ವೈರಲ್ ಆಗಿರುವ ಈ ವಿಡಿಯೋದಲ್ಲಿ, ಎಸ್‌ಆರ್‌ಹೆಚ್ ಜೆರ್ಸಿ ಧರಿಸಿದ್ದ ಅಭಿಮಾನಿಯೊಬ್ಬರು ಗ್ಯಾಲರಿಯಲ್ಲಿ ನಿಂತು ವಿಚಿತ್ರವಾದ ಕೈಚಳಕ ಮತ್ತು ಹಾವಭಾವಗಳನ್ನು ಮಾಡುತ್ತಿರುವುದು ಕಂಡುಬಂದಿದೆ. ಇದನ್ನು ನೋಡಿದ ನೆಟ್ಟಿಗರು ತಮಾಷೆಯಾಗಿ ಇದು “ಬ್ಲ್ಯಾಕ್ ಮ್ಯಾಜಿಕ್” ಎಂದು ಬಣ್ಣಿಸಿದ್ದಾರೆ. ಆದರೆ ಅಸಲಿ ಟ್ವಿಸ್ಟ್ ಸಿಕ್ಕಿದ್ದೇ ಅಲ್ಲಿ; ಆ ಅಭಿಮಾನಿ ಈ ರೀತಿ ಕೈ ಸನ್ನೆಯಾಟ ಮುಗಿಸಿದ ಕೆಲವೇ ಸೆಕೆಂಡುಗಳಲ್ಲಿ, ಎಸ್‌ಆರ್‌ಹೆಚ್ ಬೌಲರ್ ಸಾಕಿಬ್ ಹುಸೇನ್ ಎಸೆದ ಚೆಂಡಿಗೆ ಶಿವಂ ದುಬೆ ಕ್ಲೀನ್ ಬೌಲ್ಡ್ ಆಗಿ ಪೆವಿಲಿಯನ್ ಸೇರಿದರು.

ಅಭಿಮಾನಿಯ ವಿಚಿತ್ರ ವರ್ತನೆ ಮತ್ತು ತಕ್ಷಣವೇ ವಿಕೆಟ್ ಪತನವಾದ ಈ ಕಾಕತಾಳೀಯ ಘಟನೆಯನ್ನು ನೋಡಿ ಕ್ರೀಡಾಂಗಣದಲ್ಲಿದ್ದವರು ಹಾಗೂ ಟಿವಿಯಲ್ಲಿ ನೋಡುತ್ತಿದ್ದವರು ಒಂದು ಕ್ಷಣ ಬೆಚ್ಚಿಬಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ಕಿಚ್ಚು ಹಚ್ಚಿದ್ದು, “ಎಸ್‌ಆರ್‌ಹೆಚ್ ತಂಡಕ್ಕೆ ಮಾಟಮಂತ್ರದ ಶಕ್ತಿ ಸಿಕ್ಕಿದೆ” ಎಂದು ಅಭಿಮಾನಿಗಳು ತಮಾಷೆಯ ಮೀಮ್‌ಗಳನ್ನು ಹರಿಬಿಡುತ್ತಿದ್ದಾರೆ. ಕೇವಲ ಮನರಂಜನೆಗಾಗಿ ಈ ವಿಡಿಯೋ ವೈರಲ್ ಆಗುತ್ತಿದ್ದರೂ, ಪಂದ್ಯದ ಗಂಭೀರತೆಯ ನಡುವೆ ಇದು ಒಂದು ವಿಭಿನ್ನ ಮಜಲನ್ನು ಸೃಷ್ಟಿಸಿದೆ.

ಅಂತಿಮವಾಗಿ ಈ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ತಂಡವು ಚೆನ್ನೈ ವಿರುದ್ಧ 10 ರನ್‌ಗಳ ರೋಚಕ ಜಯ ಸಾಧಿಸಿತು. ಮೈದಾನದ ಹೊರಗಿನ ಈ ವಿಚಿತ್ರ ವಿದ್ಯಮಾನವು ಪಂದ್ಯದ ಗೆಲುವಿನಷ್ಟೇ ಸದ್ದು ಮಾಡುತ್ತಿದ್ದು, ಕ್ರಿಕೆಟ್ ಅಂಗಳದಲ್ಲಿ ಮೂಢನಂಬಿಕೆ, ಕಾಕತಾಳೀಯ ಮತ್ತು ನಾಟಕೀಯ ಬೆಳವಣಿಗೆಗಳು ಹೇಗೆ ಮೇಳೈಸುತ್ತವೆ ಎಂಬುದಕ್ಕೆ ಈ “ಬ್ಲ್ಯಾಕ್ ಮ್ಯಾಜಿಕ್” ವಿಡಿಯೋ ಸಾಕ್ಷಿಯಾಗಿದೆ.

The post IPLನಲ್ಲಿ ಮಂತ್ರ-ತಂತ್ರ? SRH ಗೆಲುವಿನ ಹಿಂದೆ ವಿಚಿತ್ರ ಶಕ್ತಿ! ಆ ಅಭಿಮಾನಿ ಮಾಡಿದ್ದು ಬ್ಲ್ಯಾಕ್ ಮ್ಯಾಜಿಕ್? appeared first on Samyukta Karnataka.