ಸಾಮಾನ್ಯವಾಗಿ ವಾರಾಂತ್ಯಗಳಲ್ಲಿ ಸಹಸ್ರಾರು ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸುತ್ತಿರುವುದರಿಂದ ದೇವಾಲಯದ ಸುತ್ತಮುತ್ತ ತೀವ್ರ ಜನದಟ್ಟಣೆ ಕಂಡುಬರುತ್ತಿದೆ. ಪರಿಣಾಮವಾಗಿ, ಬೆಟ್ಟಕ್ಕೆ ತೆರಳುವ ಮಾರ್ಗದಲ್ಲಿ ವಾಹನ ದಟ್ಟಣೆ ಹೆಚ್ಚಾಗಿ ಪ್ರವಾಸಿಗರು ಪರದಾಡುವಂತಾಗಿದೆ. ಪೊಲೀಸರು ಟ್ರಾಫಿಕ್ ಸುಗಮಗೊಳಿಸಲು ಹರಸಾಹಸ ಪಡುತ್ತಿದ್ದು, ಪ್ರವಾಸಿಗರ ಸಂಖ್ಯೆ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಭಾಗದಲ್ಲಿ ಸೂಕ್ತ ಮೂಲಸೌಕರ್ಯ ಹಾಗೂ ಸಂಚಾರ ವ್ಯವಸ್ಥೆ ಕಲ್ಪಿಸುವ ಅಗತ್ಯ ಎದುರಾಗಿದೆ.

ಐತಿಹಾಸಿಕವಾಗಿ ಈ ಕ್ಷೇತ್ರವು ಮಹಾಭಾರತದ ಪಾಂಡವರ ಕಾಲದ ಪ್ರತೀತಿ ಹೊಂದಿದೆ. ವನವಾಸದ ಸಮಯದಲ್ಲಿ ಕುಡಿಯುವ ನೀರಿಲ್ಲದೆ ತಪಿಸಿದಾಗ, ಅರ್ಜುನನು ತನ್ನ ಬಾಣದಿಂದ ಬಂಡೆಯನ್ನು ಸೀಳಿ ನೀರು ಹೊರತಂದಿದ್ದನು ಎಂಬ ನಂಬಿಕೆ ಇಲ್ಲಿದೆ. ಇಲ್ಲಿನ ಗುಹೆಯೊಳಗಿಂದ ನಿರಂತರವಾಗಿ ಹರಿಯುವ ನೀರು ಬಿರು ಬೇಸಿಗೆಯಲ್ಲೂ ಬತ್ತುವುದಿಲ್ಲ ಎಂಬ ನೈಸರ್ಗಿಕ ವಿಸ್ಮಯವೇ ಭಕ್ತರನ್ನು ಆಕರ್ಷಿಸುತ್ತದೆ.

ಧಾರ್ಮಿಕವಾಗಿಯೂ ಈ ದೇವಾಲಯ ಪ್ರಸಿದ್ಧವಾಗಿದ್ದು, ಪ್ರತಿ ಹುಣ್ಣಿಮೆಯಂದು ನಡೆಯುವ ವಿಶೇಷ ಪೂಜೆಯಲ್ಲಿ ಸುತ್ತಮುತ್ತಲಿನ 20ಕ್ಕೂ ಹೆಚ್ಚು ಗ್ರಾಮಗಳ ಜನರು ಶ್ರದ್ಧಾಭಕ್ತಿಯಿಂದ ಪಾಲ್ಗೊಳ್ಳುತ್ತಾರೆ. ಐತಿಹಾಸಿಕ ವೈಭವ, ನೈಸರ್ಗಿಕ ವಿಸ್ಮಯ ಹಾಗೂ ಸಿನಿರಂಗದ ಜನಪ್ರಿಯತೆ ಮೂರೂ ಸಮ್ಮಿಲನಗೊಂಡಿರುವ ಮಳೆ ಮಲ್ಲೇಶ್ವರ ಬೆಟ್ಟವು ಪ್ರಮುಖ ಪ್ರವಾಸಿ ಆಕರ್ಷಣೆಯಾಗಿ ಹೊರಹೊಮ್ಮಿದೆ.

The post ‘ಪ್ರೇಮದ ಊರಲಿ’ ಸಿನಿಮಾ ಹಿಟ್: ಹಾಸನದ ಮಳೆ ಮಲ್ಲೇಶ್ವರ ಬೆಟ್ಟಕ್ಕೆ ಹರಿದುಬಂತು ಜನಸಾಗರ! appeared first on Samyukta Karnataka.