ಇಳಕಲ್: ತಮ್ಮ ಇಲಾಖೆಯ ವಿರುದ್ಧ ನಕಲಿ ಚಾನೆಲ್‌ಗಳಲ್ಲಿ ಬೇಕಾಬಿಟ್ಟಿ ಬರೆದುಕೊಂಡ ಬಗ್ಗೆ ಹುನಗುಂದ ಇಳಕಲ್ ಅವಳಿ ತಾಲೂಕುಗಳ ಪಂಚಾಯತಿ ಅಧಿಕಾರಿಗಳು ಪ್ರತಿಭಟನೆ ನಡೆಸಿದರು.
ಪಂಚಾಯತ ಅಭಿವೃದ್ಧಿ ಅಧಿಕಾರಿಗಳ ಕ್ಷೇಮಾಭಿವೃದ್ಧಿ ಸಂಘದ ಜೊತೆಗೆ ಹಲವಾರು ಸಂಘಗಳು ಈ ಪ್ರತಿಭಟನೆಯಲ್ಲಿ ಕೈಜೋಡಿಸಿದ್ದು ಸಿಬ್ಬಂದಿ ವರ್ಗದವರು ಮನವಿ ಪತ್ರಗಳನ್ನು ತಹಸೀಲ್ದಾರ್‌ ನಿಂಗಪ್ಪ ಬಿರಾದಾರ, ಪಿಎಸ್ಐ ಶಹಜಹಾನ್ ನಾಯಕ ಅವರಿಗೆ ನೀಡಿ ತಮಗಾಗುತ್ತಿರುವ ಮಾನಸಿಕ ಹಿಂಸೆಯ ಬಗ್ಗೆ ವಿವರಿಸಿ ಈ ರೀತಿಯಾಗಿ ವೈಯಕ್ತಿಕ ಆರೋಪ ಮಾಡಬಾರದು ಎಂದು ವಿನಂತಿಸಿದರು. ಇಳಕಲ್ ಹುನಗುಂದ ಅವಳಿ ತಾಲೂಕುಗಳ ಪಂಚಾಯತಿ ಕಾರ್ಯನಿರ್ವಾಹಕ ಮುರಳಿಧರ ದೇಶಪಾಂಡೆ ಸೇರಿದಂತೆ ಎರಡೂ ತಾಲೂಕುಗಳ ಗ್ರಾಮಾಭಿವೃದ್ಧಿ ಅಧಿಕಾರಿಗಳು ಮತ್ತು ಸಿಬ್ಬಂದಿ ವರ್ಗದವರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.
