದಿದ್ದರೆ, ಈ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟು, ಕುಟುಂಬದ ಮಾನವನ್ನು ಬೀದಿಗೆ ತರುವುದಾಗಿ ಬೆದರಿಕೆ ಹಾಕಿದ್ದರು.
15 ದಿನಗಳ ನರಕಯಾತನೆ: ಕಳೆದ ಎರಡು ವಾರಗಳಿಂದ ಈ ಬ್ಲ್ಯಾಕ್‌ಮೇಲ್ ಪರ್ವ ನಿರಂತರವಾಗಿ ನಡೆದಿತ್ತು. ತನ್ನ ಸಹೋದರಿಯರ ಭವಿಷ್ಯ ಮತ್ತು ಕುಟುಂಬದ ಗೌರವಕ್ಕೆ ಕುತ್ತು ಬರಬಹುದೆಂಬ ಭಯದಿಂದ ರಾಹುಲ್ ತೀವ್ರ ಮಾನಸಿಕ ಒತ್ತಡಕ್ಕೆ ಒಳಗಾಗಿದ್ದ. ಈ ಅವಮಾನವನ್ನು ಸಹಿಸಲಾರದೆ, ಆತ ಹೊರಜಗತ್ತಿನೊಂದಿಗೆ ಸಂಪರ್ಕ ಕಡಿದುಕೊಂಡು, ಸಂಪೂರ್ಣವಾಗಿ ಕುಗ್ಗಿಹೋಗಿದ್ದ ಎಂದು ಆತನ ತಂದೆ ಮನೋಜ್ ಭಾರತಿ ಕಣ್ಣೀರು ಹಾಕಿದ್ದಾರೆ.
ಶನಿವಾರ ಸಂಜೆ, ಈ ಮಾನಸಿಕ ಹಿಂಸೆಯನ್ನು ತಾಳಲಾರದೆ, ರಾಹುಲ್ ತನ್ನ ಕೋಣೆಯಲ್ಲಿ ಕೀಟನಾಶಕ ಮಾತ್ರೆಗಳನ್ನು ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದಾನೆ. ಕುಟುಂಬಸ್ಥರು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಿದರೂ, ಚಿಕಿತ್ಸೆ ಫಲಕಾರಿಯಾಗದೆ ಆತ ಕೊನೆಯುಸಿರೆಳೆದಿದ್ದಾನೆ.
ಆತ್ಮಹತ್ಯೆಗೆ ಪ್ರಚೋದಿಸಿದ ರಾಕ್ಷಸರು: ರಾಹುಲ್‌ನ ಮೊಬೈಲ್ ಫೋನ್ ಪರಿಶೀಲಿಸಿದಾಗ, ಬ್ಲ್ಯಾಕ್‌ಮೇಲ್‌ನ ಕ್ರೂರ ಸತ್ಯಗಳು ಬಯಲಾಗಿವೆ. ಸಾಹಿಲ್ ಎಂಬ ವ್ಯಕ್ತಿಯು ನಿರಂತರವಾಗಿ ರಾಹುಲ್‌ಗೆ ಬೆದರಿಕೆ ಸಂದೇಶಗಳನ್ನು ಕಳುಹಿಸಿದ್ದ. ಆತ ಕೇವಲ ಹಣಕ್ಕಾಗಿ ಬೆದರಿಕೆ ಹಾಕಿ ಸುಮ್ಮನಾಗಲಿಲ್ಲ, ಬದಲಿಗೆ ‘ನೀನು ಹೇಗೆ ಸಾಯಬಹುದು’ ಎಂದು ಸೂಚಿಸಿ, ವಿಷಕಾರಿ ಮಾತ್ರೆಗಳ ಹೆಸರನ್ನೂ ಉಲ್ಲೇಖಿಸಿ ರಾಕ್ಷಸೀ ಆನಂದ ಪಟ್ಟಿದ್ದಾನೆ.
ಈ ಪ್ರಕರಣದಲ್ಲಿ ರಾಹುಲ್‌ನ ಸ್ನೇಹಿತನಾದ ನೀರಜ್ ಎಂಬಾತನ ಪಾತ್ರವೂ ಇರಬಹುದೆಂದು ಕುಟುಂಬಸ್ಥರು ಸಂಶಯ ವ್ಯಕ್ತಪಡಿಸಿದ್ದಾರೆ.ಪೊಲೀಸರು ಸದ್ಯ ಸಾಹಿಲ್ ಮತ್ತು ನೀರಜ್ ವಿರುದ್ಧ ಎಫ್‌ಐಆರ್ ದಾಖಲಿಸಿಕೊಂಡು ತನಿಖೆ ಚುರುಕುಗೊಳಿಸಿದ್ದಾರೆ.
ಈ ಘಟನೆಯು ಎಐ ತಂತ್ರಜ್ಞಾನದ ಕರಾಳ ಮುಖವನ್ನು ಸಮಾಜದ ಮುಂದಿಟ್ಟಿದ್ದು, ಡಿಜಿಟಲ್ ಜಗತ್ತಿನಲ್ಲಿ ನಮ್ಮ ವೈಯಕ್ತಿಕ ಮಾಹಿತಿ ಎಷ್ಟು ಸುರಕ್ಷಿತ ಎಂಬ ಆತಂಕಕಾರಿ ಪ್ರಶ್ನೆಯನ್ನು ಹುಟ್ಟುಹಾಕಿದೆ. ಮುಗ್ಧ ಯುವಕನೊಬ್ಬನ ಬಲಿ ಪಡೆದ ಈ ಸೈಬರ್ ಕ್ರೈಮ್, ತಂತ್ರಜ್ಞಾನದ ಬಳಕೆಯ ಬಗ್ಗೆ ಎಚ್ಚರಿಕೆಯ ಗಂಟೆಯಾಗಿದೆ.
