ಬೆಂಗಳೂರು: ಇನ್ಫೋಸಿಸ್ ಲಿಮಿಟೆಡ್ ಆಗಸ್ಟ್ 12ರಂದು ಬೆಂಗಳೂರಿನ ಜೆಪಿ ನಗರದ ಕಚೇರಿಯಲ್ಲಿ ಮುಂದಿನ ಶ್ರೇಷ್ಠ ಪ್ರತಿಭೆಗಳನ್ನು ನೇಮಕ ಮಾಡಿಕೊಳ್ಳುವ ಗುರಿಯೊಂದಿಗೆ ವಾಕ್-ಇನ್ ಸಂದರ್ಶನ ಆಯೋಜಿಸಿದೆ. ಸಂಸ್ಥೆಗೆ ಹೆಚ್ಚಿನ ವೃತ್ತಿಪರರ ಅಗತ್ಯತೆಯ ಹಿನ್ನೆಲೆಯಲ್ಲಿ ಈ ನೇಮಕಾತಿ ಅಭಿಯಾನ ನಡೆಯುತ್ತಿದೆ.
ಈಗಾಗಲೇ ಇದೇ ವರ್ಷದ ಜನವರಿ 6ರಂದು ಹೈದರಾಬಾದ್, ಫೆಬ್ರವರಿ 3ರಂದು ಚೆನ್ನೈನಲ್ಲಿ ಈ ಮಾದರಿ ವಾಕ್ ಇನ್ ಸಂದರ್ಶನ ನಡೆಸಲಾಗಿದೆ. ಈಗ ಬೆಂಗಳೂರು ನಗರದಲ್ಲಿ ನೇಮಕಾತಿ ಅಭಿಯಾನ ನಡೆಯಲಿದ್ದು, ಆಸಕ್ತರು, ಅರ್ಹತೆ ಉಳ್ಳವರು ಪಾಲ್ಗೊಳ್ಳಬಹುದು.
ಇನ್ಫೋಸಿಸ್‌ನ ವ್ಯವಹಾರ ಪ್ರಕ್ರಿಯೆ ನಿರ್ವಹಣಾ ವಿಭಾಗವಾದ ಇನ್ಫೋಸಿಸ್ ಬಿಪಿಎಂ ಜೆಪಿ ನಗರದ ಕಚೇರಿಯಲ್ಲಿ ತಂತ್ರಜ್ಞಾನ ಬೆಂಬಲ ತಜ್ಞರು, ಸಿಸ್ಟಮ್ ಎಂಜಿನಿಯರ್ ಮತ್ತು ಎಐ/ಜನ್ ಎಐ ತಂತ್ರಜ್ಞಾನ ಹುದ್ದೆಗಳಿಗಾಗಿ ವಾಕ್-ಇನ್ ಸಂದರ್ಶನ ನಡೆಯಲಿದೆ. ಸಂದರ್ಶನದ ಸಮಯ ಬೆಳಗ್ಗೆ 9ರಿಂದ ಮಧ್ಯಾಹ್ನ 1 ಗಂಟೆ.
ಕಂಪನಿಯು ಪೂರ್ಣ ಸಮಯದ ಹುದ್ದೆಗಳಿಗೆ 2–3 ವರ್ಷಗಳ ಅನುಭವ ಹೊಂದಿರುವ, ಕಂಪ್ಯೂಟರ್ ವಿಜ್ಞಾನ, ಎಂಜಿನಿಯರಿಂಗ್ ಅಥವಾ ಸಂಬಂಧಿತ ಕ್ಷೇತ್ರದಲ್ಲಿ ಪದವಿ ಪಡೆದ ಅಭ್ಯರ್ಥಿಗಳನ್ನು ಹುಡುಕುತ್ತಿದೆ. ಅಭ್ಯರ್ಥಿಗಳು ಎಐ ಮಾದರಿ ಎಂಜಿನಿಯರಿಂಗ್‌ನಲ್ಲಿ ಜ್ಞಾನ ಮತ್ತು ಅನುಭವವನ್ನು ಹೊಂದಿರಬೇಕು. ಪ್ರೋಗ್ರಾಮಿಂಗ್‌ನಲ್ಲಿ ಪ್ರಾವೀಣ್ಯತೆಯನ್ನು ಹೊಂದಿರಬೇಕು.
ಪೈಥಾನ್, ಜಾವಾ ಅಥವಾ C++ ನಂತಹ ಪ್ರೋಗ್ರಾಮಿಂಗ್ ಭಾಷೆಗಳಲ್ಲಿ ಪ್ರಾವೀಣ್ಯತೆ ಪಡೆದಿರಬೇಕು. ಈ ನೇಮಕಾತಿ ಅಭಿಯಾನ ಇನ್ಫೋಸಿಸ್ ಬಿಪಿಎಂನ ಇತ್ತೀಚಿನ ವಾಕ್-ಇನ್ ನೇಮಕಾತಿಗಳ ಸರಣಿಯಾಗಿದೆ. ಇದರಲ್ಲಿ ಮಹಿಳೆಯರಿಗೆ ಮಾತ್ರ ಒಂದು ವಿಶೇಷ ಅಭಿಯಾನ ಸೇರಿದೆ. ಕಂಪನಿ ಜನವರಿಯಿಂದ ವಿವಿಧ ನಗರಗಳಲ್ಲಿ ಸಂದರ್ಶನಗಳನ್ನು ನಡೆಸುತ್ತಿದ್ದು, ಸಾವಿರಾರು ಜನರನ್ನು ನೇಮಿಸಿಕೊಂಡಿದೆ.
ಇನ್ಫೋಸಿಸ್ ಸಿಇಒ ಸಲೀಲ್ ಪರೇಖ್ ಈ ವರ್ಷ ಸುಮಾರು 20,000 ಪದವೀಧರರನ್ನು ನೇಮಿಸಿಕೊಳ್ಳುವ ತಮ್ಮ ಕಂಪನಿಯ ಯೋಜನೆಯನ್ನು ಕೆಲ ದಿನಗಳ ಹಿಂದೆ ಪ್ರಕಟಿಸಿದ್ದರು. ಈ ವರ್ಷದ ಏಪ್ರಿಲ್-ಜೂನ್ ತ್ರೈಮಾಸಿಕದಲ್ಲಿ, ಕಂಪನಿಯು 17,000ಕ್ಕೂ ಹೆಚ್ಚು ಜನರನ್ನು ನೇಮಿಸಿಕೊಂಡಿದೆ.
ಪ್ರತಿಸ್ಪರ್ಧಿ ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ (ಟಿಸಿಎಸ್) ಈ ಹಣಕಾಸು ವರ್ಷದಲ್ಲಿ ಭಾರತದ ಐಟಿ ವಲಯದಲ್ಲಿ ಅತಿ ಹೆಚ್ಚು 12,000ಕ್ಕೂ ಹೆಚ್ಚು ಜನರನ್ನು ಗಮನಾರ್ಹವಾಗಿ ವಜಾಗೊಳಿಸುವುದಾಗಿ ಘೋಷಿಸಿದ ನಂತರ ಇನ್ಫೋಸಿಸ್ ಸಿಇಒ ಹೇಳಿಕೆಗಳು ಬಂದಿವೆ. ಟಿಸಿಎಸ್ ಉದ್ಯೋಗಿಗಳ ವಜಾ ಕಂಪನಿಯ ಇದುವರೆಗಿನ ಅತಿದೊಡ್ಡ ವಜಾಗಳಲ್ಲಿ ಒಂದು ಎಂದು ವಿಶ್ಲೇಷಿಸಲಾಗುತ್ತಿದೆ.
ಇನ್ಫೋಸಿಸ್ ಬೆಳವಣಿಗೆ ಮತ್ತು ಪ್ರತಿಭೆಗಳ ಸ್ವಾಧೀನದತ್ತ ಗಮನಹರಿಸಿದೆ. ಈ ಮದ್ಯೆ ಸಂಸ್ಥೆಯು ಟಿಸಿಎಸ್ ಭವಿಷ್ಯದ ಸಿದ್ಧತೆಯ ಮೇಲೆ ಕೇಂದ್ರೀಕರಿಸಿದೆ. ಉತ್ತಮ ಗುಣಮಟ್ಟದ ಪ್ರತಿಭೆಗಳನ್ನು ನೇಮಿಸಿಕೊಳ್ಳುವುದನ್ನು ಮುಂದುವರಿಸುತ್ತದೆ ಎಂದಿದೆ.
