ಬೆಂಗಳೂರು: ರಾಜಧಾನಿ ಬೆಂಗಳೂರಿನ ಸುಬ್ರಹ್ಮಣ್ಯಪುರದಲ್ಲಿ ನಡೆದ ಒಂದು ಘಟನೆ ಇಡೀ ಸಮಾಜವನ್ನೇ ತಲ್ಲಣಗೊಳಿಸಿದೆ. ಕ್ಷಣಿಕ ಸುಖ ಮತ್ತು ಪ್ರೇಮದ ಅಮಲಿನಲ್ಲಿ, 17 ವರ್ಷದ ಅಪ್ರಾಪ್ತ ಬಾಲಕಿಯೊಬ್ಬಳು ತನ್ನ ಪ್ರಿಯಕರ ಮತ್ತು ಸ್ನೇಹಿತರೊಂದಿಗೆ ಸೇರಿ ತನ್ನ ಹೆತ್ತ ತಾಯಿಯನ್ನೇ ಬರ್ಬರವಾಗಿ ಕೊಲೆ ಮಾಡಿದ್ದಾಳೆ.
ಪತಿಯನ್ನು ಕಳೆದುಕೊಂಡು, ತನ್ನ 17 ವರ್ಷದ ಮಗಳೇ ಜಗತ್ತು ಎಂದು ಬದುಕುತ್ತಿದ್ದ 34 ವರ್ಷದ ನೇತ್ರಾವತಿ, ಸಾಲ ವಸೂಲಾತಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದರು. ಆದರೆ, ಇತ್ತೀಚೆಗೆ ಮಗಳ ನಡವಳಿಕೆಯಲ್ಲಿ ಬದಲಾವಣೆಯಾಗಿತ್ತು.
ಶಾಲೆಯಿಂದ ಹೊರಗುಳಿದಿದ್ದ ಆಕೆ, ಯುವಕನೊಬ್ಬನ ಜೊತೆ ಪ್ರೇಮ ಸಂಬಂಧ ಹೊಂದಿದ್ದಳು. ಆತ ಮತ್ತು ಅವನ ಸ್ನೇಹಿತರು ಆಗಾಗ ಮನೆಗೆ ಬರುವುದು ತಾಯಿ ನೇತ್ರಾವತಿಗೆ ಸರಿ ಕಾಣುತ್ತಿರಲಿಲ್ಲ. ಮಗಳ ಭವಿಷ್ಯದ ಬಗ್ಗೆ ಚಿಂತಿತರಾಗಿದ್ದ ಅವರು, ಈ ಸಂಬಂಧವನ್ನು ವಿರೋಧಿಸುತ್ತಲೇ ಬಂದಿದ್ದರು.
ಆ ಕರಾಳ ರಾತ್ರಿ ನಡೆದಿದ್ದೇನು?: ಅಕ್ಟೋಬರ್ 25ರ ರಾತ್ರಿ, ಎಲ್ಲೆ ಮೀರಿತು. ಮಗಳು ತನ್ನ ಪ್ರಿಯಕರ ಮತ್ತು ಆತನ ಮೂವರು ಸ್ನೇಹಿತರನ್ನು ಮನೆಗೆ ಕರೆತಂದು ಪಾರ್ಟಿ ಮಾಡುತ್ತಿದ್ದಳು. ಮಧ್ಯರಾತ್ರಿ ಎಚ್ಚರಗೊಂಡ ನೇತ್ರಾವತಿ, ಮಗಳ ಕೋಣೆಯಲ್ಲಿ ನಾಲ್ವರು ಯುವಕರು ನಗುತ್ತಾ ಮಾತನಾಡುತ್ತಿರುವುದನ್ನು ಕಂಡು ಆಘಾತಗೊಂಡರು.
ತಕ್ಷಣವೇ ಅವರನ್ನು ಮನೆಯಿಂದ ಹೊರಹೋಗುವಂತೆ ತಾಕೀತು ಮಾಡಿದರು. ಮಾತಿಗೆ ಮಾತು ಬೆಳೆದು, ಪರಿಸ್ಥಿತಿ ವಿಕೋಪಕ್ಕೆ ತಿರುಗಿತು. ನೇತ್ರಾವತಿ ಪೊಲೀಸರಿಗೆ ಕರೆ ಮಾಡುವುದಾಗಿ ಬೆದರಿಕೆ ಹಾಕಿದಾಗ, ಮಗಳು ಮತ್ತು ಆಕೆಯ ಪ್ರಿಯಕರನಿಗೆ ತಾಳ್ಮೆ ಕಳೆದುಹೋಯಿತು.
ಐವರೂ ಸೇರಿ ನೇತ್ರಾವತಿ ಮೇಲೆ ಹಲ್ಲೆ ನಡೆಸಿದರು. ಬಾಯಿಗೆ ಬಟ್ಟೆ ತುರುಕಿ, ಟವೆಲ್‌ನಿಂದ ಕತ್ತು ಬಿಗಿದು ಉಸಿರು ನಿಲ್ಲುವವರೆಗೂ ಹಿಡಿದುಕೊಂಡಿದ್ದಾರೆ. ತಮ್ಮ ಕ್ರೌರ್ಯವನ್ನು ಮರೆಮಾಚಲು, ಇದು ಆತ್ಮಹತ್ಯೆ ಎಂದು ನಾಟಕವಾಡಲು ನಿರ್ಧರಿಸಿದರು. ನೇತ್ರಾವತಿಯ ಶವವನ್ನು ಸೀರೆಯಿಂದ ಫ್ಯಾನ್‌ಗೆ ನೇಣು ಹಾಕಿ, ಐವರೂ ಅಲ್ಲಿಂದ ಪರಾರಿಯಾಗಿದ್ದಾರೆ.
ಸತ್ಯ ಬಯಲಾಗಿದ್ದು ಹೇಗೆ?: ನೇತ್ರಾವತಿಯ ಸಹೋದರಿ ಅನಿತಾ, ಎಷ್ಟೇ ಕರೆ ಮಾಡಿದರೂ ತಂಗಿ ಮತ್ತು ಆಕೆಯ ಮಗಳು ಫೋನ್ ಎತ್ತದಿದ್ದಾಗ ಅನುಮಾನಗೊಂಡು ಮನೆಗೆ ಬಂದಿದ್ದಾರೆ. ಆಗ ನೇಣು ಬಿಗಿದ ಸ್ಥಿತಿಯಲ್ಲಿ ನೇತ್ರಾವತಿಯ ಶವ ಪತ್ತೆಯಾಗಿದೆ.
ಆರಂಭದಲ್ಲಿ ಅಸಹಜ ಸಾವು ಎಂದು ಪ್ರಕರಣ ದಾಖಲಾಗಿತ್ತು. ಆದರೆ, ತಾಯಿಯ ಅಂತಿಮ ಸಂಸ್ಕಾರಕ್ಕೂ ಮಗಳು ಬಾರದೆ ಇದ್ದದ್ದು, ಅನಿತಾ ಅನುಮಾನವನ್ನು ಖಚಿತಪಡಿಸಿತು. ಅವರು ತಕ್ಷಣ ಪೊಲೀಸರಿಗೆ ದೂರು ನೀಡಿ, ತನ್ನ ತಂಗಿಯ ಸಾವಿನ ಹಿಂದೆ ಮಗಳ ಕೈವಾಡವಿರಬಹುದೆಂದು ಶಂಕೆ ವ್ಯಕ್ತಪಡಿಸಿದರು.
ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ಪೊಲೀಸರು, ಮಗಳ ಪ್ರಿಯಕರನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ, ಆತ ನಡೆದಿದ್ದೆಲ್ಲವನ್ನೂ ಒಪ್ಪಿಕೊಂಡಿದ್ದಾನೆ. ಈ ಘಟನೆಯು ಕೇವಲ ಒಂದು ಕೊಲೆಯಲ್ಲ, ಬದಲಾಗಿ ಹದಗೆಡುತ್ತಿರುವ ಯುವ ಮನಸ್ಥಿತಿ ಮತ್ತು ಕೌಟುಂಬಿಕ ಮೌಲ್ಯಗಳ ಕುಸಿತಕ್ಕೆ ಹಿಡಿದ ಕೈಗನ್ನಡಿಯಾಗಿದೆ. ಪೊಲೀಸರು ಅಪ್ರಾಪ್ತ ಆರೋಪಿಗಳ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕೈಗೊಂಡಿದ್ದಾರೆ.
