2009 ರ ಫೆಬ್ರವರಿ 25 ರಂದು ಆಸ್ಟ್ರೇಲಿಯಾದ ವಿಕ್ಟೋರಿಯಾ ಪ್ರಾಂತ್ಯದ ಹೈಡೆಲ್ಬರ್ಗ್‌ನಲ್ಲಿ ಜನಿಸಿದ ಇರಾ, ಅಲ್ಲಿಯೇ ನೆಲೆಸಿರುವ ಭಾರತೀಯ ಮೂಲದ ಕುಟುಂಬಕ್ಕೆ ಸೇರಿದವರಾಗಿದ್ದಾರೆ. ಬಾಲ್ಯದಿಂದಲೇ ಕ್ರಿಕೆಟ್‌ನಲ್ಲಿ ತೀವ್ರ ಆಸಕ್ತಿ ಹೊಂದಿದ್ದು, ವಿಕ್ಟೋರಿಯಾ ವೆಸ್ಟರ್ನ್ ರೀಜನ್ ಜೂನಿಯರ್ ಕ್ರಿಕೆಟ್ ಅಸೋಸಿಯೇಷನ್ ಮೂಲಕ ತಮ್ಮ ಪ್ರಯಾಣ ಆರಂಭಿಸಿದರು. ಸ್ಥಳೀಯ ಕ್ಲಬ್ ಹಾಗೂ ಶಾಲಾ ಮಟ್ಟದ ಟೂರ್ನಿಗಳಲ್ಲಿ ಶಿಸ್ತು ಮತ್ತು ಅತ್ಯುತ್ತಮ ಫಿಟ್‌ನೆಸ್ ಪ್ರದರ್ಶಿಸುವ ಮೂಲಕ ಹಂತ-ಹಂತವಾಗಿ ರಾಜ್ಯ ಮತ್ತು ರಾಷ್ಟ್ರೀಯ ಜೂನಿಯರ್ ತಂಡಕ್ಕೆ ಆಯ್ಕೆಯಾದರು.

ತ್ರಿಕೋನ ಸರಣಿಯಲ್ಲಿ ವಿಕೆಟ್ ಬೇಟೆ: ಇತ್ತೀಚೆಗೆ ನಡೆದ ಆಸ್ಟ್ರೇಲಿಯಾ, ಇಂಗ್ಲೆಂಡ್ ಮತ್ತು ಶ್ರೀಲಂಕಾ ಒಳಗೊಂಡ ಅಂಡರ್-19 ತ್ರಿಕೋನ ಸರಣಿಯಲ್ಲಿ ಇರಾ ಅಮೋಘ ಬೌಲಿಂಗ್ ಪ್ರದರ್ಶಿಸಿದ್ದಾರೆ. ಇಡೀ ಟೂರ್ನಮೆಂಟ್‌ನಲ್ಲಿ ಒಟ್ಟು 13 ವಿಕೆಟ್‌ಗಳನ್ನು ಕಬಳಿಸುವ ಮೂಲಕ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಒತ್ತಡದ ಸಮಯದಲ್ಲೂ ವಿಕೆಟ್ ಪಡೆಯುವ ಸ್ಥಿರತೆಯು ಆಸ್ಟ್ರೇಲಿಯಾ ಕ್ರಿಕೆಟ್ ಮಂಡಳಿಯ ಸೆಲೆಕ್ಟರ್‌ಗಳ ಗಮನ ಸೆಳೆದಿದೆ.

ಹಾಗೇ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಮಿಂಚುವ ಸಾಮರ್ಥ್ಯ ಹೊಂದಿರುವ ಈ ಯುವ ಆಲ್‌ರೌಂಡರ್, ಶೀಘ್ರದಲ್ಲೇ ಆಸ್ಟ್ರೇಲಿಯಾದ ಸೀನಿಯರ್ ಮಹಿಳಾ ರಾಷ್ಟ್ರೀಯ ತಂಡಕ್ಕೆ ಪದಾರ್ಪಣೆ ಮಾಡುವ ಎಲ್ಲಾ ಸಾಧ್ಯತೆಗಳಿವೆ. ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಈ ಮೂಗುತ್ತಿ ಸುಂದರಿ ಇರಾರನ್ನ, ಆಸೀಸ್ ಸ್ಟಾರ್ ಆಟಗಾರ್ತಿ ಎಲಿಸ್ ಪೆರ್ರಿಗೆ ಹೋಲಿಸಲಾಗುತ್ತಿದ್ದು, ಕ್ರಿಕೆಟ್ ವಿಶ್ಲೇಷಕರು ಮಾತ್ರ ಇರಾ ತಮ್ಮದೇ ಆದ ವಿಶಿಷ್ಟ ಪ್ರತಿಭೆಯಿಂದ ವಿಶ್ವ ಕ್ರಿಕೆಟ್‌ನಲ್ಲಿ ದೊಡ್ಡ ಹೆಸರು ಮಾಡಲಿದ್ದಾರೆ ಎಂದು ಭವಿಷ್ಯ ನುಡಿದಿದ್ದಾರೆ.

The post ಮೂಗುತ್ತಿ ಸುಂದರಿ: ಆಸೀಸ್ ಕ್ರಿಕೆಟ್‌ನಲ್ಲಿ ಭಾರತೀಯ ಮೂಲದ ಇರಾ ಏರಿ ಹೊಸ ಸಂಚಲನ! appeared first on Samyukta Karnataka.

ಸ್ಕೂಲ್ ಯೂನಿಫಾರ್ಮ್ ಧರಿಸಿರುವ ಈ ಪುಟ್ಟ ಬಾಲಕ, ಬಿಸಿಲಿನ ಝಳಕ್ಕೆ ಸ್ವಲ್ಪ ಬಳಲಿದಂತೆ ಕಾಣುತ್ತಿದ್ದಾನೆ. ಆದರೆ, ಅವನ ಮಾತುಗಳಲ್ಲಿ ಮಾತ್ರ ಗಂಭೀರವಾದ ಉದ್ದೇಶವಿದೆ. ಕ್ಯಾಮೆರಾ ಮುಂದೆ ನಿಂತು ಮಾತನಾಡುತ್ತಾ, “ತುಂಬಾ ಬಿಸಿಲಿದೆ, ಆದರೂ ನಾವು ಶಾಲೆಗೆ ಹೋಗಲೇಬೇಕಾದ ಅನಿವಾರ್ಯತೆ ಇದೆ” ಎಂದು ತನ್ನ ನೋವನ್ನು ತೋಡಿಕೊಳ್ಳುತ್ತಾನೆ.

ಇಲ್ಲಿಯವರೆಗೆ ಎಲ್ಲವೂ ಸಾಮಾನ್ಯ ಎನಿಸಿದರೂ, ಮುಂದೆ ಈ ಬಾಲಕ ನೀಡಿದ ‘ಚುನಾವಣಾ ಭರವಸೆ’ ಮಾತ್ರ ನೆಟ್ಟಿಗರನ್ನು ನಗೆಗಡಲಲ್ಲಿ ತೇಲಿಸಿದೆ. “ನಾನು ಮುಂದೊಂದು ದಿನ ಪ್ರಧಾನಿಯಾದರೆ, ಮೊದಲು ಮಾಡುವ ಕೆಲಸವೆಂದರೆ ಬೇಸಿಗೆಯಲ್ಲಿ ಶಾಲೆಗಳಿಗೆ ರಜೆ ಘೋಷಿಸುವುದು. ಎಲ್ಲರೂ ಮನೆಯಲ್ಲೇ ತಂಪಾಗಿ ಇರಬೇಕು!” ಎಂದು ತೀರಾ ಗಂಭೀರವಾಗಿ ಹೇಳುತ್ತಾನೆ.

ಈ ಬಾಲಕನ ಮುಗ್ಧತೆ ಮತ್ತು ಅವನ ಈ ‘ಭರವಸೆ’ ನೆಟ್ಟಿಗರ ಮನಗೆದ್ದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ಭರ್ಜರಿಯಾಗಿ ಶೇರ್ ಆಗುತ್ತಿದ್ದು, ಸಾವಿರಾರು ಜನರು ಈ ಬಾಲಕನಿಗೆ ತಮ್ಮ ಬೆಂಬಲ ಸೂಚಿಸುತ್ತಿದ್ದಾರೆ. “ಈ ಬಾಲಕನೇ ನಮಗೆ ಬೇಕಾಗಿರುವ ನಿಜವಾದ ರಾಜಕಾರಣಿ”, “ಈತನ ಮಾತಿನಲ್ಲಿ ಸತ್ಯವಿದೆ” ಎಂದು ನೆಟ್ಟಿಗರು ಕಾಮೆಂಟ್ ಮಾಡುತ್ತಿದ್ದಾರೆ.

ಒಟ್ಟಾರೆಯಾಗಿ, ಈ ಪುಟ್ಟ ಬಾಲಕನ ಮಾತುಗಳು ನಗೆ ಉಕ್ಕಿಸಿದರೂ, ಕಠಿಣ ಬಿಸಿಲಿನಲ್ಲಿ ಶಾಲೆಗೆ ಹೋಗುವ ವಿದ್ಯಾರ್ಥಿಗಳ ನಿಜವಾದ ಸಮಸ್ಯೆಯತ್ತ ಎಲ್ಲರ ಗಮನ ಸೆಳೆಯುವಂತೆ ಮಾಡಿದೆ. ರಾಜಕೀಯದ ಗೋಜಿಲ್ಲದೆ, ಕೇವಲ ಶಾಲೆಗೆ ರಜೆ ಬೇಕೆಂದು ಕೇಳುತ್ತಿರುವ ಈ ‘ಫ್ಯೂಚರ್ ಪ್ರೈಮ್ ಮಿನಿಸ್ಟರ್’ಗೆ ಈಗ ಇಂಟರ್ನೆಟ್ ಜಗತ್ತಿನ ಬಹುದೊಡ್ಡ ಮತ ಸಿಕ್ಕಿದೆ ಎಂದರೆ ತಪ್ಪಾಗಲಾರದು.

The post ಮೋದಿ ಸ್ಥಾನಕ್ಕೆ ಪೈಪೋಟಿ ನೀಡಲಿದ್ದಾರೆ ಈ ‘ಫ್ಯೂಚರ್ ಪ್ರೈಮ್ ಮಿನಿಸ್ಟರ್’; ಪುಟ್ಟ ಪೋರ ಕೊಟ್ಟ ಭರವಸೆ ಏನು? appeared first on Samyukta Karnataka.