ಅನಿಲ್ ಗುಮ್ಮಘಟ್ಟ
ಮುಂಬೈ: ಕಾರು ಪ್ರಿಯರು ಕಾತುರದಿಂದ ಕಾಯುತ್ತಿದ್ದ ಐಕಾನಿಕ್ ಎಸ್‌ಯುವಿ ಟಾಟಾ ಸಿಯೆರಾ ಕೊನೆಗೂ ಹೊಸ ರೂಪದಲ್ಲಿ ಮಾರುಕಟ್ಟೆಗೆ ಭರ್ಜರಿ ಎಂಟ್ರಿ ಕೊಟ್ಟಿದೆ. ಇದು ಟಾಟಾ ಮೋಟಾರ್ಸ್‌ನ ಅತ್ಯಂತ ಜನಪ್ರಿಯ ಮತ್ತು ಐತಿಹಾಸಿಕ ಮಾದರಿಗಳಲ್ಲಿ ಒಂದಾಗಿದೆ. ಈ ಹೊಸ ಸಿಯೆರಾದ ಆರಂಭಿಕ ಎಕ್ಸ್-ಶೋರೂಂ ಬೆಲೆ 11.49 ಲಕ್ಷ ರೂ. ಎಂದು ನಿಗದಿಪಡಿಸಲಾಗಿದೆ. ವಿಶೇಷವಾಗಿ, ಹಳೆಯ ಸಿಯೆರಾದ ವಿನ್ಯಾಸವನ್ನು ನೆನಪಿಸುವಂತೆ, ಆದರೆ ಸಂಪೂರ್ಣವಾಗಿ ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ನವೀಕರಿಸಿದ ವೈಶಿಷ್ಟ್ಯಗಳೊಂದಿಗೆ ಈ ವಾಹನವನ್ನು ವಿನ್ಯಾಸಗೊಳಿಸಲಾಗಿದೆ.
ಆಸಕ್ತ ಗ್ರಾಹಕರಿಗೆ ಅಧಿಕೃತ ಬುಕಿಂಗ್ ಪ್ರಕ್ರಿಯೆಯು ಡಿಸೆಂಬರ್ 16ರಿಂದ ಪ್ರಾರಂಭವಾಗಲಿದೆ. ವಾಹನಗಳ ವಿತರಣೆಗಳು ಮುಂದಿನ ವರ್ಷದ 2026ರ ಜನವರಿ 15ರಿಂದ ಶುರುವಾಗಲಿವೆ. ಹೊಸ ಟಾಟಾ ಸಿಯೆರಾ ಹಳೆಯ ಮಾದರಿಯನ್ನು ನೆನಪಿಸುವ ಬಾಕ್ಸಿಯಾದ ವಿನ್ಯಾಸವನ್ನು ಹೊಂದಿದೆ. ಇದರ ವಿಶೇಷತೆಗಳಲ್ಲಿ ಫ್ಲಾಟ್ ಆಲ್ಪೈನ್-ಸ್ಟೈಲ್ ಗ್ಲಾಸ್ ರೂಫ್, ಫುಲ್-ಎಲ್‌ಇಡಿ ಲೈಟಿಂಗ್, ಹೊಸ ಫ್ರಂಟ್ ಗ್ರಿಲ್ ಮತ್ತು ದೊಡ್ಡ 19-ಇಂಚಿನ ಅಲಾಯ್ ವೀಲ್ಸ್ ಸೇರಿವೆ.
ಹೊಸ ಸಿಯೆರಾ 4.6 ಮೀಟರ್ ಉದ್ದ ಮತ್ತು 2.7 ಮೀಟರ್ ವೀಲ್‌ಬೇಸ್ ಹೊಂದಿದ್ದು, ಭವಿಷ್ಯದಲ್ಲಿ ಆಲ್-ವೀಲ್-ಡ್ರೈವ್ ಸಿಸ್ಟಮ್ ಅನ್ನು ಪರಿಚಯಿಸಿರುವುದಾಗಿ ಕಂಪನಿ ಘೋಷಿಸಿದೆ. ಕಂಪನಿಯು ಹೊಸ ಸಿಯೆರಾದ ಇಂಟೀರಿಯರ್‌ನಲ್ಲಿ ಐಷಾರಾಮಿ ಮತ್ತು ಸೌಕರ್ಯಕ್ಕೆ ಹೆಚ್ಚು ಒತ್ತು ನೀಡಿದೆ. 2730 ಎಂಎಂ ವೀಲ್‌ಬೇಸ್ ಒದಗಿಸಿರುವುದು ಈ ವಿಭಾಗದಲ್ಲಿ ಉತ್ತಮವಾಗಿದ್ದು, ಪ್ರಯಾಣಿಕರಿಗೆ ಸಾಕಷ್ಟು ಸ್ಥಳಾವಕಾಶ ಲಭ್ಯವಿದೆ.
ಕಾರು ಟಾಟಾದ ಟ್ರಿಪಲ್-ಸ್ಕ್ರೀನ್ ಥಿಯೇಟರ್‌ಪ್ರೊ ಸೆಟಪ್ ಅನ್ನು ಒಳಗೊಂಡಿದೆ. 10.25-ಇಂಚಿನ ಡಿಜಿಟಲ್ ಕ್ಲಸ್ಟರ್, 12.3-ಇಂಚಿನ ದೊಡ್ಡ ಸೆಂಟ್ರಲ್ ಟಚ್‌ಸ್ಕ್ರೀನ್ ಮತ್ತು ಪ್ರತ್ಯೇಕ 12.3-ಇಂಚಿನ ಪ್ಯಾಸೆಂಜರ್ ಡಿಸ್‌ಪ್ಲೇ. ಇದರೊಂದಿಗೆ ವೈರ್‌ಲೆಸ್ ಕಾರ್‌ಪ್ಲೇ, 5ಜಿ ಕನೆಕ್ಟಿವಿಟಿಯೊಂದಿಗೆ ಐಆರ್‌ಎ ಕನೆಕ್ಟೆಡ್ ಕಾರ್ ತಂತ್ರಜ್ಞಾನ ಹಾಗೂ ಪನೋರಮಿಕ್ ಸನ್‌ರೂಫ್, ವೆಂಟಿಲೇಟೆಡ್ ಸೀಟ್‌ಗಳು ಮತ್ತು ಡ್ಯುಯಲ್-ಜೋನ್ ಕ್ಲೈಮೇಟ್ ಕಂಟ್ರೋಲ್‌ನಂತಹ ವೈಶಿಷ್ಟ್ಯಗಳಿವೆ. ಸುರಕ್ಷತೆಗಾಗಿ ಆರು ಏರ್‌ಬ್ಯಾಗ್‌ಗಳು, ಎಬಿಎಸ್‌ ಜೊತೆಗೆ ಇಬಿಡಿ ಮತ್ತು ಲೆವೆಲ್ 2 ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್ ಸೇರಿವೆ.
ಟಾಟಾ ಹೊಸ ಸಿಯೆರಾದಲ್ಲಿ ಮೂರು ಪವರ್‌ಟ್ರೇನ್ ಆಯ್ಕೆಗಳನ್ನು ನೀಡಿದೆ. ಪ್ರತಿಸ್ಪರ್ಧಿಗಳಾದ ಕ್ರೆಟಾ ಮತ್ತು ಸೆಲ್ಟೋಸ್‌ಗೆ ಟಕ್ಕರ್ ನೀಡಲು, ಇದು 1.5-ಲೀಟರ್ ನ್ಯಾಚುರಲಿ ಆಸ್ಪಿರೇಟೆಡ್ ಪೆಟ್ರೋಲ್ ಎಂಜಿನ್ (105 ಬಿಎಚ್‌ಪಿ), ಬಹುನಿರೀಕ್ಷಿತ 1.5-ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ (158 ಬಿಎಚ್‌ಪಿ) ಮತ್ತು 1.5-ಲೀಟರ್ ಕ್ರಯೋಜೆಟ್ ಡೀಸೆಲ್ ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಿದೆ. ಡೀಸೆಲ್ ಎಂಜಿನ್ ಎಲ್ಲಾ ಫೀಚರ್‌ಗಳೊಂದಿಗೆ ಲಭ್ಯವಿದೆ. ಈ ಎಸ್‌ಯುವಿ ಸ್ಮಾರ್ಟ್+ ನಿಂದ ಹಿಡಿದು ಅಕಂಪ್ಲಿಶ್ಡ್+ ವರೆಗೆ ಒಟ್ಟು 7 ಫೀಚರ್‌ಗಳಲ್ಲಿ ಗ್ರಾಹಕರಿಗೆ ಲಭ್ಯವಾಗಲಿದೆ. ಹಳೆಯ ಸಿಯೆರಾವನ್ನು ಇಷ್ಟಪಡುವ ಮತ್ತು ಹೊಸ ತಂತ್ರಜ್ಞಾನ ಬಯಸುವ ಗ್ರಾಹಕರಿಗೆ ಇದು ಉತ್ತಮ ಆಯ್ಕೆಯಾಗಿದೆ.
