IPL 2026 ಆವೃತ್ತಿಗೆ ವೇದಿಕೆ ಸಜ್ಜಾಗುತ್ತಿದ್ದು, ಡಿಸೆಂಬರ್ 16 ರಂದು ನಡೆಯಲಿರುವ ಮಿನಿ ಹರಾಜಿಗೂ ಮುನ್ನ ಎಲ್ಲಾ 10 ಫ್ರಾಂಚೈಸಿಗಳು ತಮ್ಮ ತಂಡಗಳಿಗೆ ದೊಡ್ಡ ಮಟ್ಟದ ಸರ್ಜರಿ ಮಾಡಿವೆ.
ಆದರೆ, ಈ ಬಾರಿಯ ಆಟಗಾರರ ಬಿಡುಗಡೆ ಪಟ್ಟಿ ಪ್ರಕಟವಾದಾಗ, ಕ್ರಿಕೆಟ್ ಜಗತ್ತೇ ಒಂದು ಕ್ಷಣ ಬೆಚ್ಚಿಬಿದ್ದಿದೆ. ತಂಡಗಳ ಅವಿಭಾಜ್ಯ ಅಂಗವಾಗಿದ್ದ ರವೀಂದ್ರ ಜಡೇಜಾ, ಆ್ಯಂಡ್ರೆ ರಸೆಲ್, ಸಂಜು ಸ್ಯಾಮ್ಸನ್ ಅವರಂತಹ ಘಟಾನುಘಟಿ ಆಟಗಾರರನ್ನೇ ಅವರವರ ಫ್ರಾಂಚೈಸಿಗಳು ಕೈಬಿಟ್ಟಿವೆ!
ಕೈಬಿಡಲು ಕಾರಣವೇನು?: ಕಳೆದ ಸೀಸನ್‌ನಲ್ಲಿ ನಿರೀಕ್ಷಿತ ಪ್ರದರ್ಶನ ನೀಡದ ಆಟಗಾರರು, ದುಬಾರಿ ಮೊತ್ತಕ್ಕೆ ಖರೀದಿಯಾಗಿದ್ದರೂ ಆಟವಾಡದ ಆಟಗಾರರು ಮತ್ತು ತಂಡದ ಸಂಯೋಜನೆಗೆ ಹೊಂದಿಕೆಯಾಗದ ಆಟಗಾರರನ್ನು ಫ್ರಾಂಚೈಸಿಗಳು ಹರಾಜಿಗೆ ಬಿಟ್ಟುಕೊಟ್ಟಿವೆ. ಇದರ ಪ್ರಮುಖ ಉದ್ದೇಶ, ಮಿನಿ ಹರಾಜಿನಲ್ಲಿ ಹೊಸ ಆಟಗಾರರನ್ನು ಖರೀದಿಸಲು ತಮ್ಮ ಪರ್ಸ್‌ನಲ್ಲಿ ಹೆಚ್ಚಿನ ಹಣವನ್ನು ಉಳಿಸಿಕೊಳ್ಳುವುದಾಗಿದೆ.
ಸಿಎಸ್‌ಕೆಯಿಂದ ಜಡೇಜಾಗೇ ಗೇಟ್‌ಪಾಸ್!: ಈ ಬಾರಿಯ ಅತಿದೊಡ್ಡ ಆಘಾತಕಾರಿ ಸುದ್ದಿ ಬಂದಿರುವುದು ಚೆನ್ನೈ ಸೂಪರ್ ಕಿಂಗ್ಸ್ ಪಾಳಯದಿಂದ. ತಂಡದ ಆಲ್‌ರೌಂಡರ್, ‘ಸರ್’ ರವೀಂದ್ರ ಜಡೇಜಾ ಅವರನ್ನೇ ಸಿಎಸ್‌ಕೆ ಕೈಬಿಟ್ಟಿದೆ.
ಅವರ ಜೊತೆಗೆ, ದುಬಾರಿ ಆಟಗಾರ ಸ್ಯಾಮ್ ಕರನ್, ಯುವ ವೇಗಿ ಮತೀಶ ಪತಿರಾಣ ಮತ್ತು ಡೆವೊನ್ ಕಾನ್ವೇ ಅವರಂತಹ ಪ್ರಮುಖ ಆಟಗಾರರಿಗೂ ಗೇಟ್‌ಪಾಸ್ ನೀಡಲಾಗಿದೆ. ಇದು ಸಿಎಸ್‌ಕೆಯಲ್ಲಿ ಒಂದು ಯುಗದ ಅಂತ್ಯದ ಮುನ್ಸೂಚನೆಯೇ ಎಂಬ ಚರ್ಚೆ ಆರಂಭವಾಗಿದೆ.
ಕೆಕೆಆರ್‌ನಿಂದ ರಸೆಲ್-ಮಸಲ್‌ಗೆ ಗುಡ್‌ಬೈ!: ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ಗೆಲುವಿನ ರೂವಾರಿಯಾಗಿದ್ದ, ಸ್ಫೋಟಕ ಆಲ್‌ರೌಂಡರ್ ಆ್ಯಂಡ್ರೆ ರಸೆಲ್ ಅವರನ್ನೂ ತಂಡದಿಂದ ಬಿಡುಗಡೆ ಮಾಡಲಾಗಿದೆ. ಅವರೊಂದಿಗೆ ವೆಂಕಟೇಶ್ ಅಯ್ಯರ್ ಮತ್ತು ಕ್ವಿಂಟನ್ ಡಿ ಕಾಕ್ ಅವರಂತಹ ಸ್ಟಾರ್ ಆಟಗಾರರನ್ನೂ ಕೆಕೆಆರ್ ಕೈಬಿಟ್ಟಿದೆ.
ನಾಯಕನನ್ನೇ ಕೈಬಿಟ್ಟ ರಾಜಸ್ಥಾನ್!: ರಾಜಸ್ಥಾನ್ ರಾಯಲ್ಸ್ ತಂಡವು ಮತ್ತೊಂದು ದಿಟ್ಟ ನಿರ್ಧಾರ ಕೈಗೊಂಡಿದ್ದು, ತನ್ನ ನಾಯಕ ಸಂಜು ಸ್ಯಾಮ್ಸನ್ ಅವರನ್ನೇ ಹರಾಜಿಗೆ ಬಿಟ್ಟುಕೊಟ್ಟಿದೆ. ಅವರೊಂದಿಗೆ ಸ್ಟಾರ್ ಸ್ಪಿನ್ನರ್ ವನಿಂದು ಹಸರಂಗ ಮತ್ತು ನಿತೀಶ್ ರಾಣಾ ಅವರನ್ನೂ ತಂಡದಿಂದ ರಿಲೀಸ್ ಮಾಡಲಾಗಿದೆ.
ಇತರ ತಂಡಗಳಲ್ಲೂ ಸ್ಟಾರ್ ಆಟಗಾರರು ಔಟ್!
ಪಂಜಾಬ್ ಕಿಂಗ್ಸ್: ಸ್ಫೋಟಕ ಆಟಗಾರ ಗ್ಲೆನ್ ಮ್ಯಾಕ್ಸ್‌ವೆಲ್.
ಡೆಲ್ಲಿ ಕ್ಯಾಪಿಟಲ್ಸ್: ಮಾಜಿ ನಾಯಕ ಫಾಫ್ ಡು ಪ್ಲೆಸಿಸ್, ಯುವ ತಾರೆ ಜೇಕ್ ಫ್ರೇಸರ್-ಮೆಕ್‌ಗುರ್ಕ್.
ಸನ್‌ರೈಸರ್ಸ್ ಹೈದರಾಬಾದ್: ಅನುಭವಿ ವೇಗಿ ಮೊಹಮ್ಮದ್ ಶಮಿ, ಸ್ಪಿನ್ನರ್ ರಾಹುಲ್ ಚಹರ್.
ಮುಂಬೈ ಇಂಡಿಯನ್ಸ್: ಸಚಿನ್ ತೆಂಡೂಲ್ಕರ್ ಅವರ ಪುತ್ರ ಅರ್ಜುನ್ ತೆಂಡೂಲ್ಕರ್.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು: ಲಿಯಾಮ್ ಲಿವಿಂಗ್‌ಸ್ಟೋನ್, ಮಯಾಂಕ್ ಅಗರ್ವಾಲ್.
ಹರಾಜಿನಲ್ಲಿ ಇನ್ನು ಕೋಟಿಗಳ ಸುರಿಮಳೆ!
ಈ ಎಲ್ಲಾ ಘಟಾನುಘಟಿ ಆಟಗಾರರು ಇದೀಗ ಹರಾಜಿನ ಅಖಾಡಕ್ಕೆ ಲಗ್ಗೆ ಇಟ್ಟಿದ್ದಾರೆ. ಡಿಸೆಂಬರ್ 16 ರಂದು ನಡೆಯಲಿರುವ ಮಿನಿ ಹರಾಜಿನಲ್ಲಿ, ಈ ಸ್ಟಾರ್ ಆಟಗಾರರನ್ನು ಖರೀದಿಸಲು ಫ್ರಾಂಚೈಸಿಗಳ ನಡುವೆ ಕೋಟಿ ಕೋಟಿಗಳ ದೊಡ್ಡ ಯುದ್ಧವೇ ನಡೆಯಲಿದೆ.
