ನಮ್ಮ ಮೆಟ್ರೋ ಪ್ರಯಾಣ ದರ ಏರಿಕೆಯಾಗಿ ಏಳು ತಿಂಗಳ ನಂತರ, ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್‌ಸಿಎಲ್) ತನ್ನ ವೆಬ್‌ಸೈಟ್‌ನಲ್ಲಿ ದರ ನಿಗದಿ ಸಮಿತಿಯ ವರದಿಯನ್ನು ಪ್ರಕಟಿಸಿದೆ. ಈ ವರದಿಯು ದರ ಏರಿಕೆಯ ಹಿಂದಿನ ಆಘಾತಕಾರಿ ಸತ್ಯಗಳನ್ನು ಹೊರಹಾಕಿದ್ದು, ಬಿಎಂಆರ್‌ಸಿಎಲ್ ಶೇ 105.5ರಷ್ಟು ದರ ಹೆಚ್ಚಳಕ್ಕೆ ಬೇಡಿಕೆ ಇಟ್ಟಿತ್ತು ಎಂಬುದು ಈಗ ಬಹಿರಂಗಗೊಂಡಿದೆ.
ಆದರೆ, ದರ ನಿಗದಿ ಸಮಿತಿಯು ಶೇ 51.55 ರಷ್ಟು ಮಾತ್ರ ಹೆಚ್ಚಿಸಲು ಶಿಫಾರಸು ಮಾಡಿತ್ತು. ದರ ಪರಿಷ್ಕರಣೆಯನ್ನು 2017ರಲ್ಲಿ ಕೊನೆಯದಾಗಿ ಮಾಡಲಾಗಿತ್ತು. ಅಂದು ಕನಿಷ್ಠ ದರ ರೂ. 10 (ಮೊದಲ ಎರಡು ಕಿ.ಮೀ.ಗೆ) ಮತ್ತು ಗರಿಷ್ಠ ದರ ರೂ. 60 (22 ರಿಂದ 30 ಕಿ.ಮೀ.ಗೆ) ಇತ್ತು.
7 ವರ್ಷಗಳ ಬಳಿಕ ವೇತನ, ಸಾಮಗ್ರಿ ವೆಚ್ಚ, ಸಾಲಗಳ ಹೆಚ್ಚಳದ ಕಾರಣ ನೀಡಿ, ಬಿಎಂಆರ್‌ಸಿಎಲ್ ದರವನ್ನು ಶೇ 105.5 ರಷ್ಟು ಹೆಚ್ಚಳ ಮಾಡಲು ಪ್ರಸ್ತಾವನೆ ಸಲ್ಲಿಸಿತ್ತು. ಇದರನ್ವಯ, ಕನಿಷ್ಠ ದರವನ್ನು ರೂ. 21 ಮತ್ತು ಗರಿಷ್ಠ ದರವನ್ನು ರೂ. 123ಕ್ಕೆ ಏರಿಸುವಂತೆ ಬೇಡಿಕೆಯಿಟ್ಟಿತ್ತು.
ಸಮಿತಿಯ ಅಧ್ಯಯನ ಮತ್ತು ಶಿಫಾರಸು: ದರ ಹೆಚ್ಚಳಕ್ಕಾಗಿ ಸಮಿತಿ ರಚಿಸಲು ಬಿಎಂಆರ್‌ಸಿಎಲ್ ರಾಜ್ಯ ಸರ್ಕಾರಕ್ಕೆ ಮನವಿ ಮಾಡಿತ್ತು. ಅದರಂತೆ ರಾಜ್ಯ ಮೂಲಸೌಕರ್ಯ ಇಲಾಖೆಯು ಕೇಂದ್ರಕ್ಕೆ ಪ್ರಸ್ತಾವ ಸಲ್ಲಿಸಿತ್ತು. ಕೇಂದ್ರ ಸರ್ಕಾರವು ನೇಮಿಸಿದ ದರ ನಿಗದಿ ಸಮಿತಿಯು ಸಾರ್ವಜನಿಕರು, ಬಿಎಂಆರ್‌ಸಿಎಲ್ ಅಧಿಕಾರಿಗಳು ಮತ್ತು ತಜ್ಞರಿಂದ ಅಭಿಪ್ರಾಯ ಸಂಗ್ರಹಿಸಿತ್ತು.
ದೇಶ-ವಿದೇಶಗಳ ಮೆಟ್ರೋ ದರಗಳ ವ್ಯವಸ್ಥೆಯನ್ನು ಅಧ್ಯಯನ ನಡೆಸಿದ ಸಮಿತಿಯು, 12 ಹಂತಗಳ ಬದಲು 10 ಹಂತಗಳನ್ನು ಶಿಫಾರಸು ಮಾಡಿತು. ಅಲ್ಲದೆ, ಕನಿಷ್ಠ ದರವನ್ನು ರೂ. 10ಕ್ಕೆ ಉಳಿಸಿಕೊಂಡು, ಗರಿಷ್ಠ ದರವನ್ನು ರೂ. 90 ಕ್ಕೆ ನಿಗದಿಪಡಿಸಿತು.
ಪ್ರತಿಭಟನೆ ಮತ್ತು ಪರಿಷ್ಕರಣೆ: ಫೆಬ್ರುವರಿ 9ರಂದು ಪರಿಷ್ಕೃತ ದರಗಳು ಜಾರಿಗೆ ಬಂದವು. ಆದರೆ, ಕಿಲೋಮೀಟರ್ ಆಧಾರಿತ ದರ ಹೆಚ್ಚಳವು ಹಲವು ನಿಲ್ದಾಣಗಳಿಗೆ ಶೇ 100ರಷ್ಟು ಹೆಚ್ಚಳಕ್ಕೆ ಕಾರಣವಾಯಿತು. ಪ್ರಯಾಣಿಕರ ತೀವ್ರ ಪ್ರತಿಭಟನೆ ಮತ್ತು ರಾಜ್ಯ ಸರ್ಕಾರದ ಸೂಚನೆಯ ನಂತರ, ಬಿಎಂಆರ್‌ಸಿಎಲ್ ಅತ್ಯಧಿಕ ದರ ಹೆಚ್ಚಳವಾಗಿರುವ ಕೆಲವು ಮಾರ್ಗಗಳಲ್ಲಿ ದರವನ್ನು ಕಡಿಮೆ ಮಾಡಲು ಮುಂದಾಯಿತು. ಇದರ ಪರಿಣಾಮವಾಗಿ ಗರಿಷ್ಠ ಹೆಚ್ಚಳವು ಶೇ 71.5ಕ್ಕೆ ಇಳಿಯಿತು.
ರಾಜಕೀಯ ಕೆಸರೆರಚಾಟ : ದರ ಏರಿಕೆಯ ವಿಚಾರದಲ್ಲಿ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಪರಸ್ಪರ ಆರೋಪ-ಪ್ರತ್ಯಾರೋಪಗಳಲ್ಲಿ ತೊಡಗಿದವು. ರಾಜ್ಯ ಸರ್ಕಾರದ ಪ್ರಸ್ತಾವದಂತೆ ಕೇಂದ್ರ ಸರ್ಕಾರ ಸಮಿತಿ ರಚಿಸಿತು. ಸಮಿತಿ ನೀಡಿದ ವರದಿಯಂತೆ ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಅಧಿಕಾರಿಗಳನ್ನು ಒಳಗೊಂಡ ಬಿಎಂಆರ್‌ಸಿಎಲ್ ಆಡಳಿತ ಮಂಡಳಿ ದರಗಳನ್ನು ಜಾರಿಗೊಳಿಸಿತು.
ಮೆಟ್ರೋ ದರ ಏರಿಕೆಯು ಸಾರ್ವಜನಿಕರ ಮೇಲೆ ಭಾರಿ ಪರಿಣಾಮ ಬೀರಿದೆ. ಹೆಚ್ಚಿದ ಪ್ರಯಾಣ ವೆಚ್ಚವು ಜನಸಾಮಾನ್ಯರ ಜೇಬಿಗೆ ಕತ್ತರಿ ಹಾಕಿದ್ದು, ಮೆಟ್ರೋ ಸೇವೆಗಳ ಬಗ್ಗೆ ಅಸಮಾಧಾನ ಹೆಚ್ಚಾಗಲು ಕಾರಣವಾಗಿದೆ.
