ನವದೆಹಲಿ: ಗ್ರಾಮೀಣ ಜನರ ಸ್ವಾವಲಂಬನೆ, ಮಹಿಳಾ ಸಬಲೀಕರಣ ಮತ್ತು ಸುಸ್ಥಿರ ಅಭಿವೃದ್ಧಿಗಾಗಿ ಐದು ದಶಕಗಳಿಗೂ ಹೆಚ್ಚು ಕಾಲ ಶ್ರಮಿಸಿದ್ದ ಖ್ಯಾತ ಸಾಮಾಜಿಕ ಕಾರ್ಯಕರ್ತ ಹಾಗೂ ಬೇರ್‌ಫೂಟ್ ಕಾಲೇಜಿನ ಸಂಸ್ಥಾಪಕ ಸಂಜಿತ್ ‘ಬಂಕರ್’ ರಾಯ್ ಅವರು ನವೆಂಬರ್ 10ರ ಮಂಗಳವಾರ ಬೆಳಿಗ್ಗೆ ರಾಜಸ್ಥಾನದ ಅಜ್ಮೇರ್ ಜಿಲ್ಲೆಯ ತಿಲೋನಿಯಾದಲ್ಲಿರುವ ತಮ್ಮ ನಿವಾಸದಲ್ಲಿ ನಿಧನರಾಗಿದ್ದಾರೆ. ಅವರಿಗೆ 81 ವರ್ಷ ವಯಸ್ಸಾಗಿತ್ತು.

ಬೆಳಿಗ್ಗೆ ಸುಮಾರು 6.15ಕ್ಕೆ ಪತ್ನಿ ಹಾಗೂ ಖ್ಯಾತ ಸಾಮಾಜಿಕ ಕಾರ್ಯಕರ್ತೆ ಅರುಣಾ ರಾಯ್ ಮತ್ತು ಆಪ್ತರ ಸಮ್ಮುಖದಲ್ಲಿ ಅವರು ಶಾಂತಿಯುತವಾಗಿ ಕೊನೆಯುಸಿರೆಳೆದಿದ್ದಾರೆ ಎಂದು ಅವರೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದವರು ತಿಳಿಸಿದ್ದಾರೆ. ತಮ್ಮ ಜೀವನದ ಬಹುಭಾಗವನ್ನು ಗ್ರಾಮೀಣ ಜನರ ಏಳಿಗೆಗಾಗಿ ಮೀಸಲಿಟ್ಟಿದ್ದ ಅವರು, ತಾವು ಪ್ರೀತಿಸಿದ ತಿಲೋನಿಯಾ ನೆಲದಲ್ಲಿಯೇ ಕೊನೆಯುಸಿರೆಳೆದಿದ್ದಾರೆ. ಅವರ ಅಂತ್ಯಕ್ರಿಯೆ ಮಂಗಳವಾರ ಸಂಜೆ 4 ಗಂಟೆಗೆ ತಿಲೋನಿಯಾದಲ್ಲಿ ನಡೆಯಲಿದೆ ಎಂದು ಸಾಮಾಜಿಕ ಕಾರ್ಯಕರ್ತ ನಿಖಿಲ್ ಡೇ ಮಾಹಿತಿ ನೀಡಿದ್ದಾರೆ.

1972ರಲ್ಲಿ ಬೇರ್‌ಫೂಟ್ ಕಾಲೇಜು ಸ್ಥಾಪನೆ : ಸಂಜಿತ್ ಬಂಕರ್ ರಾಯ್ ಅವರು 1972ರಲ್ಲಿ ತಿಲೋನಿಯಾದಲ್ಲಿ ಸಮಾಜ ಕಾರ್ಯ ಮತ್ತು ಸಂಶೋಧನಾ ಕೇಂದ್ರ (Social Work and Research Centre) ಸ್ಥಾಪಿಸಿದರು. ಇದೇ ಸಂಸ್ಥೆ ಮುಂದೆ ‘ಬೇರ್‌ಫೂಟ್ ಕಾಲೇಜು’ ಎಂದೇ ಜಾಗತಿಕವಾಗಿ ಪ್ರಸಿದ್ಧವಾಯಿತು. ಗ್ರಾಮೀಣ ಜನರಲ್ಲಿರುವ ಜ್ಞಾನ, ಅನುಭವ ಮತ್ತು ಕೌಶಲ್ಯಗಳನ್ನು ಬಳಸಿಕೊಂಡೇ ಗ್ರಾಮಗಳ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಬಹುದು ಎಂಬುದು ಅವರ ಮೂಲ ಆಶಯವಾಗಿತ್ತು.

ಔಪಚಾರಿಕ ಶಿಕ್ಷಣ ಪಡೆದವರೇ ತಾಂತ್ರಿಕ ಕೆಲಸ ಮಾಡಬಲ್ಲರು ಎಂಬ ನಂಬಿಕೆಗೆ ಅವರು ಸವಾಲು ಹಾಕಿದರು. ಶಾಲೆಗೆ ಹೋಗದ ಗ್ರಾಮೀಣ ಮಹಿಳೆಯರಿಗೂ ಸೌರಶಕ್ತಿ ತಂತ್ರಜ್ಞಾನದಲ್ಲಿ ತರಬೇತಿ ನೀಡಿ, ತಮ್ಮ ಊರುಗಳಲ್ಲೇ ಸೌರ ವಿದ್ಯುತ್ ವ್ಯವಸ್ಥೆಗಳನ್ನು ಸ್ಥಾಪಿಸುವ ಮತ್ತು ನಿರ್ವಹಿಸುವ ಸಾಮರ್ಥ್ಯ ಬೆಳೆಸಿದರು. ಈ ಕಾರ್ಯಕ್ರಮದ ಮೂಲಕ ಭಾರತದ ವಿವಿಧ ಭಾಗಗಳಷ್ಟೇ ಅಲ್ಲದೆ ವಿದೇಶಗಳ ಮಹಿಳೆಯರೂ ತಿಲೋನಿಯಾಗೆ ಬಂದು ತರಬೇತಿ ಪಡೆದರು.

ಸೌರಶಕ್ತಿಯಿಂದ ಶಿಕ್ಷಣದವರೆಗೆ ವಿಸ್ತರಿಸಿದ ಸೇವೆ : ಬೇರ್‌ಫೂಟ್ ಕಾಲೇಜಿನ ಕಾರ್ಯಚಟುವಟಿಕೆಗಳು ಕೇವಲ ಸೌರಶಕ್ತಿಗೆ ಸೀಮಿತವಾಗಿರಲಿಲ್ಲ. ಮಳೆನೀರು ಕೊಯ್ಲು, ಜಲ ಸಂರಕ್ಷಣೆ, ಗ್ರಾಮೀಣ ಆರೋಗ್ಯ ಸೇವೆ, ಶಿಕ್ಷಣ, ಜೀವನೋಪಾಯ, ಕರಕುಶಲ ಮತ್ತು ಪರಿಸರ ಸಂರಕ್ಷಣೆಯಂತಹ ಹಲವು ಕ್ಷೇತ್ರಗಳಲ್ಲಿ ಸಂಸ್ಥೆ ಕೆಲಸ ಮಾಡಿತು. ಹಗಲಿನಲ್ಲಿ ದುಡಿಮೆ ಅಥವಾ ಕುಟುಂಬದ ಜವಾಬ್ದಾರಿಗಳ ಕಾರಣ ಶಾಲೆಗೆ ಹೋಗಲು ಸಾಧ್ಯವಾಗದ ಮಕ್ಕಳಿಗಾಗಿ ರಾತ್ರಿ ಶಾಲೆಗಳನ್ನೂ ನಡೆಸಲಾಯಿತು.

ಗ್ರಾಮಗಳ ಅಭಿವೃದ್ಧಿಗೆ ಹೊರಗಿನ ತಜ್ಞರ ಮೇಲೆಯೇ ಅವಲಂಬಿಸಬೇಕಿಲ್ಲ; ಸ್ಥಳೀಯ ಜನರಿಗೆ ತರಬೇತಿ ಮತ್ತು ಅವಕಾಶ ನೀಡಿದರೆ ಅವರೇ ತಮ್ಮ ಸಮುದಾಯದ ಬದಲಾವಣೆಯ ರೂವಾರಿಗಳಾಗಬಹುದು ಎಂಬ ಗಾಂಧೀಜಿಯವರ ಗ್ರಾಮ ಸ್ವಾವಲಂಬನೆಯ ಚಿಂತನೆ ಅವರ ಕಾರ್ಯದ ಮೂಲವಾಗಿತ್ತು.

ಜಾಗತಿಕ ಮನ್ನಣೆ ಪಡೆದ ಸಾಧನೆ : ಗ್ರಾಮೀಣ ಅಭಿವೃದ್ಧಿ ಮತ್ತು ಸಾಮಾಜಿಕ ಉದ್ಯಮಶೀಲತೆಗೆ ನೀಡಿದ ಕೊಡುಗೆಗಾಗಿ ಬಂಕರ್ ರಾಯ್ ಅವರಿಗೆ 1986ರಲ್ಲಿ ಪದ್ಮಶ್ರೀ ಪ್ರಶಸ್ತಿ ಲಭಿಸಿತ್ತು. 2004ರಲ್ಲಿ ಟೈಲರ್ ಪ್ರಶಸ್ತಿ, 2005ರಲ್ಲಿ ಸ್ಕೋಲ್ ಪ್ರಶಸ್ತಿ ಸೇರಿದಂತೆ ಹಲವು ಅಂತರರಾಷ್ಟ್ರೀಯ ಗೌರವಗಳೂ ಸಂದಿದ್ದವು. 2010ರಲ್ಲಿ ಪ್ರತಿಷ್ಠಿತ ಟೈಮ್ ನಿಯತಕಾಲಿಕೆಯ ವಿಶ್ವದ 100 ಪ್ರಭಾವಿ ವ್ಯಕ್ತಿಗಳ ಪಟ್ಟಿಯಲ್ಲಿಯೂ ಅವರು ಸ್ಥಾನ ಪಡೆದಿದ್ದರು.

ಬಂಕರ್ ರಾಯ್ ಅವರ ನಿಧನಕ್ಕೆ ರಾಜಕೀಯ ನಾಯಕರು, ಸಾಮಾಜಿಕ ಕಾರ್ಯಕರ್ತರು ಹಾಗೂ ವಿವಿಧ ಕ್ಷೇತ್ರಗಳ ಗಣ್ಯರು ಸಂತಾಪ ಸೂಚಿಸುತ್ತಿದ್ದಾರೆ. ಕಾಂಗ್ರೆಸ್ ಸಂಸದ ಶಶಿ ತರೂರ್ ಕೂಡ ತಮ್ಮ ಎಕ್ಸ್ ಖಾತೆಯಲ್ಲಿ ಸಂತಾಪ ವ್ಯಕ್ತಪಡಿಸಿದ್ದಾರೆ. ಗ್ರಾಮೀಣ ಭಾರತದ ಜನರಿಗೆ ಸ್ವಾವಲಂಬನೆಯ ದಾರಿ ತೋರಿದ ಅವರ ಸೇವೆ ಮತ್ತು ಬೇರ್‌ಫೂಟ್ ಕಾಲೇಜಿನ ಮೂಲಕ ಬೆಳೆಸಿದ ಸಾವಿರಾರು ಮಹಿಳೆಯರ ಸಾಧನೆಗಳು ಅವರ ಸಾಮಾಜಿಕ ಕೊಡುಗೆಯನ್ನು ಮುಂದಿನ ಪೀಳಿಗೆಗಳಿಗೂ ಪರಿಚಯಿಸಲಿವೆ.

• ಲಸಿಕೆಯೇ ಜೀವ ರಕ್ಷಣೆಯ ಕವಚ: ಲಸಿಕೆ ತಪ್ಪಿಸದಿರಲು ಜಾಗೃತಿ ಅಗತ್ಯ
• ಅನಕ್ಷರಸ್ಥರಿಗೆ ಎಡಗೈಯಿಂದ ಅರ್ಜಿ ಬರೆದುಕೊಡುವ ಪುಣ್ಯಾತ್ಮ..
• ‘ಪುಲಿಮುರುಗನ್’ ಹಿಂದಿನ ದೃಶ್ಯ ಮಾಂತ್ರಿಕ ಶಾಜಿ ಕುಮಾರ್ ಇನ್ನಿಲ್ಲ
• ಗ್ರಾಮ ಸ್ವಾವಲಂಬನೆಯ ಕನಸಿಗೆ ಜೀವ ತುಂಬಿದ ಬಂಕರ್ ರಾಯ್ ನಿಧನ
• ಕೋಟೆನಗರಿ ದೀಪಾವಳಿಯ ಕಳೆ ಹೆಚ್ಚಿಸುವ ಕ್ವಾಟಿ..!

The post ಗ್ರಾಮ ಸ್ವಾವಲಂಬನೆಯ ಕನಸಿಗೆ ಜೀವ ತುಂಬಿದ ಬಂಕರ್ ರಾಯ್ ನಿಧನ appeared first on Samyukta Karnataka.

ಮಹಾರಾಷ್ಟ್ರದಲ್ಲಿ ಪ್ರತಿ ಟನ್ ಕಬ್ಬಿಗೆ ಪ್ರಥಮ ಕಂತಾಗಿ 3,900ರೂ. ಮೊದಲ ಕಂತು ನೀಡುವುದಾಗಿ ಘೋಷಿಸಿವೆ. ವಿಶೇಷವೆಂದರೆ, ಯಾವುದೇ ಕಡಿತವಿಲ್ಲದೆ ಕಬ್ಬು ಕಾರ್ಖಾನೆಗೆ ತಲುಪಿದ 15 ದಿನಗಳಲ್ಲಿ ಬಿಲ್ ಹಣ ರೈತರ ಖಾತೆಗೆ ಜಮಾ ಮಾಡಲು ಮಹಾರಾಷ್ಟ್ರದ ಕಾರ್ಖಾನೆ ಆಡಳಿತ ಮಂಡಳಿಯು ಸಮ್ಮತಿಸಿರುವುದರಿಂದ, ಕರ್ನಾಟಕದ ಗಡಿಭಾಗದ ಕಬ್ಬು ಈಗ ಸಾಂಗ್ಲಿ ಮತ್ತು ಕೊಲ್ಲಾಪುರ ಜಿಲ್ಲೆಗಳತ್ತ ಭರದಿಂದ ಸಾಗಾಟ ನಡೆದಿದೆ. ಇದರಿಂದಾಗಿ ಕರ್ನಾಟಕದ ಗಡಿಭಾಗದ ಸಕ್ಕರೆ ಕಾರ್ಖಾನೆಗಳಿಗೆ ಸಂಕಷ್ಟ ಎದುರಾಗಲಿದೆ.

ಮಹಾರಾಷ್ಟ್ರ ಸರ್ಕಾರ ಕರ್ನಾಟಕದ ಕಬ್ಬು ಮಹಾರಾಷ್ಟ್ರಕ್ಕೆ ಬರಲು ಅತ್ಯಧಿಕ ಬೆಲೆ ಘೋಷಿಸಿರುವುದರಿಂದ, ಗಡಿಭಾಗದ ಸಕ್ಕರೆ ಕಾರ್ಖಾನೆಗಳ ಮುಂದೆ ದೊಡ್ಡ ಸವಾಲು ಎದುರಾಗಿದೆ. 1993ರ ನಂತರ ಮೊದಲ ಬಾರಿಗೆ ಕಬ್ಬಿಗೆ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಮೊದಲ ಬಿಲ್ಲು ಘೋಷಣೆಯಾಗಿದೆ ಎಂದು ರೈತ ವಲಯದಲ್ಲಿ ಚರ್ಚೆ ಆರಂಭವಾಗಿದೆ. ಮಹಾರಾಷ್ಟ್ರ ಮತ್ತು ಕರ್ನಾಟಕದ ಮೊದಲ ಬಿಲ್ಲಿನಲ್ಲಿ ಪ್ರತಿ ಟನ್‌ಗೆ 300 ರೂಪಾಯಿಗಳ ವ್ಯತ್ಯಾಸವಿರುವುದರಿಂದ, ರೈತರು ಮಹಾರಾಷ್ಟ್ರದ ಕಾರ್ಖಾನೆಗಳಿಗೆ ಕಬ್ಬು ಕಳುಹಿಸಲು ಆದ್ಯತೆ ನೀಡುತ್ತಿದ್ದಾರೆ.

ಕರ್ನಾಟಕದ ಕಾರ್ಖಾನೆಗಳಿಂದ ಬಿಲ್ ಮೊತ್ತದ ಬಗ್ಗೆ ವ್ಯತ್ಯಾಸ ಇರುವಾಗ, ಮಹಾರಾಷ್ಟ್ರದ ಕಾರ್ಖಾನೆಗಳು ನಗದು ಹಣ ಮತ್ತು ಮುಂಗಡ ಹಣ ನೀಡಲು ಸಿದ್ಧಗೊಂಡಿವೆ. ಆದ್ದರಿಂದ ಯಾವ ಕಾರ್ಖಾನೆಯಿಂದ ಹೆಚ್ಚು ದರ ಮತ್ತು ಸಮಯಕ್ಕೆ ಸರಿಯಾಗಿ ಹಣ ನೀಡುತ್ತಾರೋ ಆ ಕಾರ್ಖಾನೆಗೆ ಕಬ್ಬು ಕಳುಹಿಸುವ ನಿರ್ಧಾರವನ್ನು ರೈತರು ತೆಗೆದುಕೊಳ್ಳುತ್ತಿದ್ದಾರೆ. ಮಹಾರಾಷ್ಟ್ರದ ಕಾರ್ಖಾನೆಗಳಿಗೆ ಕಬ್ಬು ಕಳುಹಿಸಲು ರೈತರ ಗುಂಪುಗಳು ಹೆಚ್ಚಾಗತೊಡಗಿವೆ.

ಮಹಾರಾಷ್ಟ್ರದ ಕಾರ್ಖಾನೆಗಳು ತಮ್ಮ ಅರೆಯುವ(ಕ್ರಷಿಂಗ್) ಸಾಮರ್ಥ್ಯ ಪೂರ್ಣಗೊಳಿಸಲು ಕೊಲ್ಲಾಪುರ ಮತ್ತು ಸಾಂಗ್ಲಿ ಜಿಲ್ಲೆಗಳೊಂದಿಗೆ ಈಗ ಕರ್ನಾಟಕದ ಅಥಣಿ, ಕಾಗವಾಡ, ರಾಯಬಾಗ ಮತ್ತು ಜಮಖಂಡಿ ತಾಲ್ಲೂಕುಗಳಲ್ಲಿಯೂ ಕಬ್ಬು ಕಟಾವು ಯಂತ್ರೋಪಕರಣ ಸಕ್ರಿಯಗೊಳಿಸಬೇಕಾಗಿದೆ. ಈ ಮಾರ್ಗದಲ್ಲಿ ಮಹಾರಾಷ್ಟ್ರದ ಕಾರ್ಖಾನೆಗಳ ನೌಕರರು ಮತ್ತು ಪ್ರತಿನಿಧಿಗಳು ರೈತರನ್ನು ಸಂಪರ್ಕಿಸುತ್ತಿದ್ದಾರೆ. ಇದರಿಂದಾಗಿ ಸ್ಥಳೀಯ ಕರ್ನಾಟಕದ ಕಾರ್ಖಾನೆಗಳ ಮುಂದೆ ಕಬ್ಬಿನ ಲಭ್ಯತೆಯ ಪ್ರಶ್ನೆ ಎದುರಾಗುವ ಸಾಧ್ಯತೆಯಿದೆ.

ಸ್ಥಳೀಯ ಕಾರ್ಖಾನೆಗಳು ಸಹ ಮಹಾರಾಷ್ಟ್ರದಂತೆ ಬೆಲೆ ನೀಡಿ ಸಮಯಕ್ಕೆ ಸರಿಯಾಗಿ ಬಿಲ್ ಮೊತ್ತ ಜಮಾ ಮಾಡದಿದ್ದರೆ, ರೈತರು ಮಹಾರಾಷ್ಟ್ರದ ಕಾರ್ಖಾನೆಗಳಿಗೆ ಕಬ್ಬು ಕಳುಹಿಸುತ್ತಾರೆ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ. ಆದ್ದರಿಂದ ಸ್ಥಳೀಯ ಕಾರ್ಖಾನೆಗಳು ಸಹ ರೈತರಿಗೆ ಹೆಚ್ಚು ಬೆಲೆ ನೀಡುವುದರ ಜೊತೆಗೆ ಸಮಯಕ್ಕೆ ಸರಿಯಾಗಿ ಹಣ ನೀಡುವ ಸವಾಲು ಎದುರಿಸಬೇಕಾಗುತ್ತದೆ.

1993ರಿಂದ 2001ರ ಅವಧಿಯಲ್ಲಿ ಅಥಣಿ ತಾಲ್ಲೂಕಿನಲ್ಲಿ ಒಂದೇ ಒಂದು ಸಕ್ಕರೆ ಕಾರ್ಖಾನೆ ಇತ್ತು. ಪ್ರಸ್ತುತ ಪರಿಸ್ಥಿತಿ ಸಂಪೂರ್ಣವಾಗಿ ಬದಲಾಗಿದೆ. ಈಗ ಕಾರ್ಖಾನೆಗಳ ಅಧಿಕಾರಿಗಳು ಮತ್ತು ನೌಕರರು ರೈತರ ಮನೆ ಬಾಗಿಲಿಗೆ ತೆರಳಿ ನಗದು ಹಣ ನೀಡುವುದಾಗಿ ಭರವಸೆ ನೀಡಿ ಕಬ್ಬು ಕಟಾವಿಗೆ ವಿನಂತಿಸುತ್ತಿದ್ದಾರೆ. ಹಿಂದೆ ಕಬ್ಬು ಸಾಗಿಸಲು ಕಾರ್ಖಾನೆಗಳ ನಡುವೆ ಪೈಪೋಟಿ ಇತ್ತು. ಈಗ ಕಬ್ಬು ಪಡೆಯಲು ಕಾರ್ಖಾನೆಗಳ ನಡುವೆ ಪೈಪೋಟಿ ಆರಂಭವಾಗಿದೆ.

ಮಹಾರಾಷ್ಟ್ರಕ್ಕೆ ರೈತರ ಒಲವು: ಕರ್ನಾಟಕದ ಗಡಿಭಾಗದಿಂದ ಜತ್ತ, ಡಫಳಾಪುರ, ಸಾಂಗ್ಲಿ, ಆರಗ, ತಾಳಿಕೋಟೆ ಮತ್ತು ಸೋನ್‌ಹೀರಾ ಭಾಗಗಳಿಂದ ಕಾರ್ಖಾನೆಗಳ ಕಡೆಗೆ ಕಬ್ಬು ಹೋಗತೊಡಗಿದೆ. 1993ರಲ್ಲಿ ಅಥಣಿ ತಾಲ್ಲೂಕಿನ ಕಬ್ಬು ಸಾತಾರಾ ಮತ್ತು ಪುಣೆ ಜಿಲ್ಲೆಗಳವರೆಗೆ ಹೋಗುತ್ತಿತ್ತು. ಆ ಸಮಯದಲ್ಲಿ ದೂರ ಹೆಚ್ಚಿತ್ತು. ಈಗ ಸಾಂಗ್ಲಿ ಮತ್ತು ಕೊಲ್ಲಾಪುರ ಜಿಲ್ಲೆಗಳ ಕಾರ್ಖಾನೆಗಳು ಹತ್ತಿರವಿರುವುದರಿಂದ ಮತ್ತು ಬೆಲೆಯೂ ಅಧಿಕ ಸಿಗುತ್ತಿರುವುದರಿಂದ ರೈತರು ಮಹಾರಾಷ್ಟ್ರಕ್ಕೆ ಒಲವು ತೋರುತ್ತಿದ್ದಾರೆ.

ಮೊದಲ ಕಂತಾಗಿ 3,900: ಮಹಾರಾಷ್ಟ್ರದ ಸಕ್ಕರೆ ಕಾರ್ಖಾನೆಗಳು ಕಬ್ಬು ಪೂರೈಸುವ ರೈತರಿಗೆ ಮೊದಲ ಕಂತಾಗಿ 3,900, ಎರಡನೇ ಕಂತಾಗಿ 100 ರೂ. ಹಾಗೂ ಕೊನೆಯ ಕಂತಾಗಿ 200 ದರ ನೀಡಲು ಘೋಷಿಸಿವೆ. ಇದರಿಂದ ಕರ್ನಾಟಕದ ರೈತರು ಮಹಾರಾಷ್ಟ್ರದ ಸಕ್ಕರೆ ಕಾರ್ಖಾನೆಗಳತ್ತ ಮುಖ ಮಾಡಿದ್ದಾರೆ.

The post ಕಬ್ಬು ಪಡೆಯಲು ಕಾರ್ಖಾನೆಗಳ ಪೈಪೋಟಿ: ಗಡಿಭಾಗದ ಸಕ್ಕರೆ ಕಾರ್ಖಾನೆಗಳಿಗೆ ಸಂಕಷ್ಟ appeared first on Samyukta Karnataka.

ಈ ಕುರಿತು ಸೋಮವಾರ ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿರುವ ರಾಹುಲ್ ಗಾಂಧಿ, ಸಿಆರ್‌ಪಿಎಫ್ ಯೋಧರನ್ನು ಉದ್ದೇಶಿಸಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.

ʻಪ್ರಿಯ ಸಿಆರ್‌ಪಿಎಫ್ ಯೋಧರೇ, ನಿಮ್ಮ ಮುಖಭಾವವೇ ಎಲ್ಲವನ್ನೂ ಹೇಳುತ್ತಿತ್ತು. ಪ್ರಧಾನಿಯವರ ಸುಳ್ಳುಗಳನ್ನು ನೀವು ನಂಬಿಲ್ಲ ಎಂಬುದು ಸ್ಪಷ್ಟವಾಗಿತ್ತು. ಅವರು ನಮ್ಮನ್ನು ನಕ್ಸಲರು ಎಂದು ಕರೆದಿದ್ದಾರೆ. ನನ್ನ ಸವಾಲು ಈಗಲೂ ಹಾಗೆಯೇ ಇದೆ. ದೇಶದ್ರೋಹಿಗಳು ಯಾರು ಮತ್ತು ವಿದೇಶಿ ಶಕ್ತಿಗಳ ನಿಯಂತ್ರಣದಲ್ಲಿ ಇರುವವರು ಯಾರು ಎಂಬುದರ ಕುರಿತು ನನ್ನೊಂದಿಗೆ ಚರ್ಚೆ ನಡೆಸಲಿ. ಯಾವುದೇ ಸಮಯ, ಯಾವುದೇ ಸ್ಥಳದಲ್ಲಾದರೂ ಸಿದ್ಧ’ ಎಂದು ರಾಹುಲ್ ಗಾಂಧಿ ಹೇಳಿದ್ದಾರೆ.

ʻಚರ್ಚೆ ಮುಗಿದ ಬಳಿಕ ಪ್ರಧಾನಿ ಮೋದಿ ಯಾವುದೇ ಒಬ್ಬ ಯೋಧನ ಎದುರು ನಿಲ್ಲುವ ಧೈರ್ಯವನ್ನೂ ಹೊಂದಿರುವುದಿಲ್ಲ ಎಂಬುದು ನನ್ನ ಖಾತರಿ’ ಎಂದು ಅವರು ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ.

ಏನಿದು ವಿವಾದ?: ಭಾನುವಾರ ಛತ್ತೀಸ್‌ಗಢದ ಬಸ್ತರ್ ಜಿಲ್ಲೆಯ ಕರಣ್‌ಪುರದಲ್ಲಿರುವ ಸಿಆರ್‌ಪಿಎಫ್ ಶಿಬಿರಕ್ಕೆ ಭೇಟಿ ನೀಡಿದ್ದ ಪ್ರಧಾನಿ ನರೇಂದ್ರ ಮೋದಿ, ಯೋಧರೊಂದಿಗೆ ದೀಪಾವಳಿ ಆಚರಿಸಿದ್ದರು. ಈ ವೇಳೆ ಮಾತನಾಡಿದ್ದ ಅವರು, ಸಶಸ್ತ್ರ ನಕ್ಸಲಿಸಂ ಅನ್ನು ಬಹುತೇಕ ನಿರ್ಮೂಲನೆ ಮಾಡಲಾಗಿದೆ. ಆದರೆ, ನಕ್ಸಲಿಸಂನ ಸೈದ್ಧಾಂತಿಕ ಬೆಂಬಲಿಗರಾದ ʻದಿಮಾಗಿ ನಕ್ಸಲರು’ ವಿವಿಧ ರಾಜಕೀಯ ಪಕ್ಷಗಳು ಹಾಗೂ ಸಂಘಟನೆಗಳಲ್ಲಿ ನುಸುಳಿದ್ದಾರೆ ಎಂದು ಆರೋಪಿಸಿದ್ದರು.

ದೇಶದ ಸಂವಿಧಾನ ಮತ್ತು ಪ್ರಜಾಪ್ರಭುತ್ವದ ವಿರುದ್ಧ ಜನರನ್ನು ಪ್ರಚೋದಿಸುತ್ತಿರುವ ಇಂತಹ ಶಕ್ತಿಗಳನ್ನು ಗುರುತಿಸಿ ಸೋಲಿಸಬೇಕು ಎಂದು ಕರೆ ನೀಡಿದ್ದರು.

ಪ್ರಧಾನಿ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ರಾಹುಲ್ ಗಾಂಧಿ, ತಮ್ಮ ಮೇಲಿನ ಆರೋಪಗಳನ್ನು ಬಹಿರಂಗ ಚರ್ಚೆಯ ಮೂಲಕ ಎದುರಿಸಲು ಸಿದ್ಧವಿರುವುದಾಗಿ ಪುನರುಚ್ಚರಿಸಿದ್ದಾರೆ. ಈ ಮೂಲಕ ಮೋದಿ ಮತ್ತು ರಾಹುಲ್ ನಡುವಿನ ರಾಜಕೀಯ ವಾಕ್ಸಮರ ಮತ್ತಷ್ಟು ತೀವ್ರಗೊಂಡಿದೆ.

The post ಯಾವುದೇ ಸಮಯ, ಸ್ಥಳದಲ್ಲಾದರೂ ಚರ್ಚೆಗೆ ಸಿದ್ಧ: ಮೋದಿ ವಿರುದ್ಧ ರಾಹುಲ್ ಗಾಂಧಿ ಮತ್ತೆ ವಾಗ್ದಾಳಿ appeared first on Samyukta Karnataka.

ನೋಟಿಸ್ ಹಿನ್ನೆಲೆಯಲ್ಲಿ ಮೊಬೈಲ್ ಹಾಗೂ ಲ್ಯಾಪ್‌ಟಾಪ್ ಸಮೇತ ವಿಚಾರಣೆಗೆ ಹಾಜರಾದ ಅವರನ್ನು ಪೊಲೀಸರು ಸುಮಾರು ಎರಡು ಗಂಟೆಗಳ ಕಾಲ ವಿಚಾರಣೆ ನಡೆಸಿದರು. ಮಧ್ಯಂತರ ನಿರೀಕ್ಷಣಾ ಜಾಮೀನು ಪಡೆದ ಬಳಿಕ ಅವರು ವಿಚಾರಣೆಗೆ ಹಾಜರಾಗಿದ್ದು, ನವೆಂಬರ್ 11ರಂದು ಮತ್ತೆ ಬರುವಂತೆ ಪೊಲೀಸರು ಸೂಚಿಸಿದ್ದಾರೆ.

ಈ ಕುರಿತು ಮಾತನಾಡಿದ ಕೃಪಾ ಆಳ್ವಾ ಪರ ವಕೀಲೆ ನಿಖಿತಾ, ಈಗಾಗಲೇ ಡಿಸಿಪಿ ಎದುರು ಎರಡು ಬಾರಿ ಹೇಳಿಕೆ ದಾಖಲಿಸಲಾಗಿದೆ. ಇಂದು ಅಧಿಕೃತವಾಗಿ ಹೇಳಿಕೆ ನೀಡಲು ನೋಟಿಸ್ ನೀಡಿದ್ದರಿಂದ ಹಾಜರಾಗಿದ್ದಾರೆ. ನಿರೀಕ್ಷಣಾ ಜಾಮೀನು ದೊರೆತ ಬಳಿಕ ಕೃಪಾ ಆಳ್ವಾ ಪ್ರಕರಣದ ಕುರಿತು ಸುದ್ದಿಗೋಷ್ಠಿ ನಡೆಸಿ ಮಾತನಾಡಲಿದ್ದಾರೆ ಎಂದು ತಿಳಿಸಿದರು.

The post ಸ್ಟಿಂಗ್ ಆಪರೇಷನ್ ಪ್ರಕರಣ: ಸಿಸಿಬಿ ವಿಚಾರಣೆಗೆ ಹಾಜರಾದ ಕೃಪಾ ಆಳ್ವಾ appeared first on Samyukta Karnataka.

ಕೇರಳದ ಎರ್ನಾಕುಲಂನಲ್ಲಿ ನಡೆದ ಮುಸ್ಲಿಂ ಯೂತ್ ಲೀಗ್ ರಾಜ್ಯ ಸಮ್ಮೇಳನದಲ್ಲಿ ಮಾತನಾಡಿದ ಅವರು, ಹತ್ಯೆ ಪ್ರಕರಣಗಳ ತನಿಖೆಯನ್ನು ರಾಜ್ಯ ಸರ್ಕಾರ ಗಂಭೀರವಾಗಿ ಪರಿಗಣಿಸಿದೆ. ತನಿಖೆಯ ಪ್ರಗತಿಯನ್ನು ಸರ್ಕಾರ ಸೂಕ್ಷ್ಮವಾಗಿ ಗಮನಿಸುತ್ತಿದ್ದು, ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಬದ್ಧವಾಗಿದೆ ಎಂದರು.

ಗೌರಿ ಲಂಕೇಶ್ ಮತ್ತು ಕಲಬುರ್ಗಿ ಹತ್ಯೆಗಳ ಹಿಂದೆ ಸಂಘಕ್ಕೆ ಸಂಬಂಧಿಸಿದ ವ್ಯಕ್ತಿಗಳಿದ್ದಾರೆ ಎಂಬ ಆರೋಪವನ್ನು ಪುನರುಚ್ಚರಿಸಿದ ಖರ್ಗೆ, ಪ್ರಕರಣಗಳ ತನಿಖೆಯಲ್ಲಿ ಯಾವುದೇ ನಿರ್ಲಕ್ಷ್ಯಕ್ಕೆ ಅವಕಾಶ ನೀಡುವುದಿಲ್ಲ. ಮುಂದಿನ ಆರು ತಿಂಗಳ ಅವಧಿಯಲ್ಲಿ ಆರೋಪಿಗಳ ಬಂಧನವಾಗುವ ನಿರೀಕ್ಷೆಯಿದೆ ಎಂದು ತಿಳಿಸಿದರು.

ಈ ಮೂಲಕ ಹಲವು ವರ್ಷಗಳಿಂದ ಚರ್ಚೆಯಲ್ಲಿರುವ ಈ ಎರಡೂ ಹತ್ಯೆ ಪ್ರಕರಣಗಳ ತನಿಖೆ ಮತ್ತೆ ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

The post ಗೌರಿ ಲಂಕೇಶ್, ಕಲಬುರ್ಗಿ ಹತ್ಯೆ ಹಿಂದೆ ಸಂಘ ಪರಿವಾರದವರ ಕೈವಾಡ appeared first on Samyukta Karnataka.

✍ ಲೇಖನ : ಹಜರತಅಲಿ ಪ್ಯಾಟಿಮನಿ

ಹುಬ್ಬಳ್ಳಿ : ಭಾಷೆ ಎನ್ನುವುದು ಕೇವಲ ಸಂವಹನದ ಸಾಧನವಲ್ಲ, ಅದು ಒಂದು ಸಮುದಾಯದ ಇತಿಹಾಸ, ಸಂಸ್ಕೃತಿ, ಭಾವನೆ ಮತ್ತು ಜೀವನಶೈಲಿಯ ಪ್ರತಿಬಿಂಬವೂ ಹೌದು. ಇಂತಹ ಶ್ರೀಮಂತ ಭಾಷಾ ಪರಂಪರೆಯನ್ನು ಹೊಂದಿರುವ ಉರ್ದು ಭಾಷೆಯ ಮಹತ್ವವನ್ನು ಸಾರುವ ಉದ್ದೇಶದಿಂದ ಪ್ರತಿವರ್ಷ ನವೆಂಬರ್ 9ರಂದು ವಿಶ್ವ ಉರ್ದು ದಿನವನ್ನು ಆಚರಿಸಲಾಗುತ್ತದೆ. ಮಹಾನ್ ಕವಿ, ತತ್ವಜ್ಞಾನಿ ಹಾಗೂ ಚಿಂತಕ ಅಲ್ಲಾಮಾ ಮುಹಮ್ಮದ್ ಇಕ್ಬಾಲ್ ಅವರ ಜನ್ಮದಿನದ ಸ್ಮರಣಾರ್ಥ ಈ ದಿನವನ್ನು ಆಚರಿಸಲಾಗುತ್ತದೆ.

2026ರ ನವೆಂಬರ್ 9ರಂದು ಇಕ್ಬಾಲ್ ಅವರ 149ನೇ ಜನ್ಮವಾರ್ಷಿಕೋತ್ಸವವೂ ಆಗಿದೆ. ಅವರು 1877ರ ನವೆಂಬರ್ 9ರಂದು ಇಂದಿನ ಪಾಕಿಸ್ತಾನದ ಸಿಯಾಲ್ಕೋಟ್‌ನಲ್ಲಿ ಜನಿಸಿದರು. ‘ಪೂರ್ವದ ಕವಿ’ ಎಂದೇ ಪ್ರಸಿದ್ಧರಾಗಿದ್ದ ಇಕ್ಬಾಲ್ ಅವರು ತಮ್ಮ ಕಾವ್ಯಗಳ ಮೂಲಕ ಆತ್ಮಗೌರವ, ಸ್ವಾಭಿಮಾನ, ಚಿಂತನೆ, ಮಾನವೀಯತೆ ಮತ್ತು ಸಾಮಾಜಿಕ ಜಾಗೃತಿಯ ಸಂದೇಶವನ್ನು ಸಾರಿದರು.

‘ಸಾರೆ ಜಹಾಂ ಸೆ ಅಚ್ಚಾ ಹಿಂದೋಸ್ತಾನ್ ಹಮಾರಾ’ ಎಂಬ ದೇಶಭಕ್ತಿ ಗೀತೆ ಅವರ ಜನಪ್ರಿಯ ರಚನೆಗಳಲ್ಲಿ ಒಂದಾಗಿದೆ. ‘ಬಾಂಗ್-ಎ-ದಾರಾ’, ‘ಬಾಲ್-ಎ-ಜಿಬ್ರೀಲ್’ ಸೇರಿದಂತೆ ಅವರ ಕೃತಿಗಳು ಉರ್ದು ಸಾಹಿತ್ಯದಲ್ಲಿ ಮಹತ್ವದ ಸ್ಥಾನ ಪಡೆದಿವೆ.

ಬಹುಸಂಸ್ಕೃತಿಯ ಮಡಿಲಲ್ಲಿ ಅರಳಿದ ಭಾಷೆ: ಭಾರತೀಯ ಉಪಖಂಡದ ಬಹುಭಾಷಾ ವಾತಾವರಣದಲ್ಲಿ ರೂಪುಗೊಂಡ ಉರ್ದು, ಇಂಡೋ-ಆರ್ಯನ್ ಭಾಷಾ ಕುಟುಂಬಕ್ಕೆ ಸೇರಿದೆ. ಹಿಂದಿಯೊಂದಿಗೆ ಸಾಮಾನ್ಯ ಭಾಷಾ ಮೂಲ ಹೊಂದಿರುವ ಇದು ಪರ್ಷಿಯನ್, ಅರೇಬಿಕ್ ಹಾಗೂ ತುರ್ಕಿ ಭಾಷೆಗಳ ಪ್ರಭಾವದಿಂದ ವಿಶಿಷ್ಟ ಸ್ವರೂಪ ಪಡೆದುಕೊಂಡಿದೆ. ದೆಹಲಿ ಸುಲ್ತಾನರು ಮತ್ತು ಮೊಘಲರ ಕಾಲದಲ್ಲಿ ಭಾಷೆಯ ಬೆಳವಣಿಗೆಗೆ ವೇಗ ದೊರೆಯಿತು. ನಸ್ತಾಲಿಕ್ ಲಿಪಿಯಲ್ಲಿ ಬಲದಿಂದ ಎಡಕ್ಕೆ ಬರೆಯುವ ಉರ್ದು, ತನ್ನ ವಿಶಿಷ್ಟ ಶೈಲಿಯಿಂದ ಸಾಹಿತ್ಯ ಲೋಕದಲ್ಲಿ ಗುರುತಿಸಿಕೊಂಡಿದೆ.

ಗಜಲ್‌ಗಳ ಮಧುರತೆ, ಸಾಹಿತ್ಯದ ಶ್ರೀಮಂತಿಕೆ: ಗಜಲ್, ಶಾಯರಿ, ನಜ್ಮ್, ಮರ್ಸಿಯಾ ಮತ್ತು ಕಾದಂಬರಿಗಳು ಉರ್ದು ಸಾಹಿತ್ಯದ ಪ್ರಮುಖ ಪ್ರಕಾರಗಳು. ಮಿರ್ಜಾ ಗಾಲಿಬ್, ಮಿರ್ ತಖಿ ಮಿರ್, ಫೈಜ್ ಅಹ್ಮದ್ ಫೈಜ್, ಹಾಲಿ ಮತ್ತು ಇಕ್ಬಾಲ್ ಅವರ ಸಾಹಿತ್ಯಿಕ ಕೊಡುಗೆ ಭಾಷೆಯ ಕೀರ್ತಿಯನ್ನು ವಿಶ್ವದಾದ್ಯಂತ ಪಸರಿಸಿದೆ. ಪ್ರೀತಿ, ವಿರಹ, ಪ್ರಕೃತಿ, ದೇಶಪ್ರೇಮ, ಸಾಮಾಜಿಕ ನ್ಯಾಯ ಹಾಗೂ ಮಾನವೀಯತೆ ಉರ್ದು ಸಾಹಿತ್ಯದ ಜೀವಾಳವಾಗಿವೆ.

ಕರ್ನಾಟಕದಲ್ಲೂ ಉರ್ದುವಿನ ಸಾಂಸ್ಕೃತಿಕ ಹೆಜ್ಜೆಗುರುತು: ಕರ್ನಾಟಕದ ಬೀದರ್, ಕಲಬುರಗಿ, ವಿಜಯಪುರ, ರಾಯಚೂರು, ಬೆಂಗಳೂರು ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಉರ್ದು ಭಾಷೆ ಶಿಕ್ಷಣ, ಸಾಹಿತ್ಯ, ಪತ್ರಿಕೋದ್ಯಮ ಮತ್ತು ಕಲಾ ಕ್ಷೇತ್ರಗಳಲ್ಲಿ ತನ್ನದೇ ಆದ ಛಾಪು ಮೂಡಿಸಿದೆ. ಈ ಬಾರಿ ಬೆಂಗಳೂರಿನ ವಿಧಾನಸೌಧದ ಮೆಟ್ಟಿಲುಗಳ ಮೇಲೆ ಉರ್ದು ಉತ್ಸವ ಆಯೋಜಿಸುವ ರಾಜ್ಯ ಸರ್ಕಾರದ ಯೋಜನೆ ವಿಶೇಷ ಗಮನ ಸೆಳೆದಿದೆ. ಭಾಷೆಯ ಜೊತೆಗೆ ಅದರ ಆಹಾರ, ಕಲೆ, ಸಂಪ್ರದಾಯ ಮತ್ತು ಸಾಂಸ್ಕೃತಿಕ ವೈವಿಧ್ಯತೆಯನ್ನು ಎಲ್ಲ ಸಮುದಾಯಗಳಿಗೂ ಪರಿಚಯಿಸುವುದು ಈ ಪ್ರಯತ್ನದ ಆಶಯವಾಗಿದೆ.

ಡಿಜಿಟಲ್ ಯುಗದಲ್ಲಿ ಹೊಸ ಸವಾಲು, ಹೊಸ ಅವಕಾಶ: ಉರ್ದು ಪುಸ್ತಕಗಳು, ಹಸ್ತಪ್ರತಿಗಳು ಮತ್ತು ಅಪರೂಪದ ಸಾಹಿತ್ಯವನ್ನು ಡಿಜಿಟಲ್ ರೂಪದಲ್ಲಿ ಸಂರಕ್ಷಿಸುವುದು ಇಂದಿನ ಅಗತ್ಯವಾಗಿದೆ. ಯುನಿಕೋಡ್, ಇ-ಪುಸ್ತಕಗಳು, ಆನ್‌ಲೈನ್ ಗ್ರಂಥಾಲಯಗಳು ಮತ್ತು ಭಾಷಾ ಕಲಿಕಾ ವೇದಿಕೆಗಳು ಹೊಸ ತಲೆಮಾರಿಗೆ ಉರ್ದುವನ್ನು ತಲುಪಿಸುವ ಅವಕಾಶ ಕಲ್ಪಿಸಿವೆ. ರಾಷ್ಟ್ರೀಯ ಉರ್ದು ಭಾಷಾ ಉತ್ತೇಜನ ಮಂಡಳಿಯೂ ಪ್ರಕಟಣೆ, ಶಿಕ್ಷಣ ಮತ್ತು ಡಿಜಿಟಲ್ ಸಂಪನ್ಮೂಲಗಳ ಮೂಲಕ ಭಾಷೆಯ ಅಭಿವೃದ್ಧಿಗೆ ಶ್ರಮಿಸುತ್ತಿದೆ. ಆದರೆ, ಯುವಜನರಲ್ಲಿ ಓದುವ ಹವ್ಯಾಸ ಬೆಳೆಸುವುದು, ಉರ್ದು ಲಿಪಿಯ ಕಲಿಕೆಗೆ ಪ್ರೋತ್ಸಾಹ ನೀಡುವುದು ಮತ್ತು ತಂತ್ರಜ್ಞಾನದಲ್ಲಿ ಭಾಷೆಯ ಬಳಕೆಯನ್ನು ವಿಸ್ತರಿಸುವುದು ಇನ್ನೂ ಸವಾಲಾಗಿ ಉಳಿದಿದೆ.

ಭಾಷೆ ಉಳಿದರೆ ಸಂಸ್ಕೃತಿ ಉಳಿಯುತ್ತದೆ: ವಿಶ್ವ ಉರ್ದು ದಿನವು ಕೇವಲ ಒಂದು ಭಾಷೆಯ ಸಂಭ್ರಮವಲ್ಲ; ಪರಸ್ಪರ ಗೌರವ, ಸಹಬಾಳ್ವೆ ಮತ್ತು ಸಾಂಸ್ಕೃತಿಕ ಏಕತೆಯ ಸಂಕೇತವೂ ಹೌದು. ಉರ್ದು ಒಂದು ನಿರ್ದಿಷ್ಟ ಧರ್ಮ ಅಥವಾ ಸಮುದಾಯಕ್ಕೆ ಸೀಮಿತವಲ್ಲ. ಅದು ಎಲ್ಲರಿಗೂ ಸೇರಿದ ಸಾಹಿತ್ಯಿಕ ಮತ್ತು ಸಾಂಸ್ಕೃತಿಕ ಸಂಪತ್ತು. ಭಾಷೆಗಳ ನಡುವಿನ ಗೋಡೆಗಳನ್ನು ಕೆಡವಿ, ಸೌಹಾರ್ದದ ಸೇತುವೆಗಳನ್ನು ನಿರ್ಮಿಸುವ ಸಂಕಲ್ಪದೊಂದಿಗೆ ಉರ್ದು ಸಾಹಿತ್ಯವನ್ನು ಮುಂದಿನ ಪೀಳಿಗೆಗೆ ತಲುಪಿಸೋಣ. ಭಾಷಾ ವೈವಿಧ್ಯತೆಯೇ ಭಾರತದ ಶಕ್ತಿ, ಪ್ರತಿಯೊಂದು ಭಾಷೆಯ ಗೌರವವೇ ನಮ್ಮ ಸಂಸ್ಕೃತಿಯ ಹೆಮ್ಮೆ.

ಎಲ್ಲ ಭಾಷೆಗಳಿಗೂ ಗೌರವ, ಎಲ್ಲ ಸಂಸ್ಕೃತಿಗಳಿಗೂ ಮಾನ್ಯತೆ ಎಂಬ ಆಶಯದೊಂದಿಗೆ ಎಲ್ಲರಿಗೂ ವಿಶ್ವ ಉರ್ದು ದಿನದ ಹಾರ್ದಿಕ ಶುಭಾಶಯಗಳು.

• ಲಸಿಕೆಯೇ ಜೀವ ರಕ್ಷಣೆಯ ಕವಚ: ಲಸಿಕೆ ತಪ್ಪಿಸದಿರಲು ಜಾಗೃತಿ ಅಗತ್ಯ
• ಅನಕ್ಷರಸ್ಥರಿಗೆ ಎಡಗೈಯಿಂದ ಅರ್ಜಿ ಬರೆದುಕೊಡುವ ಪುಣ್ಯಾತ್ಮ..
• ‘ಪುಲಿಮುರುಗನ್’ ಹಿಂದಿನ ದೃಶ್ಯ ಮಾಂತ್ರಿಕ ಶಾಜಿ ಕುಮಾರ್ ಇನ್ನಿಲ್ಲ
• ಗ್ರಾಮ ಸ್ವಾವಲಂಬನೆಯ ಕನಸಿಗೆ ಜೀವ ತುಂಬಿದ ಬಂಕರ್ ರಾಯ್ ನಿಧನ
• ಕೋಟೆನಗರಿ ದೀಪಾವಳಿಯ ಕಳೆ ಹೆಚ್ಚಿಸುವ ಕ್ವಾಟಿ..!

The post ಗಜಲ್, ಶಾಯರಿ, ಸಾಹಿತ್ಯದ ಸೊಬಗು: ಇಂದು ವಿಶ್ವ ಉರ್ದು ದಿನ appeared first on Samyukta Karnataka.

ನವದೆಹಲಿ: ಭಾರತದಲ್ಲಿ ಆಶ್ರಯ ಪಡೆದಿರುವ ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ ತಾಯ್ನಾಡಿಗೆ ಮರಳುವ ಸಿದ್ಧತೆಯ ಭಾಗವಾಗಿ ಹೊಸ ಪಾಸ್‌ಪೋರ್ಟ್ ಮತ್ತು ರಾಷ್ಟ್ರೀಯ ಗುರುತಿನ ಚೀಟಿಗಾಗಿ (NID) ಅರ್ಜಿ ಸಲ್ಲಿಸಿದ್ದಾರೆ. ಲಂಡನ್‌ನ ಮ್ಯಾಟ್ರಿಕ್ಸ್ ಚೇಂಬರ್ಸ್‌ನಲ್ಲಿರುವ ಅವರ ವಕೀಲರು ನವೆಂಬರ್ 9ರಂದು ನವದೆಹಲಿಯ ಬಾಂಗ್ಲಾದೇಶ ಹೈಕಮಿಷನ್‌ಗೆ ಪತ್ರ ಬರೆದು ಈ ದಾಖಲೆಗಳನ್ನು ಶೀಘ್ರವಾಗಿ ಒದಗಿಸುವಂತೆ ಮನವಿ ಮಾಡಿದ್ದಾರೆ.

ರಾಯಿಟರ್ಸ್ ವರದಿ ಮಾಡಿರುವ ಈ ಬೆಳವಣಿಗೆ, ಹಸೀನಾ ಡಿಸೆಂಬರ್‌ನಲ್ಲಿ ಬಾಂಗ್ಲಾದೇಶಕ್ಕೆ ಮರಳುವ ಉದ್ದೇಶ ಹೊಂದಿರುವುದರ ಸ್ಪಷ್ಟ ಸೂಚನೆಯಾಗಿದೆ.

ಹಳೆಯ ಪಾಸ್‌ಪೋರ್ಟ್ ರದ್ದತಿ – ಹೊಸ ದಾಖಲೆಗಳಿಗೆ ಮನವಿ : ಬಾಂಗ್ಲಾದೇಶದ ಮಧ್ಯಂತರ ಸರ್ಕಾರ ಮತ್ತು ಇತರ ಅಧಿಕಾರಿಗಳು ತಮ್ಮ ಕಕ್ಷಿದಾರರ ಹಳೆಯ ಪಾಸ್‌ಪೋರ್ಟ್ ಹಾಗೂ ರಾಷ್ಟ್ರೀಯ ಗುರುತಿನ ಚೀಟಿಯನ್ನು ರದ್ದುಗೊಳಿಸಿದ್ದಾರೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ ಹೊಸ ದಾಖಲೆಗಳನ್ನು ನೀಡುವಂತೆ ವಕೀಲರು ಪತ್ರದಲ್ಲಿ ಕೋರಿದ್ದಾರೆ. ಬಾಂಗ್ಲಾದೇಶದ ಪ್ರಜೆಯಾಗಿರುವ ಹಸೀನಾ ಅವರಿಗೆ ದಾಖಲೆಗಳನ್ನು ಒದಗಿಸುವುದು ದೇಶದ ಅಂತರರಾಷ್ಟ್ರೀಯ ಮಾನವ ಹಕ್ಕುಗಳ ಬದ್ಧತೆಗಳಿಗೆ ಅನುಗುಣವಾಗಿರಬೇಕು ಎಂದೂ ಮನವಿಯಲ್ಲಿ ಉಲ್ಲೇಖಿಸಲಾಗಿದೆ.

ನವದೆಹಲಿಯಲ್ಲಿರುವ ಬಾಂಗ್ಲಾದೇಶ ಹೈಕಮಿಷನ್‌ನ ಹಂಗಾಮಿ ಹೈಕಮಿಷನರ್ ಪ್ರೀತಿ ರಹಮಾನ್ ಅವರಿಗೆ ಈ ಪತ್ರವನ್ನು ಸಲ್ಲಿಸಲಾಗಿದೆ ಎಂದು ತಿಳಿದುಬಂದಿದೆ.

ಡಿಸೆಂಬರ್‌ನಲ್ಲಿ ತಾಯ್ನಾಡಿಗೆ ಮರಳುವ ಉದ್ದೇಶ : 2024ರ ಆಗಸ್ಟ್‌ನಲ್ಲಿ ಬಾಂಗ್ಲಾದೇಶದಲ್ಲಿ ವಿದ್ಯಾರ್ಥಿಗಳ ನೇತೃತ್ವದಲ್ಲಿ ನಡೆದ ಭಾರೀ ಪ್ರತಿಭಟನೆ ಹಿಂಸಾತ್ಮಕ ಸ್ವರೂಪ ಪಡೆದುಕೊಂಡ ಹಿನ್ನೆಲೆಯಲ್ಲಿ ಶೇಖ್ ಹಸೀನಾ ಪ್ರಧಾನಿ ಸ್ಥಾನಕ್ಕೆ ರಾಜೀನಾಮೆ ನೀಡಿ ಭಾರತಕ್ಕೆ ಆಗಮಿಸಿದ್ದರು. ಸುಮಾರು 15 ವರ್ಷಗಳ ಕಾಲ ನಿರಂತರವಾಗಿ ಅಧಿಕಾರದಲ್ಲಿದ್ದ ಅವರ ಆಡಳಿತವು ಪ್ರತಿಭಟನೆಗಳ ಬಳಿಕ ಅಂತ್ಯಗೊಂಡಿತ್ತು.

ಇದೀಗ ಡಿಸೆಂಬರ್‌ನಲ್ಲಿ ಬಾಂಗ್ಲಾದೇಶಕ್ಕೆ ಮರಳಿ ನ್ಯಾಯಾಲಯದ ಮುಂದೆ ಶರಣಾಗುವ ಉದ್ದೇಶ ಹೊಂದಿರುವುದಾಗಿ ಹಸೀನಾ ಈ ಹಿಂದೆ ತಿಳಿಸಿದ್ದಾರೆ. ಅಗತ್ಯ ಔಪಚಾರಿಕ ಪ್ರಕ್ರಿಯೆಗಳು ಪೂರ್ಣಗೊಂಡ ಬಳಿಕ ವಾಪಸಾಗುವ ದಿನಾಂಕವನ್ನು ಪ್ರಕಟಿಸಲಾಗುವುದು ಎಂದು ಅವರ ಸಹಾಯಕರು ನವೆಂಬರ್ 9ರಂದು ತಿಳಿಸಿದ್ದಾರೆ.

ಮರಣದಂಡನೆ ಶಿಕ್ಷೆ – ಆರೋಪ ನಿರಾಕರಿಸಿರುವ ಹಸೀನಾ : 2024ರ ವಿದ್ಯಾರ್ಥಿ ಪ್ರತಿಭಟನೆಯ ಸಂದರ್ಭದಲ್ಲಿ ಪ್ರತಿಭಟನಾಕಾರರ ವಿರುದ್ಧ ನಡೆದ ಮಾರಕ ದಮನ ಕಾರ್ಯಾಚರಣೆಗೆ ಸಂಬಂಧಿಸಿದ ಮಾನವತೆಯ ವಿರುದ್ಧದ ಅಪರಾಧಗಳ ಪ್ರಕರಣದಲ್ಲಿ ಬಾಂಗ್ಲಾದೇಶದ ಅಂತಾರಾಷ್ಟ್ರೀಯ ಅಪರಾಧಗಳ ನ್ಯಾಯಮಂಡಳಿ 2025ರ ನವೆಂಬರ್‌ನಲ್ಲಿ ಹಸೀನಾ ಅವರಿಗೆ ಗೈರುಹಾಜರಿಯಲ್ಲಿ ಮರಣದಂಡನೆ ವಿಧಿಸಿತ್ತು. ಪ್ರತಿಭಟನಾಕಾರರ ಮೇಲಿನ ದೌರ್ಜನ್ಯಕ್ಕೆ ಆದೇಶ ನೀಡಿದ ಆರೋಪವನ್ನು ಹಸೀನಾ ನಿರಾಕರಿಸಿದ್ದಾರೆ. ವಿಚಾರಣೆಯ ನ್ಯಾಯಸಮ್ಮತತೆಯ ಬಗ್ಗೆಯೂ ಅವರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಹಸ್ತಾಂತರಕ್ಕೆ ಬಾಂಗ್ಲಾದೇಶ ಪಟ್ಟು – ಭಾರತದ ನಿಲುವಿನತ್ತ ಗಮನ : ಹಸೀನಾ ಅವರ ವಾಪಸಾತಿ ವಿಚಾರದಲ್ಲಿ ಬಾಂಗ್ಲಾದೇಶ ಸರ್ಕಾರವು ಹೊಸ ಪಾಸ್‌ಪೋರ್ಟ್ ನೀಡುವುದಕ್ಕಿಂತ ಭಾರತದಿಂದ ಹಸ್ತಾಂತರಿಸುವ ಪ್ರಕ್ರಿಯೆಗೆ ಆದ್ಯತೆ ನೀಡುತ್ತಿದೆ. ಉಭಯ ದೇಶಗಳ ನಡುವೆ ಹಸ್ತಾಂತರ ಒಪ್ಪಂದ ಜಾರಿಯಲ್ಲಿದ್ದು, ಅದರ ಅಡಿಯಲ್ಲಿ ಹಸೀನಾ ಅವರನ್ನು ಹಸ್ತಾಂತರಿಸುವಂತೆ ಬಾಂಗ್ಲಾದೇಶ ಮನವಿ ಮಾಡಿದೆ ಎಂದು ಅಲ್ಲಿನ ವಿದೇಶಾಂಗ ಇಲಾಖೆಯ ರಾಜ್ಯ ಸಚಿವರು ತಿಳಿಸಿದ್ದಾರೆ.

ಭಾರತವು ಬಾಂಗ್ಲಾದೇಶದ ಹಸ್ತಾಂತರ ಮನವಿಯನ್ನು ಕಾನೂನು ಮತ್ತು ರಾಜತಾಂತ್ರಿಕ ಪ್ರಕ್ರಿಯೆಗಳ ಪ್ರಕಾರ ಪರಿಶೀಲಿಸುತ್ತಿದೆ. ಈವರೆಗೆ ಹಸೀನಾ ಅವರನ್ನು ಹಸ್ತಾಂತರಿಸುವ ಕುರಿತು ಭಾರತದ ಅಂತಿಮ ನಿರ್ಧಾರ ಪ್ರಕಟವಾಗಿಲ್ಲ. ಹೀಗಾಗಿ ಹೊಸ ಪಾಸ್‌ಪೋರ್ಟ್ ಮತ್ತು ಗುರುತಿನ ಚೀಟಿಗೆ ಸಲ್ಲಿಸಿರುವ ಮನವಿ, ಬಾಂಗ್ಲಾದೇಶದ ಹಸ್ತಾಂತರ ಬೇಡಿಕೆ ಹಾಗೂ ಹಸೀನಾ ಅವರ ಡಿಸೆಂಬರ್ ವಾಪಸಾತಿ ಯೋಜನೆ ಮುಂದಿನ ದಿನಗಳಲ್ಲಿ ಭಾರತ–ಬಾಂಗ್ಲಾದೇಶ ಸಂಬಂಧಗಳಲ್ಲಿಯೂ ಮಹತ್ವದ ಬೆಳವಣಿಗೆಯಾಗುವ ಸಾಧ್ಯತೆಯಿದೆ.

• ಲಸಿಕೆಯೇ ಜೀವ ರಕ್ಷಣೆಯ ಕವಚ: ಲಸಿಕೆ ತಪ್ಪಿಸದಿರಲು ಜಾಗೃತಿ ಅಗತ್ಯ
• ಅನಕ್ಷರಸ್ಥರಿಗೆ ಎಡಗೈಯಿಂದ ಅರ್ಜಿ ಬರೆದುಕೊಡುವ ಪುಣ್ಯಾತ್ಮ..
• ‘ಪುಲಿಮುರುಗನ್’ ಹಿಂದಿನ ದೃಶ್ಯ ಮಾಂತ್ರಿಕ ಶಾಜಿ ಕುಮಾರ್ ಇನ್ನಿಲ್ಲ
• ಗ್ರಾಮ ಸ್ವಾವಲಂಬನೆಯ ಕನಸಿಗೆ ಜೀವ ತುಂಬಿದ ಬಂಕರ್ ರಾಯ್ ನಿಧನ
• ಕೋಟೆನಗರಿ ದೀಪಾವಳಿಯ ಕಳೆ ಹೆಚ್ಚಿಸುವ ಕ್ವಾಟಿ..!

The post ಬಾಂಗ್ಲಾದೇಶಕ್ಕೆ ಮರಳಲು ಶೇಖ್ ಹಸೀನಾ ಸಿದ್ಧತೆ: ಹೊಸ ಪಾಸ್‌ಪೋರ್ಟ್, ರಾಷ್ಟ್ರೀಯ ಗುರುತಿನ ಚೀಟಿಗೆ ಅರ್ಜಿ! appeared first on Samyukta Karnataka.

ಇಂಡಿಗೊ ಸಂಸ್ಥೆಯ 6ಇ-451 ಸಂಖ್ಯೆಯ ವಿಮಾನ ಶನಿವಾರ ಸಂಜೆ 5.50ಕ್ಕೆ 178 ಪ್ರಯಾಣಿಕರನ್ನು ಹೊತ್ತು ಲಖನೌಗೆ ಪ್ರಯಾಣ ಬೆಳೆಸಿತ್ತು. ವಿಮಾನ ಟೇಕಾಫ್ ಆದ ಬಳಿಕ ಸಿಬ್ಬಂದಿ ಶೌಚಾಲಯ ಪರಿಶೀಲಿಸಿದಾಗ ಕೈಬರಹದ ಪತ್ರವೊಂದು ಪತ್ತೆಯಾಗಿದೆ. ಅದರಲ್ಲಿ ಸಂಜೆ 6.30ಕ್ಕೆ ವಿಮಾನವನ್ನು ಅಪಹರಿಸುವುದಾಗಿ ಬೆದರಿಕೆ ಹಾಕಲಾಗಿತ್ತು ಎನ್ನಲಾಗಿದೆ.

ಬೆದರಿಕೆ ಸಂದೇಶವನ್ನು ಗಂಭೀರವಾಗಿ ಪರಿಗಣಿಸಿದ ವಿಮಾನ ಸಿಬ್ಬಂದಿ ತಕ್ಷಣ ಪೈಲಟ್‌ಗೆ ಮಾಹಿತಿ ನೀಡಿದ್ದಾರೆ. ಕೂಡಲೇ ಏರ್ ಟ್ರಾಫಿಕ್ ಕಂಟ್ರೋಲ್ (ಎಟಿಸಿ) ಅಧಿಕಾರಿಗಳೊಂದಿಗೆ ಸಂಪರ್ಕ ಸಾಧಿಸಿದ ಪೈಲಟ್, ವಿಮಾನವನ್ನು ಮೂಲ ನಿಲ್ದಾಣವಾದ ಕೆಐಎಎಲ್‌ಗೆ ಮರಳಿಸಿದ್ದಾರೆ.

ವಿಮಾನವನ್ನು ತುರ್ತಾಗಿ ಇಳಿಸುವ ನಿರ್ಧಾರದಿಂದ ಪ್ರಯಾಣಿಕರಲ್ಲಿ ಆತಂಕ ಮನೆಮಾಡಿತ್ತು. ವಿಮಾನ ನಿಲ್ದಾಣದ ಭದ್ರತಾ ಸಿಬ್ಬಂದಿಯೂ ತಕ್ಷಣ ಕಾರ್ಯಪ್ರವೃತ್ತರಾಗಿದ್ದು, ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡರು.

The post ವಿಮಾನದ ಶೌಚಾಲಯದಲ್ಲಿ ಸಿಕ್ತು ಹೈಜಾಕ್ ಪತ್ರ: ವಿಮಾನ ತುರ್ತು ಭೂಸ್ಪರ್ಶ appeared first on Samyukta Karnataka.

ಹಾಸನಾಂಬೆ ದೇವಿಯ ದರ್ಶನ ಪಡೆದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಜಿಲ್ಲಾಧಿಕಾರಿ ಅವರ ಪಿಎ ಶಶಿಕಿರಣ್ ಅವರಿಗೆ ಸಂಬಂಧಿಸಿದ್ದು ಎನ್ನಲಾದ ವಾಟ್ಸ್‌ಆ್ಯಪ್ ಚಾಟ್‌ಗಳ ದಾಖಲೆಗಳನ್ನು ಪ್ರದರ್ಶಿಸಿದರು. ಮೂರು ಕ್ರಷರ್‌ಗಳ ವಿಚಾರವಾಗಿ ಲಂಚದ ಹಣದ ಕುರಿತು ಚರ್ಚೆ ನಡೆದಿದೆ ಎಂದು ಆರೋಪಿಸಿದರು.

ಇದು ಕೇವಲ ಹಾಸನ ಜಿಲ್ಲೆಗೆ ಸೀಮಿತವಾದ ಪ್ರಕರಣವಲ್ಲ. ಇಂತಹ ವ್ಯವಹಾರಗಳು ಬೇರೆಡೆಯೂ ನಡೆಯುತ್ತಿವೆ. ಈ ಪ್ರಕರಣದಲ್ಲಿ ಸಂಬಂಧಪಟ್ಟವರ ಫೋನ್‌ಗಳನ್ನು ವಶಕ್ಕೆ ಪಡೆದು ತನಿಖೆ ನಡೆಸುವ ಧೈರ್ಯ ಸರ್ಕಾರಕ್ಕಿದೆಯೇ ಎಂದು ಪ್ರಶ್ನಿಸಿದರು. ಮುಖ್ಯಮಂತ್ರಿ ಈ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಿ ತನಿಖೆಗೆ ಮುಂದಾಗಬೇಕು ಎಂದು ಆಗ್ರಹಿಸಿದರು.

ಇದೇ ವೇಳೆ ರಾಜ್ಯ ಸರ್ಕಾರ ಸಾರಿಗೆ ದರ ಏರಿಕೆ ಮಾಡಿರುವ ನಿರ್ಧಾರವನ್ನೂ ಖಂಡಿಸಿದ ಕುಮಾರಸ್ವಾಮಿ, ಜನಸಾಮಾನ್ಯರ ಮೇಲೆ ಮತ್ತಷ್ಟು ಆರ್ಥಿಕ ಹೊರೆ ಹೇರುವುದು ಸರಿಯಲ್ಲ ಎಂದು ಟೀಕಿಸಿದರು.

ಡಿಕೆಶಿ ಪೂಜೆ ಬಗ್ಗೆಯೂ ಎಚ್‌ಡಿಕೆ ವ್ಯಂಗ್ಯ: ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರು ಹಾಸನಾಂಬೆ ದರ್ಶನ ಪಡೆದು, ಪುರದಮ್ಮ ದೇವಾಲಯದಲ್ಲಿ ವಿಶೇಷ ಪೂಜೆ ಸಲ್ಲಿಸಿ ಹರಕೆ ತೀರಿಸಲಿದ್ದಾರೆ ಎಂಬ ವಿಚಾರಕ್ಕೂ ಕುಮಾರಸ್ವಾಮಿ ವ್ಯಂಗ್ಯವಾಡಿದರು.

ರಾಜ್ಯದ ಜನರಿಗೆ ಒಳ್ಳೆಯದಾಗಲಿ ಎಂದು ಹರಕೆ ಸಲ್ಲಿಸುತ್ತಿದ್ದಾರೆಯೇ? ಅಥವಾ ತಮ್ಮ ವಿರುದ್ಧ ಮಾತನಾಡುವವರಿಗೆ ಕೆಡುಕಾಗಲಿ ಎಂದು ಬಲಿ ಕೊಡುತ್ತಿದ್ದಾರೆಯೇ? ಇಲ್ಲವೇ ತಮ್ಮ ಅಧಿಕಾರ ಉಳಿಸಿಕೊಳ್ಳಲು ಪೂಜೆ ಮಾಡಿಸುತ್ತಿದ್ದಾರೆಯೇ ಎಂದು ಲೇವಡಿ ಮಾಡಿದರು.

ಈ ಮೂಲಕ ಹಾಸನದಲ್ಲಿ ಭ್ರಷ್ಟಾಚಾರದ ಆರೋಪಗಳ ಜತೆಗೆ ಮುಖ್ಯಮಂತ್ರಿ ಅವರ ಧಾರ್ಮಿಕ ಭೇಟಿಯ ವಿಚಾರವನ್ನೂ ಪ್ರಸ್ತಾಪಿಸಿ ಕುಮಾರಸ್ವಾಮಿ ರಾಜ್ಯ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು.

The post ಹಾಸನ ಡಿಸಿ ಕಚೇರಿಯಲ್ಲಿ ಲಂಚದ ವ್ಯವಹಾರ? ಸರ್ಕಾರದ ವಿರುದ್ಧ ಎಚ್‌ಡಿಕೆ ಗಂಭೀರ ಆರೋಪ appeared first on Samyukta Karnataka.

ಬ್ಯಾನರ್‌ಗಳಲ್ಲಿ, ‘ಹೌದು, ನಾವು ಬಲಿತ ದಲಿತನೇ ಸುಮಾರಣ್ಣ. ನಾನು ಬೆಳೆದಿದ್ದು ನಮ್ಮ ಸಂವಿಧಾನ ಮತ್ತು ಕಾಂಗ್ರೆಸ್‌ನಿಂದಲೇ; ನಿಮ್ಮ ಮನೆಯ ಆಲೂಗಡ್ಡೆಯಿಂದಲ್ಲ’ ಎಂದು ಬರೆಯಲಾಗಿದೆ.

ಕುಮಾರಸ್ವಾಮಿ ಅವರ ಹೇಳಿಕೆಗೆ ಪ್ರತಿಕ್ರಿಯೆಯಾಗಿ ಅಳವಡಿಸಿರುವ ಈ ಬ್ಯಾನರ್‌ಗಳು ರಾಜಕೀಯ ವಲಯದಲ್ಲಿ ಗಮನ ಸೆಳೆದಿವೆ. ಮೀಸಲಾತಿ ವಿಚಾರವಾಗಿ ಆರಂಭವಾದ ವಾಕ್ಸಮರ ಇದೀಗ ಬ್ಯಾನರ್ ಸಮರದ ರೂಪ ಪಡೆದುಕೊಂಡಿದೆ.

The post ʻಹೌದು, ನಾವು ಬಲಿತ ದಲಿತರು’ – ಬೆಂಗಳೂರಿನಲ್ಲಿ ಪೋಸ್ಟರ್ ವಾರ್ appeared first on Samyukta Karnataka.